Read Chol Deuteronomio 6 Bible Online

Deuteronomio 6 - Chol bible

Deuteronomio 6

¹Jiñʌch i mandar yic'ot i cʌntesa Dios yic'ot la' tic'ol tsa' bʌ i subeyon lac Yum Dios cha'an mij cʌntesañetla. Yom mi la' jac' ti jini lum baqui mi la' majlel ti chumtʌl.

²Che' jini mi caj la' chʌn bʌc'ñan lac Yum Dios. Mi caj la' jac'ben pejtelel i t'an yic'ot i mandar mu' bʌ c subeñetla, jatetla yic'ot la' walobilob, yic'ot i yalobilob la' walobilob, cha'an mi' ñajt'an la' jabilel ti pañimil.

³Ñich'tanla che' jini, israelob, cha'an xuc'ul mi la' jac'ben i mandar lac Yum. Che' jini uts'at mi caj la' ñusan q'uin ya' ti la' lum baqui mi' colel pejtelel pʌc'ʌbʌl. Mi caj la' p'ojlel ja'el che' bajche' tsi' subeyetla lac Yum Dios, jini jach bʌ i Dios la' ñojte'elob.

⁴Ubinla israelob: Lac Yum Dios juntiquil jach.

⁵C'uxbin lac Dios ti pejtelel la' pusic'al, ti pejtelel la' ch'ujlel, yic'ot ti pejtelel la' p'ʌtʌlel.

⁶Ts'ijbanla cʌytʌl ti la' pusic'al pejtelel ili t'an mu' bʌ c subeñetla wʌle.

⁷Cha' subeñob la' walobilob che' ya' añetla ti la' wotot, yic'ot che' woliyetla ti xʌmbal ti bij, yic'ot che' mi la' cajel ti wʌyel, yic'ot che' mi la' cha' ch'ojyel.

⁸Ts'ijbanla cʌytʌl ti la' c'ʌb, yic'ot ti la' jol, cha'an mi la' chʌn ña'tan ti pejtelel ora.

⁹Muq'uix la' ts'ijban ti' chumte'lel la' wotot yic'ot ti' ti' la' wotot cha'an mi la' chʌn q'uel ti pejtelel ora.

¹⁰La' Yum Dios mi caj i pʌyetla ochel ti jini lum tsa' bʌ i wʌn subeyob la' ñojte'el Abraham, yic'ot Isaac, yic'ot Jacob. Ya'an ñuc tac bʌ tejclum mach bʌ la' wa'chocobalic yic'ot wen bʌ pʌc'ʌbʌl mach bʌ la' pʌc'balic. Che' anix la' cha'an mach mi' ñajʌyel la' cha'an lac Yum.

¹¹Che' but'ulix la' wotot ti chubʌ'añʌl mach bʌ la' we'telic, che' anix i yajñib ja' mach bʌ la' melbalic, yic'ot ja'el ts'usubil yic'ot olivote' mach bʌ la' pʌc'balic, mux cajel la' c'uxben i wut, mux caj la' ñaj'an.

¹²Tsajaletme la che' jini ame ñajʌyic la' cha'an lac Yum tsa' bʌ i loc'sayetla ti' lumal Egipto ba'an majtan e'tel.

¹³Yom mi la' bʌc'ñan lac Yum Dios. Cojach jini mi caj la' Yuman, cojach jini mi caj la' ch'ujutesan.

¹⁴Mach mi la' majlel ba'an i diosob yaño' bʌ winicob yambʌ i lumal,

¹⁵ame mi' mich'leñetla lac Yum Dios am bʌ ti la' tojlel, come tsʌytsʌyña i pusic'al che' mi la' cʌy cha'an la' mul. Jini cha'an yom tsajaletla ame i lu' jisañetla.

¹⁶Mach la' wilʌben i pusic'al lac Yum Dios che' bajche' tsa' la' wilʌbe ya' ti Masah.

¹⁷Yom wen tsajaletla cha'an mi la' jac' la' tic'ol yic'ot la' cʌntesʌntel yic'ot pejtelel i mandar lac Yum Dios.

¹⁸Melela chuqui toj yic'ot chuqui wen ti' tojlel lac Yum, cha'an uts'at mi' yujtel ti la' tojlel. Che' jini mi caj la' wochel ti chumtʌl ti jini wen bʌ lum tsa' bʌ i wʌn subeyob la' ñojte'el.

¹⁹Che' jini lac Yum mi caj i yʌc' ti jilel la' contrajob ti la' tojlel che' bajche' tsi' wʌn subeyetla.

²⁰Mi caj i c'ajtibeñet la' walobilob: “¿Chuqui i sujmlel jini mandar yic'ot i t'an lac Yum yic'ot i cʌntesa tsa' bʌ i subeyetla cha'an mi lac mel?” che'ob.

²¹Ti jim bʌ ora mi caj la' suben la' walobilob: “Ti yambʌ ora mozojonla ti Egipto ti' tojlel Faraón, pero lac Yum tsi' loc'sayonla ti' p'ʌtʌlel.

²²Jini lac Yum tsi' pʌsʌ ñuc tac bʌ yic'ot bʌbʌq'uen tac bʌ i p'ʌtʌlel ya' ti' tojlel Faraón yic'ot i pi'ʌlob ti Egipto. Tsi' chocbeyob tilel cabʌl wocol. Tsa' laj q'uele joñonla.

²³Tsi' pʌyʌyonla loq'uel cha'an mi la cochel ti jini lum mu' bʌ caj i yʌq'ueñonla che' bajche' tsi' wʌn subeyob lac ñojte'elob.

²⁴Lac Yum tsi' subeyonla cha'an mi lac jac'ben pejtelel jini mandar, cha'an mi lac bʌc'ñan lac Yum Dios, cha'an mi' loq'uel ti uts'at pejtelel chuqui mi caj i yujtel ti lac tojlel ti pejtelel ora. Che' jini mi caj i chʌn cʌntañonla ti pañimil.

²⁵Muq'uix caj i q'uelonla ti toj mi tsa' lac jac'be pejtelel ili mandar ti' tojlel lac Yum Dios che' bajche' tsi' subeyonla”, che'etla.