Read Chol Deuteronomio 32 Bible Online

Deuteronomio 32 - Chol bible

Deuteronomio 32

¹Ñich'tanla añet bʌ la ti panchan yic'ot ti pañimil. Ñich'tʌbeñon c t'an:

²Lajalʌch j cʌntesa che' bajche' ja'al Mu' bʌ i yajlel ti' pam jini ch'oc to bʌ jam, Che' bajche' ja'al ya' ti wits.

³Mi caj c sub i ñuclel lac Yum. Wen an i ñuclel ti chan.

⁴Jiñʌch xajlel. Ts'ʌcʌl i ye'tel. Tojʌch pejtelel mu' bʌ i mel. Xuc'ulʌch, ma'anic i mul.

⁵Pero jini israelob tsa'ix i socoyob i bʌ. Tsa'ix i cha'leyob mulil. Mach yic'otobix lac Yum. Wen tsʌtsob i pusic'al.

⁶¿Che' ba yom melol ti' wut lac Yum? Tontojetla. ¿Mach ba la' tatic jini Dios? ¿Mach ba jinic tsi' meleyetla? ¿Mach ba jinic tsi' yʌq'ueyetla la' p'ʌtʌlel?

⁷Ña'tanla bajche' añetla ti wajali. C'ajtiben la' tat yic'ot jini xñoxob Cha'an mi' tsictesʌbeñetla.

⁸Dios tsi' t'oxbeyob i lum pejtelel tejclum tac, Tsi' pucuyob pejtelel winicob x'ixicob, Tsi' yʌq'ueyob i cayajonlel tac ba' jaxʌl i lum i yalobilob Israel,

⁹Come c'uxbibil Israel i cha'an lac Yum. Jacob i yajcʌbalʌch lac Yum.

¹⁰Lac Yum tsi' cʌntayob ti colem bʌ i tiquiñal pañimil. Ya' ti jochol bʌ lum ba' bʌbʌq'uen. Tsi' wen cʌntayob che' bajche' mi laj cʌntan lac wut,

¹¹Che' bajche' mi' luts' i yal jini xiye'. Mi' cuch majlel i yal ti' wich'. Che'ʌch tsi' mele lac Yum.

¹²Ti' bajñelil lac Yum tsi' toj'esayob majlel. Ma'anic yambʌ dios ti' tojlel.

¹³Dios tsi' yʌq'ueyob israelob uts'at bʌ lum ya' ti' pam jini bujtʌl tac. Tsi' yʌq'ueyob i c'uxben i wut. Tsi' yʌq'ueyob i mʌc' chab luchbil bʌ loq'uel ti xajlel, Yic'ot olivo aceite ti xajlelol.

¹⁴Tsi' yʌq'ueyob lech yic'ot we'elʌl, Uts'at bʌ tat tiñʌme' tac am bʌ ti Basán, Yic'ot wen uts'at bʌ trigo. Tsi' japʌyob i ya'lel ts'usub.

¹⁵Jini israelob tsa' ñaj'ayob, Tsa' wen jujp'iyob. Che' jini tsi' cʌyʌyob i Dios anquese i melbalob. Tsi' ts'a'leyob jini Xajlel tsa' bʌ i coltayob.

¹⁶Tsa' caji i tsajcañob yambʌ dioste' tac, Lac Yum tsi' mich'leyob, Tsʌytsʌyña i pusic'al tsi' q'ueleyob.

¹⁷Tsi' tsʌnsʌbeyob i majtan tac xibajob mach bʌ diosobic. Tsi' tsajcayob tsiji' bʌ dioste' mach bʌ anic tsi' ch'ujutesayob i ñojte'elob.

¹⁸Tsi' cʌyʌyob jini Xajlel tsa' bʌ i meleyob. Tsa' ñajʌyiyob i cha'an jini Dios tsa' bʌ i yʌc'ʌyob ti pañimil.

¹⁹Lac Yum tsi' q'uele chuqui woli' melob. Lac Yum tsi' ts'a'leyob, Tsa' caji i mich'len i yalobilob.

