Read Chol Deuteronomio 2 Bible Online

Deuteronomio 2 - Chol bible

Deuteronomio 2

¹Tsa' cha' sujtiyonla majlel ti colem bʌ i tiquiñal pañimil ti' bijlel jini Chʌchʌc bʌ Ñajb che' bajche' tsi' subeyon lac Yum. Cabʌl ora tsa' lac joy xʌñʌ jini wits tac am bʌ ti Seir.

²Lac Yum tsi' subeyon: Cabʌlix ora woli la' joy xʌn ili wits tac. Jasʌlix. Cha' cucuxla ya' ti norte.

⁴Yom ma' subeñob pejtelel winicob: Muq'uix cajel la' ñumel ya' ti' tojel i lumal la' pi'ʌlob i yalobilob Esaú chumulo' bʌ ti Seir. Añob i bʌq'uen cha'an lʌc'ʌletla, pero yom wen tsajiletla cha'an ma'anic chuqui mi la' tumbeñob.

⁵Mach yomic mi la' lon ochel la' chilben i lumob, come ma'anic mi caj cʌq'ueñetla i lum mi ts'ita'ic, mi cha'anic junts'ijt a woc, come i cha'añʌch Esaú. Tsa cʌq'ue pejtelel jini wits tac ila ti Seir.

⁶Tojbeñob i bʌl la' ñʌc' yic'ot jini ja' mu bʌ caj la' jap.

⁷Come la' Yum Dios tsa'ix i wen cʌntayetla. Tsi' wen q'ueleyetla che' bʌ tsa' ñumiyetla ti pejtelel ili colem bʌ i tiquiñal pañimil. Cha'c'al jab tsi' pi'leyetla la' Yum. Ma'anic chuqui anto yom la' cha'an. Che' tsi' yʌlʌ lac Yum.

⁸Jini cha'an tsa' ñumiyonla ti' lumal la querañob i yalobilob Esaú chumulo' bʌ ti Seir ti' bijlel Arabá mu' bʌ i tejchel ti Elat yic'ot ti Ezión Geber. Tsa' c'ʌlʌ c'otiyonla ti colem bʌ i tiquiñal pañimil i cha'an Moab.

⁹Lac Yum tsi' subeyon: Machme la' tic'lan jini moabob. Mach la' tech guerra ti' tojlelob, come ma'anic mi caj cʌq'uetla ti ochel ti' lumob, come tsa'ix cʌq'ueyob i yalobilob Lot jini lum Ar, che'en.

¹⁰(Ya' tsa' ñaxan chumleyob jini emineojob. Wen ñuc jini tejclum yic'ot cabʌl winicob. Chañob che' bajche' anaceojob jini winicob ya' bʌ chumulob ti oñiyi.

¹¹Chañob ja'el jini retimob. Jini cha'an ti cha'mojtlel mi' pejcʌntelob ti anaceojob, pero jini moabob tsi' pejcayob ti emineojob.

¹²Ya' ti Seir tsa' ñaxan chumleyob jini horeojob, pero tsi' chocoyob loq'uel i yalobilob Esaú. Tsi' laj jisayob. Che' jini tsa' cajiyob ti chumtʌl ya' ti' lumob che' bajche' tsa' chumleyob jini israelob ti jini lum tsa' bʌ i yʌq'ueyob lac Yum.)

¹³Jini cha'an tejchenla ti ora cha'an mi la' c'axel ya' ti ñoja' i c'aba' Zered. Che' tsi' yʌlʌ lac Yum. Che' jini tsa' c'axiyonla.

¹⁴Tsa' lac joy xʌñʌ jini Cades Barnea c'ʌlʌl ti ñoja' i c'aba' Zered. Waxʌclujump'ejl i cha'c'al (38) jab tsa' lac cha'le xʌmbal che' bajche' tsi' wʌn alʌ lac Yum, cha'an mach mejliconla ti' ochel che' cuxulob to jini yujilo' bʌ guerra tsa'ix bʌ i ñusʌbeyob i t'an. Tsa' laj chʌmiyob jini winicob yujilo' bʌ guerra.

¹⁵Lac yum tsi' yʌq'ueyob i wocol cha'an mi' chʌmelob. Tsi' laj jisayob.

¹⁶Che' chʌmeñobix jini winicob yujilo' bʌ guerra ti lac tojlel, lac Yum tsi' subeyon:

¹⁸“Wʌle mi caj la' c'axel ya' ti' lumal Moab ti' tojel jini lum i c'aba' Ar ya' ba' jaxʌl Moab.

¹⁹Che' jini mi caj la' c'otel ba'an jini amoñob, pero mach yomic mi la' contrajiñob, come ma'anic mi caj cʌq'ueñetla i lum amoñob mi ts'ita'ic, come tsa'ix cʌq'ueyob i yalobilob Lot”, che'en lac Yum.

²⁰(Ti ñaxan tsa' cʌn chumleyob ya'i jini wen chaño' bʌ winicob i c'aba' retimob. Jini moabob tsi' pejcayob ti zomzomeos.

