Read Chol Josue 12 Bible Online

Josue 12 - Chol bible

Josue 12

¹Jini israelob tsi' tsʌnsayob jini yumʌlob. Tsi' ch'ʌmbeyob i lumal tac am bʌ ti junwejl jini Jordán ja' ya' ba' mi' pasel q'uin, c'ʌlʌl ti pa' i c'aba' Arnón, c'ʌlʌl ti wits i c'aba' Hermón, yic'ot pejtel jini Arabá ba' mi' pasel q'uin. Jiñʌch i c'aba' tac jini yumʌlob:

²Sehón i yum amorreojob chumul bʌ ti Hesbón tsa' bʌ i cha'le yumʌl ti Aroer, ya' ti' ti' ja' i c'aba' Arnón am bʌ ti jini joctʌl, yic'ot ti ojlil jini Galaad c'ʌlʌl ti ja' i c'aba' Jaboc, ba'an i cayajón jini amoñob.

³Yic'ot ba'an jini ja' i c'aba' Arabá c'ʌlʌl ti ja' i c'aba' Cineret ba' mi' pasel q'uin, c'ʌlʌl ti ja' i c'aba' Arabá, am bʌ i cha'chajplel i c'aba' Ats'am ba' mi' pasel q'uin, ti' bijlel Betjesimot yic'ot ba'an Teman am bʌ ti yentʌlal Pisga.

⁴Og jini yumʌl am bʌ ti Basán, juntiquil refaim tsa' bʌ colobaji, chumul bʌ ti Astarot yic'ot ti Edrei.

⁵Tsi' cha'le yumʌl ya' ti wits i c'aba' Hermón yic'ot ti Salca, yic'ot ti Basán c'ʌlʌl ti' cayajon Gesur yic'ot Maaca, yic'ot ti ojlil Galaad c'ʌlʌl ti' cayajon Sehén i yum Hesbón.

⁶Jiñʌch yumʌlob tsa' bʌ tsʌnsʌntiyob cha'an Moisés i winic lac Yum yic'ot jini israelob. Moisés tsi' yʌq'ueyob i lum jini rubeñob yic'ot gadob yic'ot jini manasesob, i pi'ʌlob jini efraiñob.

⁷Josué yic'ot jini israelob tsi' tsʌnsayob jini yumʌlob ya' ti junwejl Jordán ja' ti' tojel i bʌjlibal q'uin. Tsi' ch'ʌmbeyob i lum ti Baalgad am bʌ ti joctʌl i c'aba' Líbano c'ʌlʌl ti Seir wits. Josué tsi' t'oxbeyob jini lum jini israelob ti mojt ti mojt.

⁸An tac ti wits jini lum, yic'ot ti joctʌl tac, yic'ot ba'an jini ja' i c'aba' Arabá, yic'ot ti bujtʌl tac, yic'ot ti jochol bʌ lum, yic'ot ti Neguev. Jiñʌch i lum jini heteojob, jini amorreojob, jini cananeojob, jini ferezeojob, jini heveojob, yic'ot jini jebuseojob,

⁹yic'ot i yumob: I yum Jericó, i yum Hai lʌc'ʌl bʌ ti Betel, i yum Jerusalén, i yum Hebrón, i yum Jarmut, i yum Laquis, i yum Eglón, i yum Gezer, i yum Debir, i yum Geder, i yum Horma, i yum Arad, i yum Libna, i yum Adulam, i yum Maceda, i yum Betel, i yum Tapúa, i yum Hefer, i yum Afec, i yum Sarán, i yum Madón, i yum Hazor, i yum Simronmerón, i yum Acsaf, i yum Taanac, i yum Meguido, i yum Cedes, i yum Jocneam ya' ti Carmelo, i yum Dor, i yum Goim ya' ti Gilgal, i yum Tirsa. An junlujuntiquil i cha'c'al (31) yumʌlob ti pejtelelob.