Read Chol Deuteronomio 30 Bible Online

Deuteronomio 30 - Chol bible

Deuteronomio 30

¹Che' bʌ tsa'ix ujti pejtelel iliyi ti a tojlel, pejtelel jini bendición yic'ot wocol tsa' bʌ c subeyet, mi tsa' cha' c'ajtesa ya' ba' pam pujquemet ti yan tac bʌ tejclum baqui tsi' chocoyet majlel lac Yum Dios, mi a womix a cʌy a mul,

²mi a wom a cha' sutq'uin a bʌ ba'an lac Yum Dios ti pejtelel a pusic'al cha'an ma' jac' pejtelel ili mandar woli bʌ c subeñetla, jatet yic'ot a walobilob ti pejtelel a pusic'al yic'ot pejtelel a ña'tʌbal,

³che' jini lac Yum mi caj i cha' coltañet. Mux i cha' aq'ueñet pejtelel chuqui tsa' sajti a cha'an. Mi caj i cha' p'untañet. Mi caj i cha' pʌyet loq'uel ba' pam pujq'uemetla ti yan tac bʌ tejclum ya' ba' tsi' cʌn chocoyet majlel lac Yum Dios.

⁴Anquese pujquemetla ti ñajt tac bʌ pañimil, lac Yum Dios mi caj i cha' pʌyetla loq'uel ya' baqui añetla.

⁵Lac Yum Dios mi caj i cha' pʌyetla tilel ti jini lum aq'uebilo' bʌ la' ñojte'elob. La' cha'anix wʌle. Mi caj i cha' aq'ueñetla la' wenlel. Ñumen mi caj i p'ojlesañetla che' bajche' la' ñojte'elob.

⁶Lac Yum Dios mi caj i sʌq'uesan a pusic'al yic'ot i pusic'al a walobilob i wentajʌch tsep pʌchʌlel, che' ma' c'uxbin lac Yum Dios ti pejtelel a pusic'al, yic'ot ti pejtelel a ña'tʌbal, cha'an ma' taj a cuxtilel.

⁷Che' jini lac Yum Dios mi caj i yʌq'ueñob pejtel ili wocol la' contrajob, tsa' bʌ i ts'a'leyetob, tsa' bʌ i yajñesayetob.

⁸Mi caj a sutq'uin a bʌ cha'an ma' cha' mel pejtelel i mandar lac Yum mu' bʌ c subeñetla wʌle.

⁹Che' jini lac Yum Dios mi caj i coltañetla ti pejtelel chuqui tac mi la' mel. Mi caj i p'ojlesan a walobilob. Mi' caj ti p'ojlel a wʌlac', yic'ot a c'ajbal. Lac Yum mi caj i cha' ubin i tijicñʌyel i pusic'al che' mi' coltañet che' bajche' tsi' yubi i tijicñʌyel i pusic'al ti' tojlel a ñojte'elob.

¹⁰Yom jach ma' jac'ben i mandar ts'ijbubil bʌ ti' juñilel, Yom ma' cha' sutq'uin a bʌ ba'an lac Yum Dios ti pejtelel a pusic'al yic'ot ti pejtelel a ña'tʌbal.

¹¹Come ili mandar woli bʌ c subeñet wʌle mach wocolic ti jac'ol. Mach ñajtic an.

¹²Ma'anic ti panchan. Mach yomic ma' wʌl: “¿Majqui mi' mejlel ti letsel ti panchan cha'an mi' cha' ch'ʌmbeñonla tilel cha'an mi la cubin, cha'an mi lac jac'?” mach che'iquet.

¹³Mach ya'ic an jini t'an ti' junwejlel ñajb. Mach yomic ma' wʌl: “¿Majqui mi' mejlel ti c'axel ti colem ñajb cha'an mi' ch'ʌmbeñonla tilel, cha'an mi la cubin, cha'an mi lac jac'?” mach che'iquet.

¹⁴Come c'ax lʌc'ʌl jax an ti a tojlel jini t'an. An ti a wej yic'ot ti a pusic'al. Yom jach ma' jac'.

¹⁵Jini cha'an wʌle tsa'ix c pʌsbeyet i bijlel a cuxtʌlel ba'an bendición, yic'ot i bijlel chʌmel ba'an wocol.

¹⁶Wolic xic'beñet wʌle cha'an ma' c'uxbin lac Yum Dios, cha'an ma' cha'len xʌmbal ti' bijlel, cha'an ma' jac'ben pejtelel i mandar, yic'ot i cʌntesʌbal. Yom ma' wubin a tic'ol cha'an ma' chʌn taj a cuxtilel jatet yic'ot a p'olbal. Che' jini lac Yum Dios mi caj i yʌq'ueñet a wenlel ya' ti jini lum baqui ma' majlel ti chumtʌl.

¹⁷Pero mi tsa' sojqui a pusic'al, mi tsa' cʌyʌ a ñich'tʌben i t'an lac Yum, mi tsa' sʌtʌ a bʌ, mi tsa' ñocchoco a bʌ ti' tojlel jini dios tac cha'an ma' ch'ujutesan,

¹⁸mic subeñetla wersa mi caj la' chʌmel. Mach cabʌlic ora ya' añetla ti la' lum ti junwejl Jordán ja' baqui mi la' majlel ti chumtʌl.

¹⁹Jini cha'an mic wa'chocon jini año' bʌ ti panchan yic'ot ti pañimil che' bajche' testigojob ti la' tojlel, cha'an tsa'ix c pʌsbeyetla i bijlel la' cuxtʌlel ba'an bendición, yic'ot i bijlel chʌmel ba'an wocol. Jini cha'an yajcan a cuxtʌlel cha'an chʌn cuxulet, yic'ot a walobilob.

²⁰C'uxbin lac Yum Dios. Chʌn nich'tʌben i t'an, chʌn tsajcan. Come jiñʌch a cuxtʌlel yic'ot i ñajtesʌntel a jabilel. Che' jini xuc'ul mi caj a chumtʌl ya' ti lum mu' bʌ i yʌq'ueñet lac Yum che' bajche' tsi' sube a ñojte'elob, Abraham, yic'ot Isaac, yic'ot Jacob, che'en Moisés.