²¹Wen ñuc jini tejclum oñiyi yic'ot cabʌl winicob. Chañob jini winicob che' bajche' anaceojob. Pero lac Yum tsi' yʌc'ʌyob ti jilel ti' tojlel jini amoñob. Tsi' chocoyob loq'uel ya' ba' chumulob. Ya' tsa' cajiyob ti chumtʌl amoñob.

²²Che'ʌch tsi' meleyob i pi'ʌlob Esaú ja'el che' bʌ tsa' chumleyob ya' ti Seir. Tsi' chocoyob loq'uel jini horeojob. Tsa' cajiyob ti chumtʌl ya' ti' lumob.

²³Jini caftoreojob tsi' jisayob jini aveojob año' bʌ ti tejclum tac c'ʌlʌl ti Gaza. Tsa' caji' cha'leñob chumtʌl ya' ti' lum.)

²⁴Tsi' yʌlʌ lac Yum: “Tejchenla ti ora. C'axenla ya' ti ñoja' i c'aba' Arnón. Come tsa'ix cʌq'ueyetla ti la' wenta jini rey Sehón jini amorreo am bʌ ti Hesbón yic'ot pejtelel i lum. Jini cha'an ochenla ya' ti' lumob. Techela guerra ti' tojlelob.

²⁵Come ti jim bʌ ora mi caj i toj sajtelob i pusic'al. Mi' cajelob ti bʌq'uen ti pejtelel pañimil che' mi' yubiñob wen ch'ejletla”, che'en.

²⁶Che' jini tsac yajca loq'uel winicob ti lac tojlel ti jini joctʌl i c'aba' Cademot. Tsac chocoyob majlel ba'an jini rey Sehón am bʌ ti Hesbón cha'an mi' c'ajtibeñob i yutslel i t'an.

²⁷Tsa' lac sube: “La' c'axicon lojon ti a lum. Toj jach mi caj c ñumel lojon ti bij. Ma'anic mi caj c xoy c bijlel lojon mi tic ts'ejic lojon mi tic ñojic.

²⁸Mach cujilic lojon xujch'. Muq'uix c mʌn lojon c waj cha'an mij c'ux lojon yic'ot ja' cha'an mic jap lojon. Yom jach ma' q'uelon lojon ti uts'at cha'an mic xʌn lojon ñumel jini bij.

²⁹Che'ʌch tsi' meleyob i p'olbal Esaú año' bʌ ti Seir. Tsi' yʌc'ʌyon lojon ti ñumel. Che' ja'el tsi' meleyob jini moabob año' bʌ ti Ar. Cojach com c ñumel lojon ba' añetla ti coc lojon c'ʌlʌl ti Jordán ja' ba' jaxʌl c lum lojon. Che' mij c'axel ti ja', mi caj cochel lojon tic lum lojon woli bʌ i yʌq'ueñon lojon lac Yum”, cho'on tsac sube.

³⁰Pero jini rey Sehón am bʌ ti Hesbón ma'anic tsi' yʌc'ʌyonla ti c'axel ti' lum, come lac Yum Dios tsi' tsʌts'esʌbe i pusic'al cha'an mi' yʌq'ueñetla i lum Sehón. Jini cha'an tsa' la' ch'ʌmʌ ti la' wenta. La' cha'anʌch c'ʌlʌl wʌle.

³¹Lac Yum tsi' subeyon: “Woli cʌc' ti a wenta Sehón yic'ot pejtelel i tejclum. Jini cha'an cucu ti ora. Ch'ʌmben i lum. A cha'anʌch”, che'en lac Yum.

³²Che' jini tsa' tili i tajonla Sehón yic'ot pejtelel i winicob cha'an mi' contrajiñonla ti guerra ti Jahaza.

³³Pero lac Yum Dios tsi' yʌc'ʌyob ti jilel ti lac tojlel. Tsa' lac laj jisayob, yic'ot pejtelel i yalobilob, yic'ot pejtelel año' bʌ ti' lumal.

³⁴Che' jini tsa' lac ch'ʌmbe i tejclum tac. Tsa' lac jisa pejtelel jini winicob x'ixicob yic'ot alʌlob ti jujump'ejl tejclum. Ma'anic majch tsa' chʌn cʌle mi juntiquilic.

³⁵Cojach tsa' lac ch'ʌmʌ jini alʌc'ʌl tac yic'ot pejtelel chubʌ'añʌl tsa' bʌ cʌle ti' tejclum.

³⁶Tsa' c'otiyonla ti Aroer am bʌ ti' tojel i ch'eñal ja' i c'aba' Arnón yic'ot jini tejclum tac am bʌ ti' tojel jini joctʌl. Tsa' c'ʌlʌ c'otiyonla ti Galaad. Tsa' lac t'uchtayob ti pejtelob yic'ot ja'el jini joyolo' bʌ ti chan bʌ ts'ajc. Ma'anic i p'ʌtʌlel ti lac tojlel, come lac Yum Dios tsi' laj ac'ʌyob ti laj c'ʌb.

³⁷Pero ma'anic tsa' ochiyonla ti' lumob jini amoñob, mi ti' ti'ic ja' i c'aba' Jabok, mi ti jini tejclum tac am bʌ ti wits. Come lac Yum Dios tsi' tiq'uiyonla.