Read Chol Deuteronomio 5 Bible Online

Deuteronomio 5 - Chol bible

Deuteronomio 5

¹Moisés tsi' pʌyʌ tilel pejtel jini israelob. Tsi' subeyob: Ñich'tanla pejtel ili mandar yic'ot la' tic'ol woli bʌ c subeñetla cha'an mi la' wubin. Yom mi la' ñop, yom mi la' jac'.

²Come lac Yum Dios tsi' pejcayonla ti Horeb. Tsi' subeyonla chuqui mi caj i cha'len ti lac tojlel. Mach ti' tojlelobic lac ñojte'elob tsi' subu jini t'an, pero ti lac tojlel. Tsa' la cubibe i t'an joñonla cuxulonto bʌ la.

⁴Ya' ba wa'al lac Yum ti' yojlil c'ajc tsi' pejcayetla.

⁵Xinlʌpʌlon ti la' tojlel yic'ot ti' tojlel lac Yum, come jatetla tsa' la' bʌc'ña jini c'ajc. C bajñel tsa' letsiyon ti wits, ma'anic tsa' letsiyetla. Lac Yum tsi' pejcayon. Joñon tsac cha' subeyetla i t'an. Jiñʌch tsa' bʌ i yʌlʌ:

⁶“Joñon a Yumon a Dioson. Tsac pʌyʌyet loq'uel ti' lumal Egipto ya' ba' chucbilet ti to'ol e'tel.

⁷Mach a ñop yambʌ dios cha'an ma' xʌb otsan yambʌ tic tojlel.

⁸Mach a mel a dios. Mach a melben i yejtal chuqui tac an ti panchan, mi i yejtal jini am bʌ ti pañimil ti yebal panchan, mi i yejtal chuqui tac an ti ja' ti' yebal lum.

⁹Mach a cotchocon a bʌ ti' tojel i wut. Mach a diosiñob, come a Yumon a Dioson. Cujil mich'ajel che' ma'anic mij c'uxbintel. Mi cʌq'ueñob wocol winicob ti caj i mul i tat c'ʌlʌl mi' yubiñob i butsob, yic'ot i yalobilob i butsob jini winic mu' bʌ i ts'a'leñon.

¹⁰Mi cutsi p'ojlesʌbeñob i yutslel c pusic'al mu' bʌ i c'uxbiñoñob, mu' bʌ i jac'ob c mandar c'ʌlʌl ti jump'ejl mil i lajm la' p'olbal.

¹¹Mach a lon tajben i c'aba' a Yum Dios cha'an chuqui mi caj a mel, come a Yum ma'anic mi caj i ñusʌben i mul jini mu' bʌ i lon tajben i c'aba'.

¹²Mach ñajʌyic ti a pusic'al i yorajlel c'aj o. Yom ma' ch'ujutesan Dios ti jini q'uin che' bajche' tsi' yʌq'ueyetla mandar lac Yum Dios.

¹³An la' cha'an wʌcp'ejl q'uin cha'an ma' cha'len a we'tel yic'ot pejtelel chuqui a wom a mel.

¹⁴Pero i wucp'ejlel q'uin jiñʌch i yorajlel c'aj o. I cha'añʌch a Yum Dios. Ti ili q'uin mach a wis cha'len e'tel, mi jatetic, mi jinic ch'iton bʌ a walobil, mi xch'oc bʌ a walobilic, mi a winiquic, mi a criadajic, mi a wacaxic, mi a burrojic, mi a wʌlaq'uic, mi jinic am bʌ ti a tojlel mach bʌ cʌmbilic. Che' jini mi mejlel i c'ajob i yo ja'el a winic yic'ot a criada año' bʌ ti a wenta.

¹⁵Yom ma' ña'tan mozojet ti yambʌ ora ti' lumal Egipto, pero lac Yum Dios tsi' loc'sayet yic'ot pejtelel i p'ʌtʌlel. Jini cha'an lac Yum Dios mi' wersa subeñet cha'an ma' c'aj a wo.

