Read Chol Deuteronomio 20 Bible Online

Deuteronomio 20 - Chol bible

Deuteronomio 20

¹Che' mi la' loq'uel ti guerra, che' talob ti la' contra winicob yic'ot caballo yic'ot carreta tac ñumen bʌ ti tsic che' bajche' jatetla, mach mi la' bʌc'ñañob, come lac Yum Dios tsa' bʌ i loc'sayetla ti Egipto woli' coltañetla.

²Che' i yorajlelix mi la' cha'len guerra, jini motomaj muq'uix i ñaxan wa'tʌl ti' tojlel soldadojob cha'an mi' subeñob:

³“Ubinla israelob: Tempʌbiletla wʌle cha'an mi la' cha'len guerra. Mach yomic mi' c'uñ'an la' pusic'al cha'an mi la' bʌc'ñanob.

⁴Come lac Yum Dios mi' majlel la' wic'ot ti guerra ti' contra la' contrajob cha'an mi' coltañetla”, che'en.

⁵Jini año' bʌ i ye'tel mi caj i subeñob jini soldadojob: “Mi an juntiquil winic tsa' bʌ i mele tsiji' bʌ i yotot maxto bʌ anic tsi' c'ʌñʌ, la' sujtic ti' yotot, ame chʌmic ya' ti guerra, ame ochic yambʌ i yum.

⁶Mi an juntiquil winic tsa' bʌ i pʌc'ʌ i ts'usubil maxto bʌ anic tsi' mʌc'be i wut, la' sujtic ti' yotot ame chʌmic ya' ti guerra, ame i mʌc'ben i wut yambʌ i yum.

⁷Mi an winic tsa' bʌ i c'ajti i yijñam, pero maxto anic tsi' cha'le ñujpuñel, la' sujtic ti yotot ame talic yambʌ winic i pʌy jini xch'oc tsa' bʌ i c'ajti.

⁸Mi an juntiquil winic yujil bʌ bʌq'uen ti' pusic'al, la' cha' sujtic ti' yotot cha'an ma'anic mi' bʌc'tesan jini yaño' bʌ i pi'ʌlob”. Che'ʌch yom mi' yʌlob jini año' bʌ i ye'tel.

⁹Che' ujtemix ti t'an jini año' bʌ i ye'tel, mi caj i wa'chocoñob i yaj capitañob jini soldadojob.

¹⁰Che' mi la' ñochtan jump'ejl tejclum cha'an mi la' cha'len guerra, ñaxan yom mi la' subeñob bajche' yom mi' melob cha'an ñʌch'ʌl mi' yajñelob ti la' tojlel.

¹¹Mi tsi' jac'ʌyob, mi tsi' subeyetla ochel ti tejclum, che' jini mi caj la' ch'ʌm ti la' wenta pejtel jini xchumtʌlob.

¹²Pero mi mach yomobic i jac'ob, mi wersa yomob guerra ti la' contra, che' jini yom mi la' joy mʌctañob.

¹³Lac Yum Dios mi caj i yʌc'ob ti la' wenta. Che' jini mi caj la' tsʌnsan pejtel jini winicob ti espada.

¹⁴Pero mi caj la' pʌy jini x'ixicob, yic'ot alp'eñelob, yic'ot i yʌlac'. La' cha'añʌch pejtel chuqui tac an ti tejclum. Yom mi la' laj ch'ʌm jini tsa' bʌ cʌle i cha'an la' contrajob, come tsi' yʌq'ueyetla lac Yum.

¹⁵Che'ʌch yom mi la' melbeñob jini tejclumob año' bʌ ti ñajtʌl. Mach che'ic yom mi la' melben jini tejclum tac ya' ti la' lumal yic'ot ti la' joytʌlel.

¹⁶Mach yomic mi la' p'untan mi juntiquilic la' contra ya' ba' mi la' majlel ti chumtʌl ti jini lum woli bʌ i yʌq'ueñet lac Yum.

¹⁷Pero ts'ʌcʌl yom mi la' laj jisañob: jini heteojob, yic'ot jini amorreojob, yic'ot jini cananeojob, yic'ot jini ferezeojob, yic'ot jini heveojob, yic'ot jini jebuseojob. Jiñʌch i mandar lac Yum Dios.

¹⁸Yom mi la' laj jisañob ame sojquiquetla ti yambʌ cʌntesa ts'a'lebil bʌ ti Dios, ame la' lon ñopben i melbal tac, come leco bajche' mi' melob ti' tojlel i dioste' tac. Jiñʌch ñuc bʌ mulil ti' wut lac Yum Dios.

¹⁹Che' mi la' joy mʌctan jump'ejl tejclum, che' cabʌlix ora woliyetla ti guerra cha'an mi la' ch'ʌm, mach yomic mi la' sec' jini te' tac mu' bʌ i yʌc' i wut, come yom mi la' mʌc'ben i wut. Mach yomic mi la' bic'ti tsep, come jini te' mach lajalic bajche' la' contrajob yom bʌ mi la' tsʌnsan.

²⁰A cʌñʌyʌch jini te' ti chajp ti chajp. Cojach jini te' mach bʌ yujilic ac'ol i wut mi mejlel la' sec'. Mi mejlel la' c'ʌn ti melol jini chan tac bʌ t'uchlibʌl cha'an mi la' letsel ti' ts'ajquil tejclum cha'an mi la' mʌl.