Read Chol Deuteronomio 34 Bible Online

Deuteronomio 34 - Chol bible

Deuteronomio 34

¹Tsi' subu i bʌ Moisés ti joctʌl i cha'an Moab. Tsa' caji ti letsel majlel ti' jol wits i c'aba' Pisga am bʌ ti Nebo wits, ya' ti' tojel Jericó. Lac Yum tsi' pʌsbe pejtelel i lumal Canaán, c'ʌlʌl ti Galaad c'ʌlʌl ti Dan:

²I lum Neftalí, yic'ot i lum Efraín yic'ot Manasés, yic'ot i lum Judá c'ʌlʌl ti colem bʌ Ñajb,

³yic'ot jini Neguev, yic'ot jini joctʌl Jordán, yic'ot Jericó ba'an cabʌl bonxan te', yic'ot i lum Zoar.

⁴Lac Yum tsi' sube Moisés: Jiñʌch jini lum woli bʌ cʌq'ueñob israelob che' bajche' tsac subeyob Abraham, yic'ot Isaac, yic'ot Jacob. Wʌle, tsa'ix a q'uele, pero ma'anic mi caj a wochel ya'i, che'en lac Yum.

⁵Jini cha'an tsa' chʌmi Moisés, i winic lac Yum, ya' ti' lumal Moab che' bajche' tsi' yʌlʌ lac Yum.

⁶Lac Yum tsi' mucu Moisés ti joctʌl ti Betpeor am bʌ ti Moab, pero ma'anic majqui mi' ña'tan baqui tsa' mujqui.

⁷Anix wʌcc'al (120) i jabilel Moisés che' bʌ tsa' chʌmi, pero c'ʌlʌl wento i wut che' bʌ tsa' chʌmi. Ch'ejlto che' bajche' ch'iton winic.

⁸Jini israelob tsi' yuc'tayob ya' ti joctʌl i cha'an Moab lujump'ejl i cha'c'al (30) q'uin.

⁹An cabʌl i ña'tʌbal jini Josué (i yalobil Nun), come Moisés tsi' yʌc'ʌ i c'ʌb ti' pam. Jini cha'an jini israelob tsi' jac'beyob i t'an Josué. Tsi' meleyob che' bajche' lac Yum tsi' sube Moisés.

¹⁰Ma'anic yambʌ x'alt'an che' bajche' Moisés c'ʌlʌl wʌle, come lac Yum tsi' pejca ti' wut.

¹¹Cha'an ti' mandar lac Yum Moisés tsi' cha'le ñuc tac bʌ i ye'tel. Ma'anic yambʌ yujil bʌ i melol che' bajche' jini. Tsi' pʌsʌ bʌbʌq'uen bʌ i melbal ti' wut Faraón yic'ot ti' wutob pejtelel año' bʌ i ye'tel ti Egipto yic'ot i pi'ʌlob, yic'ot ti' wutob jini israelob. Tsi' wen tsictesa ñuc bʌ i p'ʌtʌlel lac Yum.