¹⁶Q'uele ti ñuc a tat a ña' che' bajche' tsi' subeyet lac Yum Dios, cha'an uts'at pejtelel chuqui mi' yujtel ti a tojlel, cha'an ja'el ma' taj cabʌl a jabilel ti ili lum mu' bʌ i yʌq'ueñet lac Yum Dios.

¹⁷Mach a cha'len tsʌnsa.

¹⁸Mach a cha'len ts'i'lel.

¹⁹Mach a cha'len xujch'.

²⁰Mach a cha'len jop't'an ti' contra a pi'ʌlob.

²¹Mach a mulʌben i yijñam a pi'ʌl, mi i yototic, mi i lumic, mi i winiquic, mi i criadajic, mi i wacaxic, mi i burrojic. Pejtelel chuqui an i cha'an, mach yomic ma' mulʌben”.

²²Jiñʌch tsa' bʌ i yʌlʌ lac Yum che' wa'al ti c'ajc che' joyol ti tocal yic'ot ic'ch'ipan bʌ pañimil, ya' ti wits i c'aba' Sinaí. Ma'anic tsi' yʌc'ʌ yambʌ mandar. Tsi' ts'ijba ti cha'q'uejl xajlel. Che' jini tsi' yʌq'ueyon.

²³Tsa' la' wubi jini c'am bʌ t'an ya' baqui ic'ch'ipan. Tsa' la' q'uele woli ti lejmel jini c'ajc ya ti pam wits. Jini cha'an tsa' laj tiliyob ba' añon jini ñuctaco' bʌ i ye'tel.

²⁴Tsa' la' wʌlʌ: Quelelix lac cha'an i ñuclel Dios yic'ot i p'ʌtʌlel. Lac Yum Dios tsa'ix i pʌsbeyonla. Tsa'ix la cubibe i t'an ya' ti' yojlil c'ajc. La cujilix melel mi mejlel i pejcan Dios winic come chʌn cuxulet.

²⁵Pero bʌbʌq'uen mi lac chʌmel che' mi' cha' pejcañonla. ¿Yom ba mi lac chʌmel? Come ili c'ajc mi caj i jisañonla.

²⁶¿Baqui an winic mu' bʌ mejlel i yubiben i t'an Dios ti' yojlil jini c'ajc? ¿Mach ba muq'uic i chʌmel? Jini cha'an yom ma' bajñel majlel a ñich'tʌben i t'an lac Yum cha'an ma' cha' subeñon lojon. Che' jini mi caj c jac' lojon, che'etla.

²⁸Lac Yum tsi' yubibeyetla la' t'an. Tsi' subeyon: Tsa'ix cubibeyob i t'an ili winicob. Uts'at bajche' tsi' ña'tayob.

²⁹Uts'atax muq'uic i bʌc'ñañoñob ti pejtelel ora cha'an mi' jac'beñonob c t'an yic'ot c mandar. Che'ic jini, muq'uix i ñusañob q'uin ti uts'at yic'ot i yalobilob ti pejtelel ora.

³⁰Yom ma' subeñob cha'an mi' cha' sujtelob ti' yototob.

³¹Pero jatet wʌ'to ma' cʌytʌl quic'ot cha'an mic subeñet pejtelel c t'an yic'ot c mandar, cha'an ma' cʌntesan jini winicob. Subeñob cha'an mi' jac'ob ti jini lum woli bʌ cʌq'ueñob, che'en lac Yum.

³²Jini cha'an yom wen tsajaletla cha'an mi la' mel che' bajche' tsi' subeyetla lac Yum Dios. Mach yomic mi la' wis xoy la' bijlel, mi ti la' ñojic, mi ti la' ts'ejic.

³³Chʌn cha'lenla xʌmbal ti' bijlel lac Yum che' bajche' tsi' subeyetla, cha'an cuxul mi la' wajñel ti pejtelel ora, cha'an mi' jastiyel la' chubʌ'an, cha'an mi' tam'esʌntel la' jabilel ya' ti lum baqui mi la' majlel ti chumtʌl.