Read Chol Deuteronomio 24 Bible Online

Deuteronomio 24 - Chol bible

Deuteronomio 24

¹Che' an winic tsa' bʌ i pʌyʌ i yijñam, mi ma'anic tsa' caji i mulan cha'an ti caj an chuqui leco tsi' q'uele ti' tojlel, mi mach yomix i q'uel, wersa mi yʌc' ti melol i juñilel cha'an mi' cʌyob i bʌ. Che' jini muq'uix i choc loq'uel ti yotot.

²Che' loq'uemix jini x'ixic ti' tojlel jini winic, mi mejlel ti ñujpuñel yic'ot yambʌ winic.

³Mi tsi' cha' choco loq'uel jini wi'ilix bʌ i ñoxi'al, mi tsi' cha' aq'ue i juñilel cha'an mi' cʌyob i bʌ, mi tsi' choco loq'uel ti' yotot, o mi tic'ʌl tsa' chʌmi jini winic che' anto yic'ot jini x'ixic,

⁴mach mejlix i chʌn pʌy jini x'ixic jini ñaxan bʌ i ñoxi'al cha'an mi' chʌn ñoxi'alin, come tsa'ix ajni yic'ot yambʌ winic. Bibi'ix ti' wut lac Yum. Ts'a' mi' q'uel lac Yum. Mach ma' mel chuqui leco ti jini lum woli bʌ i yʌq'ueñetla lac Yum Dios.

⁵Che' ujtel jax to ti ñujpuñijel juntiquil winic, mach mejlic ti loq'uel majlel ti guerra. Mach yomic ma' wa'chocon ti e'tel, pero yom jump'ejl jab mi' yajñel ya' ti' yotot cha'an mi' tijicñesan i pusic'al yic'ot jini xch'oc tsa' bʌ i pʌyʌ.

⁶Mach yomic ma' ch'ʌmben i yej molino cha'an i q'uexol chuqui ma' wʌc' ti majan, come lajalʌch bajche' woli a ch'ʌmben i ch'ujlel i yum.

⁷Mi tsa' taja juntiquil am bʌ i mul cha'an tsi' xujch'i yambʌ, mi ch'iton mi xch'oc ti' tojlel israelob, mi tsi' yʌc'ʌ ti majtan e'tel, yic'ot mi tsi' choño, wersa yom mi' chʌmel jini xujch'. La' jilic ti la' tojlel jini yujil bʌ melol che' bajche' jini.

⁸Tsajin a bʌ che' an juntiquil am bʌ leco bʌ i tsoy. Yom ma' jac'ben i t'an motomajob levíjob, cha'an ts'ʌcʌl ma' mel bajche' mi' subeñetob. Come tsa'ix cʌq'ueyob mandar bajche' yom melol.

⁹Ña'tan chuqui tsi' mele lac Yum Dios ti' tojlel Miriam che' bʌ loq'uemetix la ti Egipto.

¹⁰Che' an i bet a pi'ʌl mach yomic ma' wochel ti' yotot cha'an ma' ch'ʌm loq'uel i chubʌ'an cha'an i q'uexol i bet.

¹¹Yom jach ma' wa'tʌl ti' ti' i yotot jini winic jinto mi' yʌq'ueñet i q'uexol.

¹²Mi wen p'ump'un jini winic, mi tsi' yʌq'ueyet i bujc cha'an ti' caj i bet, mach ma' c'ʌn ti wʌyel.

¹³Che' maxto bʌjlemic q'uin, yom ma' cha' sutq'uiben i pislel cha'an mi' c'ʌn ti wʌyel. Che' jini uts'at mi caj i q'uelet. Uts'at mi caj i q'uelet ja'el lac Yum Dios.

¹⁴Mach yomic ma' p'ump'un tic'lan a winic cha'an p'ump'un, mi a pi'ʌlʌch o mi ñajt bʌ ch'oyol tsa' bʌ tili ti chumtʌl ti a tejclum.

¹⁵Ti jujump'ejl q'uin che' ts'ʌctiyemix i ye'tel, yom ma' wʌq'uen i tojol che' maxto bʌjlemic q'uin, come p'ump'uñʌch. Tsa'ix i ña'ta ti' pusic'al cha'an mux caj i taj. Machic ma' wʌq'uen, mux caj i pejcan lac Yum cha'an jontolet. Che' jini mi caj a taj a mul.

¹⁶Mach ma' wʌc' ti chʌmel jini tatʌlob cha'an ti caj i mul i yalobilob, mi jini alobob cha'an i mul i tat, come jujuntiquil i bajñel mi' caj ti chʌmel cha'an i bajñel mul.

¹⁷Mach yomic ma' tic'lan jini mach bʌ mero anic i lumal ti la' tojlel yic'ot jini meba'o' bʌ. Mach yomic ma' ch'ʌmben i pislel jini meba' x'ixic cha'an i q'uexol i bet.

¹⁸Yom ma' chʌn ña'tan bajche' añet ti yambʌ ora che' mozojet ya' ti' lumal Egipto. Lac Yum Dios tsi' loc'sayet ya'i. Jini cha'an che'ʌch yom ma' mel bajche' mic subeñet.

¹⁹Che' ma' tuc a trigo ya' ti' yajñib, mi tsa' cʌyʌ junsejm jini a trigo, mach chʌn majliquet a ch'ʌm tilel. La'ix cʌlec cha'an mi' ch'ʌm jini ñajt bʌ ch'oyolob, yic'ot jini meba'ob, yic'ot jini meba' x'ixicob. Che' jini lac Yum Dios mi caj i coltañet ti pejtelel a we'tel mu' bʌ a mel.

²⁰Che' ma' tujc'an majlel jini te' i c'aba' olivo, mach yomic ma' cha' sʌclʌben i wut tsa' bʌ cʌle. La' cʌlec cha'an jini ñajt bʌ ch'oyolob, yic'ot jini meba'ob, yic'ot meba' x'ixicob.

²¹Che' ma' tuc' a ts'usub, mach yomic ma' laj tuc' ti pejtelel. Yom ma' cʌybeñob jini ñajt bʌ ch'oyolob, yic'ot jini meba' alʌlob, yic'ot meba' x'ixicob.

²²Ña'tan bajche' añet ti yambʌ ora che' mozojet ti' lumal Egipto. Jini cha'an che'ʌch yom ma' mel bajche' mic subeñet.