Read Chol Deuteronomio 18 Bible Online

Deuteronomio 18 - Chol bible

Deuteronomio 18

¹Jini motomajob yic'ot levíjob i p'olbalo' bʌ Leví, ma'añobic i chubʌ'an che' bajche' israelob. Mi caj i c'uxob we'elʌl mu' bʌ i yʌq'uentel lac Yum ti' majtan cha'an israelob.

²Pero ti' tojlel i pi'ʌlob ma'añobic i chubʌ'an. Lac Yum i cha'anʌch Leví che' bajche' tsi' wʌn subeyob.

³Jiñʌch yom bʌ mi' yʌq'uentelob motomajob* cha'an israelob che' mi' pʌyob tilel i yʌlac' mi wacax mi tiñʌme' cha'an mi' yʌq'ueñob lac Yum. Yom mi' yʌq'uentelob i quejlab yic'ot i xʌc'ti' yic'ot i chuyib.

⁴Pejtelel jini ñaxan tac bʌ i wut la' pʌc'ʌb, yic'ot i ya'lel la' ts'usub, yic'ot la' waceite, yic'ot jini ñaxan tac bʌ i tsutsel la' tiñʌme', yom mi la' wʌq'uen motomajob.

⁵Come lac yum Dios tsi' yajcayob loq'uel ti' la' tojlel yic'ot i yalobilob cha'an mi' chʌn q'uelben i ye'tel lac Yum. Jiñʌch i ye'tel yic'ot i ye'tel i yalobilob ti pejtelel ora.

⁶Che' mi' loq'uel leví ti jump'ejl tejclum ti Israel cha'an mi' majlel ti e'tel ya' ti ajñibʌl yajcʌbil bʌ i cha'an lac Yum, mi caj i cha'len i ye'tel ti jump'ejl jach i pusic'al ti' c'aba' lac Yum Dios che' bajche' pejtel i pi'ʌlob levíjob ya' bʌ añob ti Ch'ujul bʌ Ajñibʌl.

⁸Mi wen chumul jini winic o mi mach wen chumulic, lajal mi caj i taj i bʌl i ñʌc' yic'ot jini levíjob.

⁹Che' ya' añetla ti lum woli bʌ i yʌq'ueñetla lac Yum Dios, mach yomic mi la' ñop la' mel jontolil che' bajche' yan tac bʌ tejclum.

¹⁰Mach yomic mi' yajñel ti la' tojlel mi juntiquilic mu' bʌ i pul ti c'ajc ch'iton mi xch'oc bʌ i yalobil. Mach yomic mi xtic'laya mi xwujt mi jini mu' bʌ i wʌn ña'tan chuqui mi caj i yujtel, mi jini mu' bʌ i yʌc' i bʌ ti' wenta ec',

¹¹mi xpejca cruz mi jini mu' bʌ i yʌc' i bʌ ti' wenta xiba cha'an mi' sub i t'an yic'ot cha'an mi' mel ñuc tac bʌ i ye'tel, mi jini yujil bʌ i pejcʌntel ch'ujlelʌl.

¹²Come ts'a'lebil ti lac Yum pejtel mu' bʌ i melob che' bajche' jini. Che'ʌch mi' melob pejtel xchumtʌlob ya' ba' mi la' majlel ti chumtʌl. Jini cha'an lac Yum woli' chocob loq'uel ti la' tojlel.

¹³Yom ch'ujul mi la' wajñel ti' tojlel lac Yum Dios ti pejtelel ora.

¹⁴Come ili tejclum tac ya' ba' mi la' majlel ti chumtʌl mi' jac'beñob i t'an xlot año' bʌ ti' wenta xiba, pero mach che'ic mi caj la' mel come tic'bil i cha'an lac Yum.

¹⁵Lac Yum Dios muq'uix i wa'chocon juntiquil X'alt'an loq'uem bʌ ti la' tojlel che' bajche' joñon. Mero la' pi'ʌl. Yom mi la' jac'ben i t'an.

¹⁶Come tsa' la' sube Dios ya' ti Horeb ti jini q'uin che' bʌ tsa' la' tempa la' bʌ: “Mach comix c chʌn ubiben lojon i t'an lac Yum Dios. Mach comix c chʌn q'uel lojon jini c'ajc, ame chʌmicon lojon”, che'etla.

¹⁷Lac Yum tsi' subeyon: “Uts'at bajche' tsi' cha'leyob t'an.

¹⁸Muq'uix caj c wa'chobeñob X'alt'an loq'uem bʌ ti' pi'ʌlob, lajal bajche' jatet. Muq'uix caj cʌq'uen i sub t'an. Mi caj i cha' sub pejtel chuqui mic suben.

¹⁹Majqui jach mi' ts'a'liben i t'an jini X'alt'an mu' bʌ i melbeñon que'tel, mi caj i wersa mel i bʌ tic tojlel.

²⁰Pero mi an x'alt'an mu' bʌ i bajñel ña'tan chuqui mi' sub che' ma'anic tsac pejca, mi tsa' caji i yʌl yan tac bʌ t'an tilem bʌ ti dioste', wersa mi' chʌmel jini x'alt'an”. Che' tsi' subeyon lac Yum.

²¹Mi tsa' la' wʌlʌ ti la' pusic'al: “¿Bajche' mi mejlel laj cʌn i t'an lac Yum?” mi che'etla,

²²che'ʌch mi caj la' cʌn. Mi tsi' cha'le t'an x'alt'an ti' c'aba' lac Yum, mi ma'anic tsa' ts'ʌctiyi chuqui tsi' yʌlʌ, mi mach che'ic tsa' ujti, mach tilemic i t'an ti lac Yum. Tsa' jach i bajñel ña'ta bajche' yom alol jini x'alt'an. Mach mi la' bʌc'ñan.