Read Chol Deuteronomio 25 Bible Online

Deuteronomio 25 - Chol bible

Deuteronomio 25

¹Che' woliyob ti leto cha'tiquilob, che' mi' majlel i melob i bʌ ba'an jini juez, an ti' wenta jini juez cha'an mi' tsictesan ti toj jini mach bʌ anic i mul. Mi caj i yʌq'uen i toj i mul jini tsa' bʌ i mele mulil.

²Mi wersa yom mi' yubin asiyal jini am bʌ i mul, jini juez muq'uix i yʌc' ti ñoltʌl ti lum cha'an mi' jats' ti asiyal. Che'ʌch bajche' c'amel i mul mi caj i jajts'el.

³Mi mejlel i yubin asiyal cha'c'al ti yajl, pero mach yomic i ñumel, ame muq'uic i cʌlʌx peq'uesʌntel ti' tojlel i pi'ʌlob.

⁴Mach yomic ma' wʌq'uen i bosal wacax mu' bʌ i t'uchtan loq'uel i wut trigo.

⁵Mi tsa' chʌmi winic, mi ma'anic i yalobil i yijñam tsa' bʌ cʌle ti meba, pero mi an i pi'ʌlob lajal bʌ i c'aba', mach i cha' pʌy jini x'ixic yambʌ winic parte bʌ i c'aba'. La' tilic i mu' jini x'ixic cha'an mi' pʌy cha'an i yijñam.

⁶Jini ñaxan bʌ i yalobil mu' bʌ i yilan pañimil yom mi' yotsʌbentel i c'aba' jini ñaxan bʌ i ñoxi'al jini x'ixic cha'an ma'anic mi' junyajlel jilel i c'aba' jini winic ti' tojlel israel.

⁷Pero mi mach yomic i pʌyben i yijñam i yeran jini winic, jini x'ixic muq'uix i majlel ya' ba'an jini xñoxob cha'an mi' subeñob: “Jini c mu' mach yomic i pʌyon cha'an mi' yʌq'ueñon ch'iton bʌ calobil cha'an mi' ch'ʌmben i c'aba' c ñoxi'al ti Israel”, che'en.

⁸Jini xñoxob ya' ti tejclum muq'uix i chocob ti pʌyol jini winic cha'an mi' pejcañob. Mi wersa mach yomic i pʌy i mu' mi tsi' yʌlʌ: “Mach comic c pʌy”, mi che'en,

⁹jini x'ixic muq'uix i majlel ya' baqui an jini winic ti' tojlel jini xñoxob. Muq'uix i loc'sʌben i zapato ti' yoc i mu'. Jini x'ixic mi caj i tujbʌben i wut i mu'. Mi caj i suben: “Che'ʌch mi' mejlel ti' tojlel jini winic mach bʌ yomic i q'uextʌben i c'aba' i yeran ti' tojlel israelob”, che'en.

¹⁰Jini israelob mi caj i yotsʌbeñob i c'aba i yotot ili winic: I yotot jini tsa' bʌ jochbenti i xʌñʌb, che'ob.

¹¹Mi woli' contrajiñob i bʌ cha'tiquil winicob, mi tsa' tili i yijñam juntiquil, mi tsi' chucbe i contra ya ti' winiclel,

¹²wersa yom ma' tsepben i c'ʌb jini x'ixic. Mach ma' p'untan.

¹³Ti pejtelel ora che' mi la' cha'len mʌñoñel yic'ot choñoñel, yom ts'ʌcʌl la' p'isoñib. Toj yom mi la' p'is. Che' jini mi caj i tam'esʌntel la' jabilel wʌ' ti jini lum woli bʌ i yʌq'ueñetla lac Yum.

¹⁶Come ts'a' mi' q'uel lac Yum pejtel mu' bʌ i melob chuqui leco.

¹⁷Ña'tanla chuqui tsi' melbeyetla Amalec ya' ti bij, che' woliyetla ti loq'uel ti Egipto.

¹⁸Tsa' loq'uiyob i tajetla ya' ti bij. Tsi' laj bʌc'tesayob jini c'uño' bʌ soldadojob woli bʌ i majlelob ti la' pat che' wen lujbeñetixla cha'an cabʌl xʌmbal. Ma'anic tsi' wis bʌc'ñayob lac Yum.

¹⁹Jini cha'an che' mi' yʌq'ueñetla c'aj o lac Yum ti' tojlel pejtel la' contrajob ya' ba' mi la' majlel ti chumtʌl ti jini lum mu' bʌ i yʌq'ueñetla, yom mi la' junyajlel jisan jini amalecob. Mach yomic mi' ñajʌyel la' cha'an.