Read Chol Deuteronomio 23 Bible Online

Deuteronomio 23 - Chol bible

Deuteronomio 23

¹Mach mejlic ti ochel ya' ti' tejclum lac Yum jini mach bʌ wenix i winiclel.

²Mi tsi' cha'le i tsi'lel winic mi x'ixic, mi tsa' tili i yalobil, mach mejlic ti ochel i yalobil ti' yotot lac Yum c'ʌlʌl ti lujunlajm i p'olbal.

³Mach mejlic ti ochel ja'el jini amoñob yic'ot moabob ya' ti' yotot lac Yum c'ʌlʌl ti lujunlajm i p'olbal.

⁴Come ma'anic tsi' ch'ʌmbeyetla tilel i bʌl la' ñʌc' ya' ti bij che' bʌ tsa' loq'uiyetla ti Egipto. Tsi' yʌq'ueyob i majtan jini Balaam (i yalobil Beor am bʌ ti Petor ti Mesopotamia) cha'an mi' p'ajetla.

⁵Lac Yum Dios ma'anic tsi' ñich'tʌbe i t'an Balaam. Tsi' yʌq'ueyetla i yutslel i pusic'al ti' q'uexol i p'ajoñel Balaam, come c'ux mi' yubiñetla lac Yum Dios.

⁶Mach yomic mi la' coltan jini amoñob yic'ot jini moabob ti pejtelel ora.

⁷Mach yomic mi la' ts'a'len jini edomob, come la' pi'ʌlob. Mach mi la' ts'a'len jini egiptojob, come ti yambʌ ora ya' chumuletla ti' lumal.

⁸I yuxlajmlel i yalobilob mi' mejlel ti ochel ti' yotot lac Yum.

⁹Che' mi la' loq'uel ti guerra, yom tsajiletla cha'an mi la' cʌntan la' bʌ ti pejtelel chuqui tac leco. Mi an juntiquil ti la' tojlel mach bʌ sʌquic cha'an ti caj tsa' to'ol tili chuqui leco ti' winiclel che' ti ac'ʌlel, yom mi' loq'uel ya' ba' añetla.

¹¹Yom mi' tʌts' i bʌ ti' tojlel jini much'quibilo' bʌ winicob jinto mi' bʌjlel q'uin. Che' ti ic'ajel yom mi' cha'len ts'ʌmel. Ti wi'il mi' mejlel ti cha' ochel ya' ba' añetla.

¹²Yom mi la' mel jump'ejl ajñibʌl ya' ba' mi la' majlel che' mi la' loq'uel ti' tojlel la' pi'ʌlob.

¹³Ti jujuntiquiletla yom alʌ pala yic'ot e'tijibʌl la' cha'an, cha'an ma' c'ʌn a pic jini lum ba' ma' cha'len wutstʌl. Che' ujtemetix ti wutstʌl ti paxiyal, yom ma' mujlan ti lum.

¹⁴Come ya'ʌch an lac Yum Dios la' wic'ot baqui mi la' majlel cha'an mi' coltañetla, cha'an mi' yʌq'ueñetla ti la' c'ʌb jini la' contrajob. Jini cha'an sʌc yom ya' ba' mi la' much'quin la' bʌ, cha'an ma'anic chuqui bibi' ya'i, ame i tʌts' i bʌ lac Yum ti la' tojlel.

¹⁵Mi tsa' c'oti ti puts'el juntiquil x'e'tel ti la' tojlel, mach yomic ma' cha' pʌy majlel ba'an i yum.

¹⁶Yom ma' wʌc' ti chumtʌl ya' ti a lum baqui mi' mulan. Mach yomic ma' tic'lan.

¹⁷Jini x'ixic yic'ot winic israelo' bʌ, mach yomic mi' choñob i bʌ ti ts'i'lel che' bajche' mi' melob jini mu' bʌ i ch'ujutesañob dioste' tac.

¹⁸Mach yomic ma' ch'ʌm tilel i tojol i ts'i'lel x'ixic mi i tojol i ts'i'lel winic cha'an ma' toj a bet ti' yotot lac Yum Dios, come ts'a' mi' q'uel lac Yum Dios majqui jach mi' mel che' bajche' jini.

¹⁹Che' an chuqui ma' wʌq'uen ti majan juntiquil a pi'ʌl, mi taq'uin mi i bʌl i ñʌc' mi yambʌ an tac bʌ i c'ʌjñibal mach yomic ma' wersa c'ajtin i jol taq'uin. Cojach jini parte bʌ mach bʌ israelic mi mejlel a wersa c'ajtiben i jol taq'uin, pero a pi'ʌl mach mejlic a ch'ʌmben i jol taq'uin. Che' jini mi caj i coltañet lac Yum Dios ti pejtelel mu' bʌ la' mel ti jini lum woli bʌ i yʌq'ueñet ba' ma' majlel ti chumtʌl.

²¹Che' ma' suben lac Yum Dios chuqui mi caj a cha'len, yom ma' mel ti ora, ame wersajic ma' mel a bʌ ti' tojlel lac Yum Dios, come mulilʌch mi ma'anic tsa' ts'ʌctesa.

²²Pero mi ma'anic tsa' wʌc'ʌ a t'an cha'an chuqui mi caj a mel, ma'anic a mul.

²³Pero mi tsa' wʌc'ʌ a t'an, yom chʌn c'ajal a cha'an cha'an ma' ts'ʌctesan, come tsa'ix a sube lac Yum Dios. Jini cha'an yom ma' mel jini tsa' bʌ a wʌlʌ.

²⁴Che' ma' wochel ti' ts'usubil a pi'ʌl ti chumtʌl, mi mejlel a mʌc'ben i ts'usub jinto ma' ñaj'an, pero mach yomic ma' tuc' sujtel ti a wotot.

²⁵Che' ma' wochel ti tuc' trigo ya' ti' pʌc'ʌb yambʌ i yum, mi mejlel a boc ti a c'ʌb, pero mach mejlic a tsep yic'ot machit che' a wom a c'ux. Jasʌl cha'mujch' uxmujch'.