²⁰Lac Yum tsi' yʌlʌ: Mi caj j cʌyob. Ya'to tsiquil bajche' mi caj i jilelob, Come wen tsʌtsob jax i pusic'al, mach xuc'ulobic.

²¹Tsa'ix i techbeyon i tsʌytsʌyñʌyel c pusic'al cha'an i dioste' mach bʌ Diosic. Joñon mi caj cotsʌbeñob i tsʌytsʌyñʌyel i pusic'al Che' mij c'uxbin yambʌ tejclumob año' bʌ ti pañimil, jini cʌybilix bʌ.

²²Jini c mich'lel mi' lejmesan c'ajc Woli bʌ ti lejmel c'ʌlʌl ti' yajñib chʌmeño' bʌ. Mi' yʌc' ti pulel pañimil yic'ot pejtelel cholel tac. Mi' yʌc' ti pulel i te'el tac.

²³Mi caj c p'ojlesʌbeñob wocol.

²⁴Mi caj cʌq'ueñob wi'ñal yic'ot c'ajc, Yic'ot c'amʌjel mu' bʌ caj i tsʌnsañob. Mi caj c choc tilel jontol bʌ bʌte'el Cha'an mi' c'uxob ti jay bʌ i yej. Mi caj c jisañob yic'ot i venenojlel jontol bʌ lucum, cotcotña bʌ ti lum.

²⁵Ti pat i yotot an i contrajob mu' bʌ caj i tsʌnsañob ti espada. Ti mal i yotot an leco bʌ c'amʌjel. Mi caj i yubiñob bʌq'uen winicob yic'ot xch'ocob, Yic'ot alʌlob yic'ot xñoxob.

²⁶Tsac ña'ta c junyajlel pucob majlel ti ñajt bʌ pañimil Cha'an ma'anix mi' chʌn ña'tʌntelob.

²⁷Pero mach che'ic tsac mele ame i lon chañ'esañob i bʌ i contrajob che' mi' jisʌntelob jini israelob, Ame mi' lon alob: “Tsa' mʌjli lac cha'an ti lac bajñel p'ʌtʌlel. Mach jinic i ye'tel lac Yum”, ame lon che'icob.

²⁸Tontojob jini israelob, Ma'añobic i ña'tʌbal.

²⁹Wen uts'at añobic i ña'tʌbal. Uts'at muq'uic i ch'ʌmbeñob isujm Cha'an mi' ña'tañob bajche' mi caj i jilelob.

³⁰Juntiquil jach i contra mi caj i yajñesan jump'ejl mil israelob. Cha'tiquil jach mi caj i puts'tesan lujump'ejl mil, Come jini Xajlel i cha'an israelob tsi' cʌyʌyob. Lac Yum tsi' yʌc'ʌyob ti jisʌntel.

³¹Come ma'anic i xajlel yambʌ tejclum tac Che' bajche' lac Xajlel. Lolom jach mi' pejcañob i dioste' tac.

³²Lajal i mul israelob che' bajche' año' bʌ ti Sodoma yic'ot Gomorra. Ch'aj i melbal tac che' bajche' veneno.

³³Mi' japob i venenojlel lucum yubil.

³⁴Pero tsa'ix c yajcayob, tsa'ix c loto jini israelob che' bajche' letsem bʌ i tojol ujʌl.

³⁵Joñon mi caj j q'uextʌbeñob i mul i contrajob. Mi caj cʌq'ueñob castigo. Mach jalix mi caj i yajlelob, che'en.

³⁶Lac Yum mi caj i coltan jini israelob ti' tojlel i contrajob. Mi caj i p'untan i winicob che' ma'añobix i p'ʌtʌlel, Che' ma'anix mi' cʌytʌl, mi libre bʌ, mi mozo bʌ.

³⁷Che' jini lac Yum mi caj i c'ajtibeñob: ¿Bac'an la' dioste'? ¿Bac'an la' xajlel cha'an mi la' majlel ti puts'el?

