Read Chol Deuteronomio 28 Bible Online

Deuteronomio 28 - Chol bible

Deuteronomio 28

¹Mi uts'at ma' wubiben i t'an lac Yum Dios, mi ts'ʌcʌl ma' mel pejtel jini mandar woli bʌ c subeñetla wʌle, lac Yum Dios mi caj i ñumen aq'uet ti ñuc ti' tojlel pejtel yan tac bʌ tejclum ti pañimil.

²Mi caj a taj pejtel ili bendición, mi xuc'ul ma' ch'ujbiben i t'an lac Yum Dios: Uts'at mi caj a wajñel ila ti tejclum, yic'ot ti a lum. Uts'at mi caj i p'ojlelob a walobilob, yic'ot i wut a pʌc'ʌb, yic'ot i yal pejtelel a wʌlac', wacax yic'ot tiñʌme'. Uts'at pejtel mu' bʌ a wʌc' ti a chiquib, yic'ot jini mu' bʌ a juch' cha'an ma' c'ux. Uts'at chuqui mi caj a taj che' ma' loq'uel ti a we'tel yic'ot che' ma' cha' ochel.

⁴

⁵

⁶

⁷Lac Yum mi caj i yʌc' ti jilel a contrajob. Jump'ejl bij mi caj i tilelob i contrajiñet, wucp'ejl bij mi caj i pujquelob majlel che' mi' puts'tañetob.

⁸Lac Yum mi caj i yʌq'ueñet i bendición ti' yotlel a trigo. Ti pejtelel chuqui tac ma' mel ti a c'ʌb mi caj i wen aq'ueñet i bendición lac Yum Dios ya' ti a lum woli bʌ i yʌq'ueñet.

⁹Lac Yum mi caj i wa'chocoñet ti ch'ujul bʌ i tejclumet che' bajche' tsi' wʌn alʌ, mi ts'ʌcʌl ma' jac'ben i mandar lac Yum Dios cha'an ma' cha'len xʌmbal ti' bijlel.

¹⁰Che' jini pejtel jini yambʌ tejclum tac mi caj i q'uelob ñucʌch i p'ʌtʌlel lac Yum ti la' tojlel. Jini cha'an mi caj i bʌc'ñañet come i cha'añetla lac Yum.

¹¹Lac Yum mi caj i wen p'ojlesan a walobilob, yic'ot a wʌlac' tac, yic'ot i wut a pʌc'ʌb ya' ti a lum mu' bʌ caj i yʌq'ueñet che' bajche' tsi' wʌn subeyob a ñojte'elob.

¹²Lac Yum mi caj i loc'sʌbeñet jini uts'at bʌ lotol bʌ ti panchan cha'an mi' coltañet. Mi caj i choc jubel ja'al ya' ti a lum che' ti yorajlel, cha'an mi' colel pejtelel jini tsa' bʌ a pʌc'ʌ. Mi caj a wʌq'uen ti majan yan tac bʌ tejclum, pero jatet ma'anic ma' cajel ti majan.

¹³Lac Yum mi caj i yʌq'uetla ti ñaxan ti' tojlel a pi'ʌlob, mach ti wi'ilic. Mi caj a wajñel ti' pam, mach ti yebalic, mi xuc'ul ma' chʌn jac'ben i mandar lac Yum Dios woli bʌ c subeñetla wʌle.

¹⁴Mach yomic ma' wis cʌy ili t'an woli bʌ c subeñet wʌle ame sajtiquet ti yambʌ bij, ame muq'uic a ch'ujutesan jini dioste' tac am bʌ ti pañimil.

¹⁵Mi mach a womic a wubiben i t'an lac Yum Dios, mi tsa' ñusʌbe i t'an yic'ot i mandar woli bʌ c subeñetla wʌle, mi caj i c'otel ti a tojlel pejtel ili wocol tac: Wocol jax mi caj a ñusan q'uin ya' ti a lum yic'ot ya' ti tejclum. Ma'anix mi caj i chʌn bujt'el a chiquib. Mach jasʌlic chuqui ma' juch' cha'an ma' c'ux. Ma'anix mi' cajelob ti wen colel a walobilob. Ma'anix mi' caj ti colel a pac' ti lum. Ma'anix mi' caj ti p'ojlel a wacax yic'ot a tiñʌme'. Bʌbʌq'uen jax baqui ma' majlel, yic'ot che' ma' cha' sujtel.

²⁰Lac Yum mi caj i chocbeñet tilel wocol yic'ot wi'ñal. Wocol jax mi caj a wubin c'ʌlʌl jinto ma' jisʌntel, cha'an ti' caj jontol bʌ a melbal cha'an tsa' cʌyʌ lac Yum.

