Read Chol Deuteronomio 14 Bible Online

Deuteronomio 14 - Chol bible

Deuteronomio 14

¹Come i yalobiletla lac Yum Dios. Mach yomic mi la' tsep la' bʌ. Mach yomic mi la' jujchin la' jol ya' ti la' pam cha'an ti' caj jini chʌmeño' bʌ che' bajche' mi' melob jini mu' bʌ i ch'ujutesañob jini melbil bʌ dios tac.

²Come ch'ujul bʌ i tejclumetla lac Yum Dios. Yajcʌbiletla i cha'an, cha'an mi la' wajñel ti ch'ujul ti' tojlel lac Yum. Mach che'iquetla bajche' yaño' bʌ tejclumob ti pañimil.

³Mach yomic mi la' c'ux jini bibi' tac bʌ bʌte'el. Ts'a' mi' q'uel Dios. Yom mi la' c'ux iliyi: wacax, tiñʌme', chivo, me', gacela, corzo, mate' chivo, íbice, antílope, mate' tiñʌme'.

⁶Pejtelel jini xac'al bʌ i yoc jini yujil bʌ cha' letsel i buc'bal, mi mejlel la' c'ux.

⁷Pero mach yomic mi la' c'ux jini yujil bʌ cha' letsel i buc'bal mi mach xac'alic i yoc. Jiñʌch camello, yic'ot t'ul, yic'ot ujchib. Yom mi la' q'uel ti bibi'.

⁸Mach yomic mi la' c'ux ja'el jini chitam, anquese xac'al i yoc, pero mach yujilic cha' letsel i buc'bal. Jini cha'an mach sʌquic i bʌc'tal. Mach yomic mi la' c'ux. Mach yomic mi la' tʌl.

⁹Pejtelel chuqui an ti mal ja' mi mejlel la' c'ux, jini an tac bʌ i welo' ja' yic'ot i sujl.

¹⁰Pero pejtelel jini mach bʌ anic i welo' ja' yic'ot i sujl mach yomic mi la' c'ux, come bibi'.

¹¹Pejtelel jini sʌc tac bʌ mate'mut mi mejlel la' c'ux. Jiñʌch ili mate'mut mach bʌ mejlic la' c'uxe': xiye', xta'jol, azor, gallinazo, milano ti chajp ti chajp, xwachin ti chajp ti chajp, avestruz, xcuj, xjoch', pelícano, buitre, somor mujo, cigüeña, ja'al pech, abubilla, suts'.

¹⁹Ma'anic mi mejlel la' c'ux i chʌñil pañimil yujil tac bʌ wejlel. Jini yajcʌbil tac bʌ, jini sʌc bʌ mi mejlel la' c'ux.

²¹Mach yomic mi la' c'ux jini chʌmen bʌ alʌc'ʌl mi bʌte'el. Mi mejlel la' wʌq'uen jini winicob parte bʌ i lumal chumulo' bʌ ti la' lum. Jini mi mejlel i c'uxob, che' ja'el mi mejlel la' chombeñob. Partejetla, ch'ujul bʌ i tejclumetla lac Yum Dios. Mach yomic mi la' ch'ʌx jini alʌ chivo ti' ya'lel i chu' i ña'.

²²Jujump'ejl jab wersa mi caj la' wʌc' diezmo loq'uem bʌ ti pejtelel i wut la' pʌc'ʌb mu' bʌ i loq'uel ti la' we'tel.

²³Che' jini mi caj la' c'uxe' ti' tojlel lac Yum Dios ya' ti yajñib yajcʌbil bʌ i cha'an ba' mi' ch'ujutesʌntel. Jiñʌch diezmo mu' bʌ i loq'uel ti la' ts'usub yic'ot ti la' waceite, yic'ot i yʌx'al wacax yic'ot tiñʌme', cha'an mi la' ñop la' bʌc'ñan lac Yum Dios ti pejtelel q'uin.

²⁴Che' cabʌlix woli' p'ojlel a chubʌ'an cha'an i yutslel i pusic'al Dios, mi wen ñajt i yajñib lac Yum yajcʌbil bʌ i cha'an, mi wocol mi la' cuchben majlel i majtan ya' baqui mi' ch'ujutesʌntel,

²⁵che' jini mi mejlel la' chon jini diezmo cha'an mi la' ch'ʌm majlel i tojol ya' ti' yajñib lac Yum Dios ya' ba' yom ch'ujutesʌntel.

²⁶Che' c'otemetla mi caj la' c'ʌn jini taq'uin cha'an mi la' mʌn wacax, mi tiñʌme', mi ts'usub, mi i ya'lel ts'usub mi tsaj o mi pa'jesʌbilix, o mi chuqui tac jach a wom. Yom mi la' cha'len we'el yic'ot pejtelel a pi'ʌlob ti' tijicñʌyel la' pusic'al ya' ti' tojlel lac Yum Dios.

²⁷Mach yomic mi la' to'ol ñusan jini levíjob chumulo' bʌ ti la' lum. T'oxbeñob ja'el la' cha'an bʌ, come ma'anic tsi' tem tajayob i lum la' wic'ot.

²⁸Ti' jilibal tac u'uxp'ejl jab yom mi la' loc'ben i diezmojlel la' pʌc'ʌb yic'ot la' wʌlac' tsa' bʌ coli ti ili jab cha'an mi la' wʌq'ueñob jini mach bʌ anic i cha'anob.

²⁹Aq'ueñob jini levíjob come ma'añobic i lum ti la' tojlel, che' ja'el jini ch'oyolo' bʌ ti yambʌ lum, yic'ot jini meba' alʌlob, yic'ot meba' x'ixicob am bʌ ti la' tejclum. Aq'ueñob i bʌl i ñʌc cha'an mi' ñaj'añob. Che' jini mi caj la' wʌq'uentel i yutslel lac Yum Dios ti pejtelel la' we'tel.