³⁸¿Bac'an la' dios xajlel? Tsa' la' wʌq'ueyob i majtan tac, lew yic'ot vino. La' i coltañetla, la' i yotsañetla ti' wenta.

³⁹Q'uelela. Joñon la' Dioson. Joñon jach, ma'anic yambʌ. Joñon mi cʌq'uetla ti chʌmel. Joñon mi cʌq'ueñetla la' cuxtʌlel. Mic lowetla, mic cha' lajmesañetla. Ma'anic majqui mi mejlel i loc'sañetla tic p'ʌtʌlel.

⁴⁰Mic letsan j c'ʌb ti panchan cha'an mi cʌc' c t'an, Wersa mi' caj ti ts'ʌctiyel come cuxulon ti pejtelel ora.

⁴¹Mi caj c juc' quespada, mi caj c chajpan c bʌ cha'an meloñel. Mi caj cʌq'ueñob i castigo j contrajob. Mi caj i tojob i mul jini mu' bʌ i ts'a'leñoñob.

⁴²Mi caj c julob ti jalʌjb. On mi caj c bec'beñob i ch'ich'el. Mi caj c tsepbeñob i bʌc'tal j contrajob ti espada. Chʌctilan i ch'ich'el i jol j contrajob, che'en lac Yum.

⁴³Ti pejtelel tejclum tac Subula i ñuclel i winicob Dios, Come lac Yum mi caj i q'uextʌbeñob i ch'ich'el i cha'año' bʌ. Mi caj i yʌq'ueñob castigo i contrajob. Mi caj i sʌq'uesan i winicob x'ixicob yic'ot i lumal.

⁴⁴Tsa' caji i c'ʌyiñob jini t'an Moisés yic'ot Josué (i yalobil Nun) ti' tojlel pejtel israelob. Tsi' cʌntesayob.

⁴⁵Che' bʌ tsa' ujti i cʌntesañob, tsi' yʌlʌ Moisés: Ac'ʌla ti la' pusic'al pejtelel ili t'an tsa' bʌ j cʌntesayetla ti ili q'uin. Cʌntesan la' walobilob cha'an mi' chʌcʌ q'uelob i bʌ cha'an ts'ʌcʌl mi' jac'ob pejtel ili mandar.

⁴⁶

⁴⁷Come ili mandar tac mach to'ol t'anic jach. La' cuxtʌlelʌch. Mi xuc'ul mi la' jac', mi caj la' wen jalijel ti jini lum ya' ti junwejl Jordán ja' baqui mi la' majlel ti chumtʌl. Che' tsi' yʌlʌ Moisés.

⁴⁸Ti jini jach bʌ q'uin lac Yum tsi' sube Moisés: Cucu ti letsel ti' jol jini wits i c'aba' Nebo am bʌ ti wits i c'aba' Abiram. Wʌ'an ti' lumal Moab am bʌ ti' tojel Jericó. Yom ma' ñajtʌ q'uel jini Canaán woli bʌ cʌq'ueñob jini israelob ba' mi caj i chumtʌlob.

⁴⁹

⁵⁰Mi caj a chʌmel ti jini wits. Mi caj a pʌjyel ba'an a ñojte'elob. Mi caj a chʌmel che' bajche' tsa' chʌmi Aarón ya' ti wits i c'aba' Hor. Tsa' pʌjyi majlel ba'an i ñojte'elob.

⁵¹Ti la' cha'ticlel tsa' la' chañ'esa la' bʌ ya' ti ja' i c'aba' Meriba am bʌ ti Cades ya' ti colem bʌ i tiquiñal pañimil i c'aba' Zin. Ma'anic tsa' la' q'ueleyon ti ñuc ti' tojlel israelob.

⁵²Mi caj a q'uel jini lum ti ñajtʌl, pero mach mejlic a wochel ti jini lum woli bʌ cʌq'ueñob israelob. Che' tsi' yʌlʌ lac Yum.