Read Chol Josue 1 Bible Online

Josue 1 - Chol bible

Josue 1

¹Moisés i winicʌch lac Yum. Che' chʌmenix Moisés, lac Yum tsi' pejca Josué i yalobil Nun tsa' bʌ i pi'le Moisés ti' ye'tel:

²Tsa'ix chʌmi c winic Moisés. Yom ma' chajpan a bʌ wʌle. Yom ma' c'axel ti ili colem ja' i c'aba' Jordán a wic'otob pejtel ili israelob. Yom ma' majlel ti jini lum mu' bʌ caj cʌq'ueñetla.

³Tsa'ix cʌq'ueyetla jini lum che' bajche' tsac wʌn sube Moisés. Pejtelel jini lum ya' ba' ma' cha'len xʌmbal a cha'añʌch,

⁴c'ʌlʌl ya' ti tiquin bʌ lum, yic'ot ya' ti lum i c'aba' Líbano, c'ʌlʌl ti colem ja' i c'aba' Eufrates. A cha'añʌch pejtelel i lumal heteojob, c'ʌlʌl ti colem ja' ya' ti' tojel i bʌjlibal q'uin.

⁵Ma'anic majch mi caj i mʌjlel i cha'an che' mi' contrajiñet, che' wʌ'to añet ti pañimil. Che' bajche' tsa' ajniyon quic'ot Moisés mi cajñel quic'otet ja'el. Ma'anic mi caj j cʌyet ti a bajñelil. Mach p'ump'unic mi caj j cʌyet.

⁶Yom ma' p'ʌtesan a bʌ. Yom ch'ejlet, come mi caj a t'oxben ili lum jini winicob x'ixicob cha'an mi' ch'ʌmob. Jiñʌch jini lum mu' bʌ caj cʌq'ueñob che' bajche' tsac wʌn sube a ñojte'elob.

⁷Cojach yom ma' ch'ejl'esan a bʌ. Yom ch'ejlet cha'an ma' wen jac' pejtelel c mandar tsa' bʌ i subeyet c winic Moisés. Toj jach yom ma' majlel. Mach yomic ma' xoyben i bijlel Moisés mi ti a ñoj mi ti a ts'ej. Che' jini mi caj i mʌjlel a cha'an ti pejtelel chuqui ma' mel.

⁸Mach yomic ma' cʌy a sub jini mandar. Yom ma' chʌn ña'tan ti a pusic'al ti q'uiñil yic'ot ti ac'ʌlel cha'an ma' jac', cha'an ma' mel pejtelel jini ts'ijbubil bʌ ti mandar. Che' jini mi caj a cha'len xʌmbal ti uts'at. Pejtelel mu' bʌ a mel mi caj i loq'uel ti uts'at.

⁹Jiñʌch c mandar woli bʌ c subeñet. Yom ma' p'ʌt'esan a bʌ. Yom ch'ejlet. Mach a cha'len bʌq'uen. Mach yomic ma' lujb'an. Come lac Yum Dios mi caj i yajñel a wic'ot baqui jach ma' majlel. Che' tsi' yʌlʌ lac Yum.

¹⁰Josué tsi' yʌq'ueyob mandar jini año' bʌ i ye'tel:

¹¹Yom mi la' ñumel ti yojlil ya' ba' woli' jijlelob israelob. Yom mi la' subeñob: “Chajpanla i bʌl lac ñʌc', come ti yuxp'ejlel q'uin mi caj la' c'axel ya' ti Jordán ja' cha'an mi la' wochel ti jini lum mu' bʌ i yʌq'ueñetla lac Yum Dios. Mi caj la' ch'ʌm jini lum ti la' wenta”, che'en.

¹²Che' ja'el Josué tsi' subeyob jini rubeñob yic'ot jini gadob yic'ot manasesob, i pi'ʌlo' bʌ efraiñob:

¹³Yom mi la' ña'tan jini t'an tsa' bʌ i subeyetla Moisés jini i winic lac Yum: “Lac Yum Dios mi caj i yʌq'ueñetla ili lum. Mi caj la' wajñel ti xuc'ul”, che'en Moisés.

¹⁴La' wijñam yic'ot la' walobilob yic'ot la' wʌlac' mi caj i cʌytʌlob ti ili lum tsa' bʌ i yʌq'ueyetla Moisés. Ma'anic mi caj i c'axelob ti Jordán ja'. Pero jatetla yic'ot pejtel jini ch'ejlo' bʌ mi caj la' c'axel ñaxan ti' tojel la' pi'ʌlob. Yom chajpʌbiletla cha'an guerra.

¹⁵Yom mi la' coltan la' pi'ʌlob israelob jinto lac Yum Dios mi' yʌc'ob ti ochel cha'an xuc'ul mi yajñelob che' bajche' jatetla. Mi caj i ch'ʌmob ti wenta i lumob. Ti' wi'il mi caj la' cha' sujtel ti la' lumal tsa' bʌ la' ch'ʌmʌ. Jiñʌch la' lumal tsa' bʌ i yʌq'ueyetla Moisés i winic lac Yum ti junwejl Jordán ja' ya' ti' tojel i pasibal q'uin. Che' tsi' yʌlʌ Josué.

¹⁶Tsi' jac'beyob Josué. Tsi' yʌlʌyob: Mi caj c mel lojon pejtelel mu' bʌ a subeñon lojon. Mi caj c majlel lojon baqui jach a wom.

¹⁷Che' bajche' tsac jac'be lojon pejtelel tsa' bʌ i yʌlʌ Moisés, che'ʌch ja'el mi caj c jac'beñet lojon. Yom mi' yajñel lac Yum Dios a wic'ot che' bajche' tsa' ajni yic'ot Moisés.

¹⁸La' tsʌnsʌntic jini mu' bʌ i ñusʌbeñet a mandar, jini mach bʌ anic mi' jac'beñet a t'an ti pejtelel. Cojach yom ma' p'ʌt'esan a bʌ. Yom ch'ejlet. Che' tsi' yʌlʌyob jini rubeñob yic'ot gadob yic'ot manasesob.