Read Chol Deuteronomio 22 Bible Online

Deuteronomio 22 - Chol bible

Deuteronomio 22

¹Mi tsa' q'uelbe i wacax mi i tiñʌme' a pi'ʌl che' sajtem, mach yomic che' jach ma' q'uel, pero yom ma' chucben majlel jini a pi'ʌl.

²Mi mach cʌñʌlic a cha'an i yum, o mi ñajt to chumul, yom ma' poj otsʌben i yʌlac' ya' ti a potrero. Ya' yom mi' c'ʌlʌ cʌytʌl jinto che' mi' c'otel i sajcan i yum. Che' jini mi caj a cha' sutq'uiben.

³Che' yom ma' mel ja'el mi i burro, mi i bujc, mi chuqui tac jach mi' sʌt a pi'ʌl. Yom ma' lotben cha'an ma' cha' aq'uen i yum.

⁴Mi tsa' q'uelbe i burro mi i wacax a pi'ʌl che' yajlem ya' ti bij, mach che'ic jach yom ma' to'ol ñumel, pero yom ma' coltan a pi'ʌl ti techol.

⁵Jini x'ixic mach yomic mi' lʌpben i bujc i wex winicob. Jini winic mach yomic mi' lʌpben i pislel x'ixicob, come ts'a'lebil ti lac Yum Dios majqui jach mi' mel che' bajche' jini.

⁶Che' woliyet ti xʌmbal ñumel ti bij mi tsa' q'uelbe i c'u' mut ti' t'ejl bij, mi ti lum, mi ti' c'ʌb te', mi ya'an i tun, mi i yalix, mi pʌctʌbil to i cha'an i ña', mach yomic ma' chucben i ña yic'ot i yal.

⁷Yom ma' col majlel i ña'. Cojach i yal mi mejlel a pʌy cha'an uts'at chuqui mi' yujtel ti a tojlel, cha'an mi' ñajtan a jabilel.

⁸Che' ma' mel tsiji' bʌ a wotot, yom ma' joy ts'ajquiben i jol ya' ba' mi la' letsel ame yajlic juntiquil, ame anic a mul che' jini.

⁹Mach yomic ma' pʌc' a ts'usub ba'an yambʌ pʌc'ʌbʌl cha'an ma'anic mi' junyajlel sajtel a we'tel ti multa che' mi' tilelob año' bʌ i ye'tel i lu' chilbeñetob jini ts'usub yic'ot jini pʌc'ʌbʌl ja'el.

¹⁰Mach yomic temel ma' c'ʌn ti top' lum jini wacax yic'ot burro.

¹¹Mach yomic ma' jal cha'chajp puy ti' melol pisil. Mach yomic i tsutsel tiñʌme' temel yic'ot lino.

¹²Che' ma' mel rebozo cha'an ma' bʌc' a bʌ, yom ma' ts'is jaxbil bʌ puy ya' ti jujump'ejl i xujc.

¹³Che' an juntiquil mu' bʌ i pʌy x'ixic cha'an i yijñam, che' bʌ tsa'ix i pi'le mi tsa' caji i jop'ben i mul,

¹⁴mi tsa' to'ol caji i payxo sajcʌben i mul, mi tsi' yʌlʌ: “Mach xch'oquix ili x'ixic che' bʌ tsac teche c pi'len”, mi che'en.

¹⁵Che' jini la' tilicob i tat i ña' jini xch'oc. La' i pʌsob i yejtal i ch'oclel ti' tojlel i wutob jini xñoxob ya' ti tejclum.

¹⁶I tat jini xch'oc mi caj i subeñob jini xñoxob ya' ti tejclum: “Joñon tsa cʌq'ue calobil ili winic cha'an i yijñam. Wʌle wolix i ts'a'len.

¹⁷Wolix i payxo sajcʌben i mul. Woli' yʌl: Mach xch'oquix tsac taja a walobil, che'en, pero q'uelbenla i yejtal i ch'oclel jini calobil”, che'en. Che' jini muq'uix i t'ʌsben i pislel jini xch'oc bʌ i yalobil ti' tojlel jini xñoxob.

¹⁸Jini xñoxob muq'uix i chucob jini winic cha'an mi' jats'ob ti pʌchi.

¹⁹Muq'uix i yʌq'ueñob i toj multa uxbajc' peso (1,200). Wersa mi caj i yʌq'uen i tat jini xch'oc, come tsa'ix i lon to'ol ac'ʌ ti quisin jini xch'oc ti' tojlel jini israelob. Jini cha'an mi caj i cʌytʌl cha'an i yijñam. Mach mejlic i choc loq'uel ti' yotot ti pejtelel ora.

²⁰Pero mi isujmʌch jini t'an cha'an mach xch'oquix tsi' taja,

²¹che' jini an ti' wenta jini winicob ya' ti tejclum cha'an mi' chucob majlel ya' ti' ti' yotot i tat cha'an mi' julob ti xajlel. Che' jini mi' caj ti chʌmel cha'an tsa'ix i mele chuqui leco ti' tojlel Israel, come tsi' cha'le i ts'i'lel ti' yotot i tat. Che' jini mi' caj ti lajmel jontolil ti la' tojlel.

²²Mi tsa' tajle winic ñolol yic'ot x'ixic am bʌ i ñoxi'al, la' laj chʌmicob, jini winic yic'ot jini x'ixic, cha'an mi' jilel chuqui leco ti' tojlel Israel.

²³Mi an juntiquil xch'oc c'ajtibilix bʌ i cha'an winic, mi tsa' c'oti yambʌ winic ya' ba'an ti' mal tejclum, mi tsa' xʌ caji ti ñoltʌl yic'ot,

²⁴che' jini yom mi la' laj bʌ chucob loq'uel ya' ti' ti' jini tejclum cha'an mi la' julob ti xajlel. Mi caj i chʌmel jini xch'oc ti' caj cha'an ma'anic tsi' cha'le oñel ya' ti mal tejclum. Mi caj i chʌmel jini winic ti' caj cha'an tsi' pi'le jini c'ajtibilix bʌ xch'oc. Che'ʌch yom mi la' jisan jontolil ti la' tojlel.

²⁵Pero mi tsi' wersa pi'le xch'oc juntiquil winic che' an ti cholel, wersa yom mi' chʌmel jini winic, come tsi' tic'la jini xch'oc.

²⁶Pero jini xch'oc ma'anic chuqui mi caj la' tumben, come ma'anic i mul cha'an mi' chʌmel, come lajal tsi' yubi i tic'lʌntel che' bajche' juntiquil mu' bʌ i tsʌnsʌntel che' ma'anic i mul.

²⁷Come jini winic tsi' taja ya' ti cholel. Jini xch'oc tsi' cha'le oñel pero ma'anic majch tsi' yubibe i yoñel cha'an mi' coltan.

²⁸Mi mach c'ajtibilic jini xch'oc, mi tsi' taja winic mi tsa' caji ti ñoltʌl yic'ot cha'an mi' pi'len, mi an majqui tsi' q'uele,

²⁹jini winic tsa' bʌ ñole yic'ot jini xch'oc muq'uix i yʌq'uen lujump'ejl i yuxc'al sʌsʌc taq'uin i tat jini xch'oc. Pero jini winic muq'uix i pʌy jini xch'oc come tsa'ix i pi'le. Mach mejlic i choc loq'uel ti pejtelel ora che' cuxulob to.

³⁰Mach a pʌyben i yijñam a tat come i pi'ʌlʌch a tat. Mach a wʌc' ti quisin a tat.