²¹Lac Yum mi caj i choc tilel cabʌl chʌmel ti a tojlel c'ʌlʌl jinto ma' sʌc jilel ya' ti lum baqui ma' majlel ti chumtʌl.

²²Mi caj i yʌq'ueñet lac Yum jini leco bʌ ojbal i c'aba' labi ojbal, yic'ot jontol bʌ c'ajc, yic'ot sijt'el tac, yic'ot yujil bʌ lejmel ti a bʌc'tal, yic'ot i yuchlel a pʌc'ʌb, yic'ot jajmel, c'ʌlʌl jinto ma' laj jilel.

²³Jini panchan am bʌ ti chan lajal mi caj a q'uel che' bajche' lamina, yic'ot jini lum baqui añetla lajal mi caj a q'uel bajche' fierro.

²⁴Lac Yum mi caj i choc jubel ts'ubejn i wenta ja'al c'ʌlʌl jinto ma' laj jilel.

²⁵Lac Yum mi caj i yʌq'uet ti puts'el ti' wutob a contrajob. Junts'ijt bij mi caj a loq'uel a taj a contra. Wucp'ejl bij mi caj a majlel ti puts'el ti' tojlel. P'ump'un jax mi caj a tic'lʌntel ti jujump'ejl a lumal.

²⁶Che' ma' chʌmel, jini xta'jol yic'ot bajlum mi caj i c'ux a bʌc'tal. Ma'anix majqui mi caj i nijcan loq'uel che' woli' c'ux.

²⁷Lac Yum mi caj i yʌq'ueñet jini leco bʌ tsoy am bʌ ti Egipto, yic'ot jini chʌcajl tac, yic'ol sal, yic'ot leco tac bʌ tsoy mach bʌ anix i ts'ʌcal.

²⁸Lac Yum mi caj i soc a jol. Mi caj i yʌp a wut. Ma'anix mi caj a ña'tan baqui ma' majlel.

²⁹Ti xinq'uiñil lajlaña mi caj a tʌl pañimil che' bajche' mi' mel jini xpots' ti ac'ʌlel. Ma'anic mi caj a seb c'otel baqui a wom majlel. P'ump'un mi caj a tic'lʌntel ti pejtelel ora. Mi caj i jilel a chubʌ'an ti xujch'. Ma'anic majqui mi caj i coltañet.

³⁰Mi caj a lon c'ajtin a wijñam. Yambʌ winic mi caj i ñoltʌl yic'ot. Mi caj a lon wa'chocon a wotot. Ma'anic mi caj a c'ʌn. Mi caj a lon pʌc' a ts'usub. Ma'anic mi caj a mʌc'ben i wut.

³¹Ti' tojel a wut mi caj i tsʌnsʌntel a wacax. Ma'anic mi caj a wʌq'uentel mi ts'ita'ic chuqui ma' c'ux. Jini a burro muq'uix i pʌjyel majlel che' woli a q'uel. Ma'anix mi caj a chʌn sutq'uibentel. Jini a contrajob mi caj i ch'ʌmob a tiñʌme'. Ma'anix majch mi caj i coltañet.

³²Jini ch'iton yic'ot xch'oc bʌ a walobilob mi caj i pʌjyelob majlel ti yambʌ tejclum che' wola' q'uel. Ma'anix mi caj a chʌn q'uelob. C'ux mi caj a wubin. Ma'anix a p'ʌtʌlel cha'an ma' coltañob.

³³Pejtelel i wut a pʌc'ʌb mi caj i c'uxob yambʌ tejclumob mach bʌ a cʌñʌyic. P'ump'un jax mi caj a tic'lʌntel ti pejtelel ora.

³⁴Tonto jax mi caj a majlel cha'an pejtelel jini mu' bʌ a q'uel.

³⁵Lac Yum mi caj i yʌq'ueñet tsoy an tac bʌ i pujwil ti a woc c'ʌlʌl ti a xinjol. Mach i ñopoyic ts'ac.

³⁶Lac Yum mi caj i pʌyet majlel temel yic'ot a rey wa'chocobil bʌ a cha'an. Mi caj i yʌq'uet ti' wenta yambʌ tejclum ba' ma'anic a cʌñʌ bʌ, ba' ma'anic tsi' cʌñʌ a ñojte'elob. Ya'i mi caj a ch'ujutesan yan tac bʌ dios melbil bʌ ti te' yic'ot ti xajlel.

³⁷Bʌbʌq'uen mi caj a wubin. Mi caj i wajleñetob. Mi caj i ts'a'leñetob jini winicob x'ixicob ti yan tac bʌ tejclum, ya' ba' mi caj i pʌyet majlel lac Yum.

