Read Chol Josue 13 Bible Online

Josue 13 - Chol bible

Josue 13

¹Ti jimbʌ ora anix i jabilel Josué. Lac Yum tsi' sube: Anix a jabilel. An to cabʌl lum maxto bʌ anic tsi' ch'ʌmʌyob ti' wenta jini israelob.

²Maxto ch'ʌmbilic i cha'añob: pejtelel i lum filisteojob, pejtelel i lum gesureojob,

³am bʌ ti Sihor, am bʌ ti' tojel Egipto ba' mi' pasel q'uin, c'ʌlʌl ti' cayajon Ecrón am bʌ ti norte. Jiñʌch i lumal cananeojob. An jo'tiquil i yumob filisteojob, jini año' bʌ ti Gaza, Asdot, Ascalón, Gat, yic'ot Ecrón, yic'ot pejtelel i lum aveojob am bʌ ti sur.

⁴Pejtelel i lum jini cananeojob ya' ti joctʌl tac i cha'añʌch jini sidoniojob c'ʌlʌl ti Afec, c'ʌlʌl ti cayajon cha'an jini amorreojob.

⁵I lum jini giblajob, pejtelel jini Líbano am bʌ ti pasibal q'uin ti Baalgad am bʌ ti yentʌlal jini wits i c'aba' Hermón c'ʌlʌl ti yochib Hamat.

⁶Mi caj c choc loq'uel pejtelel jini ya' bʌ chumulob ti wits tac ba'an jini Líbano c'ʌlʌl ti Misrefotmaim yic'otob pejtelel jini sidoniojob. Yom ma' wʌq'ueñob israelob jini lum che' bajche' tsa cʌq'ueyet mandar.

⁷T'oxbeñob jini lum jini bolonmojt israelob yic'ot lamital i p'olbal Manasés i pi'ʌl bʌ Efraín.

⁸Come i p'olbal Manasés yic'ot rubeñob yic'ot jini gadob tsa'ix i ch'ʌmbeyob i lum tsa' bʌ aq'uentiyob cha'an Moisés ya' ti junwejl Jordán ja' ba' mi' pasel q'uin. Come che'ʌch tsi' yʌq'ueyob Moisés i winic lac Yum.

⁹Ya' jaxʌl i cayajon ti Aroer ba' mi' ñumel jini ja' i c'aba' Arnón yic'ot ti jini tejclum am bʌ ti ojlil jini joctʌl yic'ot pejtelel jini joctʌl ti yojlil Medeba yic'ot Dibón.

¹⁰Tsa' aq'uentiyob ja'el pejtelel i tejclum tac Sehón i yum amorreojob tsa' bʌ i cha'le yumʌl ti Hesbón, c'ʌlʌl ti' cayajon amoñob.

¹¹Tsa' aq'uentiyob jini Galaad, yic'ot i lum gesureojob, yic'ot i lum maacateojob, yic'ot pejtelel jini wits Hermón, yic'ot pejtelel Basán c'ʌlʌl ti Salca,

¹²yic'ot pejtelel i lumal Og ya' ti Basán, ya' ba' tsi' cha'le yumʌl ti Astarot yic'ot ti Edrei. Jini jach Og tsa' cʌle ti' tojlel i pi'ʌlob jini refaíjob. Moisés tsa' mʌjli i cha'an. Tsi' laj chocoyob loq'uel.

¹³Pero jini israelob ma'anic tsi' chocoyob loq'uel jini gesureojob yic'ot jini maacateojob. C'ʌlʌl wʌ'to añob yic'ot jini israelob wʌle.

¹⁴Ma'anic tsa' aq'uenti lum i p'olbal Leví. Jini majtañʌl mu' bʌ i yʌq'uentel lac Yum i Dios Israel i cha'añʌch Leví che' bajche' tsi' subeyob lac Yum.

¹⁵Moisés tsi' yʌq'ueyob i lum i p'olbal Rubén che' bajche' c'amel jini otot tac.

