Read Chol Deuteronomio 17 Bible Online

Deuteronomio 17 - Chol bible

Deuteronomio 17

¹Mach yomic mi la' tsʌnsʌben lac Yum Dios wacax mi tiñʌme' am bʌ i c'amʌjel, mi i p'ajomal, come ts'a'lebil ti lac Yum.

²Ti pejtelel la' tejclum tsa' bʌ i yʌq'ueyetla lac Yum Dios, mi an juntiquil mi winic mi x'ixic tsa' bʌ i taja i mul ti' wut lac Yum Dios, mi tsi' ñusʌbe jini xuc'ul bʌ i t'an, mi tsa' majli i ch'ujutesan jini dios tac, mi tsi' ñocchoco i bʌ ti' tojlel jini q'uin yic'ot ti' tojlel jini uw, yic'ot pejtelel chuqui an tac ti panchan, tic'bilix bʌ,

⁴che' an majqui mi' tilel i subeñet, yom mi la' wen c'ajtin mi isujmʌch tsi' mele jini leco bʌ ti' tojlel israelob.

⁵Mi isujm tsi' mele bajche' jini, yom mi la' choc loq'uel ti la' tejclum jini winic o mi x'ixic tsa' bʌ i mele chuqui leco. Yom mi la' jul ti xajlel jinto mi' chʌmel.

⁶Mi tsi' q'ueleyob cha'tiquil uxtiquil, wersa yom mi' chʌmel jini xmulil, pero mi tsi' q'uele juntiquil jach, ma'anic mi' caj ti chʌmel.

⁷Jini tsa' bʌ i q'uelbeyob i mul, la' i jul ñaxan. Che' ti wi'il la' i julob pejtel winicob año' bʌ ti tejclum cha'an mi' jilel jontolil ti la' tojlel.

⁸Che' mach mejlic a mel a bʌ ya' ti a tejclum cha'an cʌlʌx jax wocol, che' an tsʌnsa, o che' mi' lowob i bʌ, o che' mi' cajatañob i chubʌ'an, che' jini yom mi la' majlel ya' ti ajñibʌl yajcʌbil bʌ i cha'an lac Yum Dios.

⁹Yom mi la' c'otel ba' añob jini motomajob, yic'ot levíjob, yic'ot ba'an jini juez woli bʌ i mel i ye'tel. Yom mi la' c'ajtibeñob bajche' yom ujtel meloñel. Mi caj i subeñetob.

¹⁰Jini cha'an che'ʌch yom mi la' mel che' bajche' mi' subeñetob jini año' bʌ i ye'tel ya' ti ajñibʌl yajcʌbil bʌ i cha'an lac Yum. Yom wen tsajiletla cha'an ts'ʌcʌl mi la' mel che' bajche' mi la' cʌntesʌntel.

¹¹Melela ti ts'ʌcʌl che' bajche' mi' subeñetob. Mach yomic mi la' wis tʌts' la' bʌ mi ti la' ts'ejic mi ti la' ñojic.

¹²Jini winic mu' bʌ i chañ'esan i bʌ, mach bʌ anic mi' jac'ben i t'an jini motomaj woli bʌ ti e'tel ti' tojlel lac Yum Dios, yic'ot ti' tojlel ja'el jini juez, wersa mi caj i chʌmel jini winic cha'an mi' lajmel jontolil ti' tojlel israelob.

¹³Mi caj i yubiñob pejtel tejclumob. Mi' cajelob ti bʌq'uen. Ma'anix mi caj i chʌn chañ'esañob i bʌ ti' tojlel jini año' bʌ i ye'tel.

¹⁴Che' ochemetixla ti la' lum woli bʌ i yʌq'ueñetla lac Yum Dios, che' anix ti la' wenta cha'an mi la' q'uel, che' jini mi caj la' wʌl: “La comix lac wa'chocon rey che' bajche' mi' melob yan tac bʌ tejclum año' bʌ ti lac joytilel”, che'etla.

¹⁵Isujm mic subeñetla, cojach jini yajcʌbil bʌ ti lac Yum Dios mi mejlel la' wa'chocon. Jini jach la' pi'ʌl ti chumtʌl mi mejlel la' wotsan ti ye'tel. Mach yomic la' wotsan ti e'tel jini ñajt bʌ i lumal mach bʌ la' cʌñʌyic.

¹⁶Mach yomic mi' p'ojlesan i caballo tac jini rey. Mach yomic ja'el mi' choc majlel winicob ti Egipto cha'an mi' pʌyob tilel caballo, come lac Yum tsi' yʌlʌ: “Ma'me chʌn sujtiquetla ti bij ba' tilemetla”, che'en.

¹⁷Mach yomic mi' pʌy cabʌl i yijñam ame sojquic i pusic'al jini rey. Mach yomic mi' tempan cabʌl oro yic'ot plata.

¹⁸Che' mi' buchtʌl ti' ye'tel cha'an mi' cha'len yumʌntel, che' jini yom mi' cha' ts'ijban ti jun pejtel jini mandar lotbil bʌ i cha'an jini motomajob levíjob.

¹⁹Yom mi' q'uel jini jun ti pejtelel ora cha'an mi' bʌc'ñan lac Yum Dios cha'an mi' ñop, yic'ot cha'an mi' jac' pejtelel i mandar, cha'an ts'ʌcʌl mi' mel che' bajche' ts'ijbubil.

²⁰Che' jini ma'anic mi caj i chañ'esan i bʌ ti' tojlel i pi'ʌlob. Ma'anic mi caj i tʌts' i bʌ mi ti ts'ej mi ti' ñoj. Ts'ʌcʌl mi caj i jac' pejtel jini mandar. Che' jini jal mi caj i cha'len yumʌl ti Israel yic'ot ja'el i yalobilob.