³⁸Che' ti yorajlel pac' wen on mi caj a cuch majlel la' pac', pero ts'ita' jach mi caj a c'aj, come jini sajc' mi caj i jisan.

³⁹Mi caj a pʌc' a ts'usubil. Mi caj a wen q'uel, pero ma'anic mi caj a wis jap. Ma'anic mi caj a tuc', come jini motso' mi caj i laj c'ux.

⁴⁰Cabʌl la' cha'an olivote', pero ma'anic mi caj a c'ʌmben i yetsel cha'an ma' bon a bʌ, come i wut mi' caj ti laj yajlel.

⁴¹Mi caj a cosan ch'iton yic'ot xch'oc bʌ a walobilob, pero ma'anic mi caj i yajñelob a wic'ot, come mi caj i cʌjchelob majlel.

⁴²Jini xc'ajba sajc' mi caj i laj jisan pejtelel a te' tac yic'ot a pʌc'ʌb.

⁴³Jini ñajt bʌ ch'oyolob ya' bʌ chumulob ti a lum wen chan mi caj i melob i bʌ ti a tojlel, pero jatet pec'atax mi caj a wajñel.

⁴⁴Mi caj i yʌq'ueñetob ti majan, pero ma'anic chuqui mi caj a wʌq'uen ti majan. Yambʌ mi caj i yajñel ti ñaxan. Jatet mi caj a wajñel ti wi'ipat.

⁴⁵Mi caj i tilel ti a tojlel pejtelel ili wocol. Mi caj a ts'a'lentel, c'ʌlʌl jinto ma' jisʌntel cha'an ti' caj ma'anic tsa' jac'be i t'an lac Yum Dios. Ma'anic tsa' lotbe pejtel i mandar yic'ot pejtelel i t'an tsa' bʌ i subeyet.

⁴⁶Jini cha'an mi caj a taj pejtel ili wocol jatet yic'ot a p'olbal cha'an ma' cʌntesʌntel, cha'an ma' cha'len bʌq'uen ti pejtelel ora.

⁴⁷Cha'an ti' caj ma'anic tsa' melbe chuqui yom lac Yum Dios, mach tijicñayic a pusic'al anquese wen chumulet cha'an tsa' wen p'ojli a chubʌ'an.

⁴⁸Jini cha'an mi caj a yuman a contrajob mu' bʌ caj i choc tilel lac Yum. Mi caj a wubin tiquin ti' yic'ot wi'ñal yic'ot tsʌñal che' ma'anix a pislel. An cʌbʌl chuqui mi' cajel ti falta a cha'an. Jini a contra mi caj i yʌq'ueñet al bʌ a cuch jinto mi' jisañetla.

⁴⁹Lac Yum mi caj i pʌy tilel yambʌ tejclum wen ñajt bʌ chumul ti yambʌ lum. Lajal bajche' xiye' mi caj i tilel i xujch'iñet majlel. Yañʌch bʌ i t'an jini winicob.

⁵⁰Wen jontolob. Lajal i wutob bajche' bʌte'el ts'i'. Ma'anic mi caj i p'isob ti wenta jini xñoxob. Ma'anic mi caj i p'untañob alʌlob.

⁵¹Mi caj i c'uxob i yal a wʌlac', yic'ot pejtel yujil bʌ colel ti a lum jinto ma' sʌc jisʌntel. Ma'anic mi caj i wis cʌybeñet a trigo yic'ot i ya'lel ts'usub, yic'ot aceite, yic'ot i yal wacax, yic'ot tiñʌme'. Che' jini mi caj i jisañet.

⁵²Mi caj i joy mʌctañet ti jujump'ejl tejclum, c'ʌlʌl jinto mi' jejmel jini ts'ajc am bʌ ti a joytʌlel anquese tsa' lon ña'ta muq'uix i coltañet jini chan bʌ ts'ajc ya' ba' chumuletla ti jini lum tsa' bʌ i yʌq'ueyetla lac Yum Dios.

⁵³Che' wi'ñayet mi caj a c'uxben i bʌc'tal jini ch'iton bʌ yic'ot xch'oc bʌ a walobilob tsa' bʌ i yʌq'ueyetla lac Yum Dios, come wen wocol mi caj a wubin che' mi' c'otelob a contrajob ti' caj a mul.

⁵⁴Jini wen uts bʌ winic ma'anic mi caj i p'untan i yeran yic'ot i yijñam, yic'ot jini cha'tiquil uxtiquil i yalobilob am bʌ yic'ot.