¹⁶Tsa' aq'uentiyob jini rubeñob jini lum: Jini am bʌ ti Aroer am bʌ ti ti' ja' i c'aba' Arnón, yic'ot jini tejclum am bʌ ti ojlil jini joctʌl yic'ot pejtelel jini joctʌl ti junwejl Medeba c'ʌlʌl ti Hesbón.

¹⁷Yic'ot pejtelel tejclum tac am bʌ ti joctʌl: Dibón, Bamot Baal, Betbaalmeón,

¹⁸Jahaza, Cademot, Mefaat,

¹⁹Quiriataim, Sibma, Zaretsahar am bʌ ti bujtʌl ti ojlil jini joctʌl,

²⁰Betpeor, jini wits i c'aba' Pisga, Betjesimot,

²¹pejtelel jini tejclum tac am bʌ ti joctʌl, pejtelel jini lum i cha'an Sehón i yum amorreojob tsa' bʌ i cha'le yumʌl ti Hesbón. Moisés tsi' tsʌnsa Sehón yic'ot ja'el jini yumʌlob ti Madián, Evi, Requem, Zur, Hur, Reba. Jiñʌch yumʌlob ti' tojlel Sehón chumulo' bʌ ti lum.

²²Jini israelob tsi' tsʌnsayob ja'el Balaam jini yujil bʌ wujt, i yalobil Beor. Tsi' tsʌnsayob yaño' bʌ ja'el.

²³Ya' jaxʌl i lumob jini rubeñob ti Jordán ja'. Pejtelel ili tejclum tac yic'ot xchumtʌl tac i cha'añʌch jini rubeñob che' bajche' c'amel i yotot tac.

²⁴Moisés tsi' yʌq'ueyob i lum i p'olbal Gad che' bajche' i yonlel jini otot tac. Jiñʌch i lum:

²⁵Jazer yic'ot pejtelel i tejclum tac Galaad, ojlil jini lum i cha'an amoñob c'ʌlʌl ti Aroer ya' ti' tojel Rabá,

²⁶ti Hesbón c'ʌlʌl ti Ramat Mizpa yic'ot Betonim, ti Mahanaim c'ʌlʌl ti' cayajon i lum Debir,

²⁷jini Betaram Betnimra yic'ot Sucot yic'ot Zafón am bʌ ti joctʌl. Jiñʌch i yumʌntel Sehón tsa' bʌ i cha'le yumʌl ti Hesbón. Ya' jaxʌl ti Jordán ja' c'ʌlʌl ti ñajb i c'aba' Cineret ti' tojel Jordán ba' mi' pasel q'uin.

²⁸Pejtelel ili tejclum tac yic'ot xchumtʌl tac i cha'añʌch jini gadob che' bajche' c'amel i yotot tac.

²⁹Moisés tsi' yʌq'ueyob i lum i p'olbalob Manasés, i pi'ʌl bʌ Efraín, che' bajche' c'amel i yotot tac. Jiñʌch i lum:

³⁰Mahanaim yic'ot pejtelel Basán, pejtelel i lum Og jini yumʌl ti Basán, pejtelel jini xchumtʌl tac am bʌ ti Jair ya' ti Basán, an uxc'al xchumtʌl tac.

³¹Ojlil jini Galaad, yic'ot Astarot yic'ot Edrei, jiñʌch i tejclum tac Og, yumʌl ti Basán. Tsa' aq'uentiyob lamital i yalobilob Maquir (i yalobil bʌ Manasés) che' bajche' c'amel i yotot tac.

³²Moisés tsi' t'oxbeyob jini lum jini uxmojt israelob yic'ot lamital i p'olbal Manasés. An tac ti joctʌl i c'aba' Moab, ti' tojel Jordán ja' ba' mi' pasel q'uin.

³³Pero ma'anic tsi' yʌq'ue i lum i p'olbal Leví, come lac Yum i Dios Israel i cha'anʌch Leví che' bajche' tsi' yʌlʌ. Jini mi caj i coltañob.