Read Chol Deuteronomio 7 Bible Online

Deuteronomio 7 - Chol bible

Deuteronomio 7

¹Lac Yum Dios mi caj i pʌyetla ochel ti la' lum mu' bʌ caj i yʌq'ueñetla. Che' ja'el mi caj i choc loq'uel cabʌl tejclumob ti la' tojlel, jiñobʌch: heteojob, gergeseojob, amorreojob, cananeojob, ferezeojob, heveojob, jebuseojob. Jiñobʌch wucp'ejl tejclum ñumen ñuc bʌ bajche' jatetla, ñumen p'ʌtʌlob ja'el.

²Lac Yum Dios mi caj i yʌc'ob ti a p'ʌtʌlel cha'an mi la' jisañob. Che' mʌlbilix la' cha'an, yom mi' la' junyajlel jisañob ti pejtelob. Mach yomic mi la' laj la' t'an yic'otob. Mach yomic mi la' p'untañob.

³Mach yomic mi la' ñujpuñijel yic'otob. Mach yomic mi la' sijibeñob xch'oc bʌ la' walobilob. Mach yomic mi la' c'ajtiben xch'oc bʌ i yalobilob cha'an la' walobilob,

⁴ame muq'uic la' wʌc' ti sajtel la' walobilob ti' tojlel lac Yum cha'an mi' chujutesañob jini dioste' tac. Che' jini mi caj i mich' q'ueletla lac Yum. Mi caj i bʌc' jisañetla.

⁵Pero yom mi la' mel che' bajche' jini: Jembenla jini wa'chocobil bʌ baqui mi' pulbeñob i majtan i diosob. Xulbenla jini ch'ujul bʌ oy i cha'añob. Yom mi la' laj jisʌbeñob i dios Asera. Yom mi la' pul ti pejtelel.

⁶Jatetla ch'ujul bʌ tejclumetla i cha'an lac Yum Dios. Come lac Yum Dios tsa'ix i yajcayetla ti' tojlel pejtel winicob ti pejtelel lum cha'an mi' yotsañetla ti' cha'an bʌ c'uxbibil bʌ i cha'an.

⁷Come mach cha'anic ñumen cabʌletla tsi' cʌntayetla yic'ot tsi' yajcayetla. Come mero ts'ita'etla ti' tojlel yambʌ tejclumob.

⁸Pero cha'an jach tsi' c'uxbiyetla lac Yum tsi' yajcayetla cha'an mi' ts'ʌctesan i t'an tsa' bʌ i wʌn subeyob la' ñojte'el. Jini cha'an lac Yum tsi' c'ʌñʌ i p'ʌtʌlel cha'an mi' loc'sañetla baqui woliyetla ti majtan e'tel ti yambʌ ora ti' tojlel jini rey Faraón ti Egipto.

⁹Ña'tanla che' jini Diosʌch lac Yum, jini jach bʌ Dios, xuc'ul bʌ ti pejtelel ora. Mi' chʌn ña'tan jini xuc'ul* bʌ t'an tsa' tʌ i yʌc'ʌ ti lac tojlel. Mi' pʌsbeñob i yutslel i pusic'al jini mu' bʌ i jac'beñob i mandar c'ʌlʌl ti jump'ejl mil i lajm la' p'olbal.

¹⁰Mi' q'uextʌbeñob i mul pejtelob mu' bʌ i ts'a'leñob, mu' bʌ i ñusʌbeñob i t'an. Mi caj i jisañob. Ma'anic mi' jalʌtesan i bʌ cha'an mi' yʌq'ueñob i toj i mul. Muq'uix i yʌq'ueñob i toj.

¹¹Jini cha'an mic subeñetla yom mi la' jac'ben i t'an yic'ot pejtelel i mandar mu' bʌ c subeñetla wʌle.

¹²Mi muq'uix la' wubin pejtelel jini t'an, mi muq'uix la' wen jac' lac Yum Dios, mi cajel i chʌn ña'tan jini xuc'ul bʌ i t'an yic'ot i yutslel i pusic'al che' bajche' tsi' wʌn subeyob la' ñojte'elob.