⁵⁵Che' mi' c'uxben i bʌc'tal i yalobil, ma'anic mi caj i t'oxbeñob i pi'ʌlob anquese wi'ñayob jax cha'an ma'anobix i bʌl i ñʌc'. Lajal mi caj i yubiñob wocol ti jujump'ejl tejclum cha'an i contrajintelob.

⁵⁶Jini wen uts bʌ x'ixic tsa' bʌ i cʌnta i bʌ ti yambʌ ora mach bʌ wis anic t'uchtʌbil i cha'an lum i mal i yoc, ma'anix mi' p'untan i ñoxi'al yic'ot i yalobilob.

⁵⁷Ma'anic mi caj i wis t'oxbeñob i bʌl i ñʌc'. Ti mucul jach mi caj i c'ux i yalobil, yic'ot ja'el i chujyil i yalobil che' ujtel to i yʌc' ti pañimil. Ma'anix chuqui mi' taj i c'ux, cha'an cabʌl a tic'lʌntel yic'ot a wocol ti' tojlel a contrajob.

⁵⁸Mi ma'anic ma' wen tsajin a bʌ cha'an ma' jac' pejtel ili mandar ts'ijbubil bʌ ti ili jun, mi ma'anic ma' bʌc'ñan jini ñuc bʌ lac Yum Dios wen bʌc'ñʌbil bʌ,

⁵⁹lac Yum mi caj i choc tilel ba' añetla yic'ot ba' añob la' walobilob bʌbʌq'uen tac bʌ c'amʌjel, jini c'amʌjel mach bʌ anix i yujtibal, yic'ot jini jontol tac bʌ c'amʌjel mach bʌ yujilic lajmel ti ora.

⁶⁰Mi caj i choc tilel pejtel jini jontol tac bʌ c'amʌjel lajal bajche' tsi' yubiyob ti Egipto, jini tsa' bʌ a bʌc'ña ti yambʌ ora. Ma'anix mi caj i chʌn cʌyet.

⁶¹Lac Yum mi caj i choc tilel ti a tojlel ja'el pejtel jini jontol bʌ c'amʌjel mach bʌ ts'ijbubilic ti ili jun, i juñilel mandar. Mi caj i jisañet.

⁶²Che' jini mach chʌn lajaletix la bajche' jini ec' am bʌ ti panchan, come ma'anix jaytiquil mu' bʌ caj i cʌytʌlob cha'an ti caj ma'anic tsa' la' jac'be i mandar lac Yum Dios.

⁶³Ti yambʌ ora tijicña jax i pusic'al lac Yum tsi' wen coltayetla. Tsi' p'ojlesayetla, pero mach che'ic ti jim bʌ ora. Mi caj i yubin i tijicñʌyel i pusic'al ba' ora mi' junyajlel jisañetla. Mi caj la' chojquel loq'uel ti lum.

⁶⁴Mi caj i pam puquetla ti yan tac bʌ tejclum, ti junwejl pañimil. Ya' mi caj la' ch'ujutesan jini dios tac mach bʌ cʌmbilic la' cha'an, mach bʌ cʌmbilic i cha'an la' ñojte'elob, jini dios tac melbil bʌ ti te' yic'ot ti xajlel.

⁶⁵Ma'anic mi caj a taj c'aj o baqui jach ma' majlel ti yan tac bʌ tejclum. Ma'anic mi caj a wubin a tijicñʌyel. Lac Yum mi caj i wen aq'ueñet bʌq'uen. Mi caj i toj sajtel a pusic'al. Wen ch'ijiyem jax a pusic'al mi caj a wubin.

⁶⁶Ti jujump'ejl q'uin bʌbʌq'uen mi caj a tsʌnsʌntel. Ma' caj ti bʌq'uen ti q'uiñil yic'ot ti ac'ʌlel. Mach wen tijicñayic mi caj a wubin come mach a wujilic chuqui tal.

⁶⁷Che' ti sʌc'ajel mi caj a wʌl: “I t'ojol ic'ajeliquix wʌle”, che'et. Che' ti ic'ajel mi caj a wʌl: “I t'ojol sʌc'ajelicax wʌle”, che'et. Come tsiltsilña a pusic'al cha'an cabʌl a bʌq'uen cha'an chuqui tac mi caj a q'uel.

⁶⁸Lac Yum mi caj i cha' pʌyetla majlel ya' ti Egipto ti jucub. Mi caj la' sujtel ti bij baqui tsac subeyetla. Ma'anix mi caj la' chʌn q'uel jini bij, cho'on. Ya'i mi caj la' wʌc' la' bʌ ti chojñel, winicob yic'ot x'ixicob, pero ma'anic majqui mi caj i mulan i mʌñetla.