Read Chol Josue 14 Bible Online

Josue 14 - Chol bible

Josue 14

¹Jiñʌch jini lum tsa' bʌ i ch'ʌmʌyob jini israelob ya' ti Canaán. Jini motomaj Eleazar yic'ot Josué i yalobil Nun, yic'ot jini tatʌlo' bʌ tsi' t'oxbeyob jini israelob.

²Lac Yum tsi' sube Moisés ti mandar cha'an mi' cha'len yajcaya ti alas ti' tojlelob jini bolonmojt yic'ot lamital Manasés. Jiñobʌch i p'olbalob Israel.

³Moisés tsi' yʌq'ueyob i lum jini ojlil i yuxp'ejl tribu* ti' tojel Jordán ja' ba' mi' pasel q'uin. Pero ma'anic tsi' yʌq'ue i lum jini levíjob.

⁴An cha'tiquil i yalobilob José, jiñʌch Manasés yic'ot Efraín, i wentajʌch cha'mojt israelob. Jini cha'an ma'anic tsa' aq'uentiyob i lum jini levíjob. Jini jach tsa' aq'uentiyob jini tejclum tac ba' tsa' chumleyob. Tsa' aq'uentiyob ja'el potrero tac cha'an i yʌlac'ob.

⁵Jini israelob tsa' t'oxbentiyob jini lum che' bajche' lac Yum tsi' yʌq'ue mandar Moisés.

⁶Tsa' c'otiyob i p'olbal Judá ba'an Josué ya' ti Gilgal. Caleb i yalobilʌch Jefone, jini cenezeo. Caleb tsi' sube Josué: C'ajal a cha'an chuqui lac Yum tsi' sube Moisés i winic Dios ya' ti Cades Barnea. Tsi' yʌq'ueyonla albil bʌ t'an ti lac cha'ticlel.

⁷Anix cha'c'al c jabilel che' bʌ tsi' chocoyon majlel Moisés i winic lac Yum cha'an mij cʌn jini lum. Toj tsac tsictesa.

⁸C pi'ʌlob tsa' bʌ majliyob quic'ot tsi' yotsʌbeyob i ch'ijiyemlel i pusic'al winicob x'ixicob. Pero joñon xuc'ul tsac tsajca lac Yum Dios ti pejtelel c pusic'al.

⁹Ti jim bʌ ora tsi' yʌc'ʌ i t'an Moisés: “Jini lum ya' ba'añet a cha'añʌch. I cha'añʌch a walobilob mu' bʌ caj i tilel ja'el, come xuc'ul tsa' ts'ʌctesʌbe chuqui yom lac Yum Dios”, che'en.

¹⁰Lac Yum tsa'ix i coltayon che' bajche' tsi' yʌlʌ. Anix jo'p'ejl i yuxc'al (45) jab Moisés tsi' yʌlʌ ili t'an tic tojlel che' woliyob ti xʌmbal jini israelob ti colem bʌ i tiquiñal lum. Wʌle anix jo'p'ejl i jo'c'al (85) c jabilel.

¹¹C'ʌlʌl wʌle p'ʌtʌlon to che' bajche' ti jini q'uin che' bʌ tsi' chocoyon majlel Moisés. Ch'ejlon to. Mu' to mejlel c cha'len guerra che' bajche' ti wajali.

¹²Aq'ueñon wʌle jini lum am bʌ ti wits che' bajche' tsi' yʌlʌ lac Yum. Ya' añob jini anaceojob che' bajche' tsa' wubi ti jim bʌ ora. Colem i tejclum tac. Wen chajpʌbilob cha'an guerra. Mi cʌl lac Yum mi caj i coltañon. Che' jini mi mejlel c chocob loq'uel che' bajche' lac Yum tsi' subu, che'en.

¹³Josué tsi' yʌq'ue i yutslel i t'an Caleb. Tsi' yʌq'ue i ch'ʌm jini lum am bʌ ti Hebrón.

¹⁴Jini cha'an Hebrón i cha'añʌch Caleb i yalobil Jefone jini cenezeo yic'ot i yalp'eñelob c'ʌlʌl wʌle, come xuc'ul tsi' mele jini tsa' bʌ i yʌlʌ lac Yum i Dios Israel.

¹⁵I c'aba' Hebrón ti ñaxan jiñʌch Quiriat Arba. Jini Arba jiñʌch ñuc bʌ winic ti' tojlel anaceojob. Tsa' ñʌjch'i guerra ti jini tejclum tac.