¹³Lac Yum mi caj i c'uxbiñetla. Mi caj i yʌq'ueñetla i yutslel i t'an. Mi caj i yʌq'uetla ti p'ojlel. Uts'at mi caj i colel chuqui tac mi la' pʌc' ti la' lum. Mi caj i p'ojlesʌbeñetla trigo, yic'ot i ya'lel la' ts'usubil, yic'ot aceite, yic'ot i yal tac la' wacax, yic'ot la' tiñʌme' ti jini lum mu' bʌ caj i yʌq'ueñetla che' bajche' tsi' wʌn subeyob la' ñojte'elob.

¹⁴Ñumen tijicñayetla bajche' pejtelel yan tac bʌ tejclum, come ma'anic ti' la' tojlel ch'iton mi xch'oc mach bʌ anic mi caj i yʌc' i yalobil. La' wʌlac' ja'el mi caj i yʌc' i yal.

¹⁵Lac Yum mi caj i loc'sʌbeñetla pejtelel la' c'amʌjel. Mi caj i cʌntañetla cha'an ma'anic mi la' taj jini c'amʌjel mu' bʌ la' bʌc'ñan am bʌ ti Egipto. Pero muq'uix i yʌq'ueñob i c'amʌjel pejtelob mu' bʌ i ts'a'leñetla.

¹⁶Yom mi la' laj jisan jini tejclum tac mu' bʌ caj i yʌq'ueñetla lac Yum Dios. Mach yomic mi la' p'untañob. Mach yomic mi la' yuman i diosob, ame chujquiquetla che' bajche' ti yac.

¹⁷Mi tsa' caji la' wʌl ti la' pusic'al: “Ñumen cabʌlob che' bajche' joñonla. ¿Bajche' mi mejlel lac choc loq'uel?” mi che'etla,

¹⁸mach yomic mi la' bʌc'ñañob. Ña'tanla chuqui tsi' mele lac Yum ti' tojlel Faraón yic'ot ti' tojlelob pejtelel jini año' bʌ ti Egipto.

¹⁹Q'uelelix lac cha'an jini bʌbʌq'uen tac bʌ i yejtal tac bʌ i p'ʌtʌlel Dios, yic'ot jini ñuc tac bʌ i p'ʌtʌlel tsa' bʌ i c'ʌñʌ che' bʌ tsi' loc'sayonla ti Egipto. Che'ʌch mi caj i melbeñetla lac Yum ti' tojlel jini tejclum tac mu' bʌ la' bʌc'ñan.

²⁰Lac Yum Dios mi caj i bʌc'tesañob jinto mi' laj jilelob yic'ot jini tsa' bʌ puts'iyob majlel.

²¹Mach la' bʌc'ñañob, come lac Yum Dios an la' wic'ot. Wen ñuc ajñel, wen bʌc'ñʌbil.

²²Lac Yum Dios mi cajel i c'unte' jisan la' contrajob ti pejtelelob. Mach mejlic la' jisanob ti ora ti' pejtelob, ame p'ojlic jini jontol bʌ bʌte'el cha'an mi' tic'lañetla.

²³Pero lac Yum Dios mi caj i yʌc' ti jilel la' contrajob ti mojt ti mojt ti' la' tojlel cha'an mi la' jisañob ti pejtelob.

²⁴Dios mi caj i yʌc' ti la' c'ʌb i reyob. Jatetla mi caj la' jisʌbeñob i c'aba' ila ti pañimil. Ma'anic majqui mi caj i coltan i bʌ ti la' tojlel.

²⁵Yom mi la' laj pulbeñob i diosob. Mach mi la' mulʌbeñob i plata, mi oro cha'an mi la' ch'ʌmben, ame chujquiquetla che' bajche' ti yac. Ts'a'lebil cha'an lac Yum Dios jini melbil tac bʌ dios.

²⁶Mach yomic mi la' wis ch'ʌm tilel ti la' wotot jini ts'a'lebil bʌ ti Dios, ame chojquiquetla. Yom mi la' ts'a'len. Yom mi la' choc, come tic'biletla ti lac Yum.