Read Chol Deuteronomio 26 Bible Online

Deuteronomio 26 - Chol bible

Deuteronomio 26

¹Che' ochemetix la ti chumtʌl ti la' lum mu' bʌ i yʌq'ueñetla lac Yum Dios,

²che' jini yom ma' loc'san pejtelel jini ñaxan tac bʌ i wut a pʌc'ʌb ya' ti a lum tsa' bʌ i yʌq'ueyetla lac Yum Dios. Yom ma' wotsan ti a chiquib, cha'an ma' ch'ʌm majlel ya' ti ajñibʌl yajcʌbil bʌ i cha'an lac Yum Dios ya' ba' yom ajñel la' wic'ot ba' mi' yʌc' ti cʌjñel i c'aba'.

³Che' ma' c'otel ba'an jini motomaj am bʌ i ye'tel ti jim bʌ ora, mux caj a suben: “Wolix c tsictesan wʌle ti' c'aba' lac Yum Dios cha'an tsa'ix ochiyon wʌ' ti lum tsa' bʌ i yʌq'ueyonla che' bajche tsi' wʌn subeyob lac ñojte'el”. Che'ʌch yom ma' suben.

⁴Jini motomaj muq'uix i ch'ʌm jini chiquib am bʌ ti a c'ʌb cha'an mi' yʌc' ya' ti pulʌntib i cha'an lac Yum Dios.

⁵Che' jini yom ma' sub a bʌ ti' tojlel lac Yum Dios: “Jini c tat jiñʌch arameo tsa' bʌ jubi majlel ti Egipto, yic'ot winico' bʌ i yalobilob che' wi'ñayobix, che' ma'anic jaytiquilob. Tsa' chumleyob ya'i jinto tsa' wen p'ojliyob. Tsa' ajniyob ti colem tejclum.

⁶Jini egiptojob tsa' caji' p'ump'un tic'lañonla. Tsi' yʌc'ʌyonla ti mel pusic'al. Cabʌl tsi' yʌc'ʌyonla ti to'ol e'tel.

⁷Che' jini c'am tsa' lac pejca lac Yum Dios, i Dios lac ñojte'elob. Lac Yum tsi' yubibeyon lac t'an. Tsi' q'uele lac wocol che' añonla ti mozo cha'an majtan e'tel.

⁸Jini cha'an lac Yum tsi' loc'sayonla ti Egipto ti ñuc bʌ i p'ʌtʌlel. I bajñel tsi' coltayonla yic'ot bʌbʌq'uen tac bʌ i yejtal i p'ʌtʌlel tsa' bʌ i pʌsbeyonla.

⁹Tsi' pʌyʌyonla tilel ilayi. Tsi' yʌq'ueyonla jini lum wʌ' ba' chumulonla. Wen yujil colel pejtelel pʌc'ʌbʌl. Mi' yʌq'ueñonla lech yic'ot chab.

¹⁰Jini cha'an wʌle tsac ch'ʌmʌ tilel ili ñaxan bʌ i wut c pʌc'ʌb ti a tojlel, c Yum”. Che' yom ma' suben lac Yum. Ya' yom ma' wʌc' ti' tojlel lac Yum Dios. Yom ma' ch'ujutesan lac Yum Dios.

¹¹Yom ma' wen tijicñesan a pusic'al cha'an pejtelel i bendición lac Yum tsa' bʌ i yʌq'ueyet temel yic'ot pejtelel jini año' bʌ ti a wotot, yic'ot levíjob, yic'ot jini ñajt bʌ ch'oyolob ya' bʌ añob a wic'ot.

¹²Che' ujtemix a wʌc' pejtelel a diezmo che' ti yuxp'ejlel jab, jiñʌch i yorajlel diezmo tac yom bʌ ma' t'oxbeñob levíjob, yic'ot jini ñajt bʌ ch'oyolob, yic'ot meba' alʌlob, yic'ot meba' x'ixicob. Mi caj i c'uxob ti xchumtʌl tac ba' añetla jinto che' tijicñayobix cha'an ñajobix.

¹³Che' jini mi caj a wʌl ti' wut lac Yum: “Tsa'ix c loc'sa c diezmo ti cotot. Tsa'ix cʌq'ueyob jini levíjob, yic'ot jini ñajt bʌ ch'oyolob, yic'ot meba' alʌlob, yic'ot meba' x'ixicob che' bajche' tsa' subeyon ti mandar. Ma'anic tsac ñusʌbeyet a t'an. Ma'anic tsa' ñajʌyi c cha'an.

¹⁴Ma'anic tsaj c'uxu a cha'an bʌ che' woliyon ti uc'taya. Ma'anic tsac tʌlʌ che' bibi'on. Ma'anic tsa cʌq'ue jini ch'ujlelʌlob. Tsa'ix c mele che' bajche' tsa' subeyon.

¹⁵C Yum añet bʌ ti panchan jini Ch'ujul bʌ Ajñibʌl, yom ma' q'uelon. Coltan pejtelel a tejclum ti Israel. Yom ma' wʌq'uen i wenlel jini lum tsa' bʌ a wʌq'ueyon lojon che' bajche' tsa' wʌn sube c ñojte'el lojon. Jiñʌch wen bʌ lum ba' mi' colel pejtelel pʌc'ʌbʌl. Mi' yʌq'ueñon lech yic'ot chab”. Che'ʌch yom ma' suben.

¹⁶Lac Yum Dios wolix i subeñet wʌle cha'an ts'ʌcʌl yom ma' jac'ben i t'an yic'ot i mandar. Yom wen tsajalet cha'an ts'ʌcʌl ma' mel ti pejtelel a pusic'al, yic'ot pejtelel a ña'tʌbal.

¹⁷Tsa'ix a tsictesa sajmʌl, jiñʌch a Dios jini lac Yum. Tsa'ix a wʌc'ʌ a t'an cha'an muq'uix cajel a chʌn tsajcan majlel. Muq'uix caj a jac'ben i mandar yic'ot i t'an yic'ot a tic'ol. Muq'uix cajel a wen ubiben i t'an.

¹⁸Tsa'ix i yʌc'ʌ i t'an lac Yum ja'el. Tsa'ix i yʌlʌ sajmʌl cha'an i tejclumet che' bajche' tsi' wʌn subeyet. Jini cha'an mi caj a jac'ben pejtel i mandar.

¹⁹Che' jini mi caj i ñumen aq'uetla ti ñuc cha'an ñumen mi la' taj la' c'uxbintel yic'ot la' wenlel ti' tojlel yambʌ tejclum tac. Mi caj la' wochel ti ch'ujul bʌ i tejclum lac Yum Dios che' bajche' tsi' yʌlʌ.