Read Chol Josue 15 Bible Online

Josue 15 - Chol bible

Josue 15

¹Jiñʌch jini lum tsa' bʌ aq'uenti i p'olbalob Judá che' bajche' c'amel añob ti' yotot tac. Ya' jaxʌl i cayajon Edom ti jochol bʌ lum i c'aba' Zin c'ʌlʌl ti Neguev am bʌ ti sur,

²ya' ti' ti' jini Ñajb i c'aba' Ats'am, ya' ba' tsa' majli ja' ti Neguev.

³I cayajon tsa' c'axi ti sur ya' ba' mi' letsel ti Acrabim. Tsa' ñumi ba'an Zin. Tsa' c'axi ti' tojel Cades Barnea ti sur. Tsa' ñumi ba'an Hezrón. Tsa' c'axi ti Adar. Tsa' joy ñumi ba'an Carca.

⁴Tsa' c'axi ba'an Asmón. Tsa' c'oti ba'an jini ja' am bʌ ti Egipto. Ya' jaxʌl ti colem ñajb. Jiñʌch jini cayajon am bʌ ti sur.

⁵Jini cayajon am bʌ ti' pasibal q'uin jiñʌch najb i c'aba' Ats'am c'ʌlʌl ya' ba' mi' loq'uel jini Jordán ja' ti jini najb. Jini cayajon am bʌ ti norte tsa' c'axi ba'an ñajb ya' ba' mi' loq'uel Jordán ja'

⁶c'ʌlʌl ti Bethogla. Tsa' c'axi ti Betarabá c'ʌlʌl ti xajlel i cha'an Bohán i yalobil Rubén.

⁷Tsa' c'axi ti Debir am bʌ ti joctʌl i c'aba' Acor. Tsa' joy ñumi ti norte ba'an Gilgal ti' tojel jini wits i c'aba' Adumín am bʌ ti joctʌl ya' ti sur. Tsa' c'axi jini cayajon ya' ti ja' ba'an Ensemes. Tsa' c'oti ti Rogel.

⁸Tsa' c'axi jini cayajon ba'an jini joctʌl i c'aba' Ben Hinom ti' tojel jini jebuseojob ti sur, jiñʌch Jerusalén. Tsa' c'axi ti' jol wits am bʌ ti' tojel Hinom ba' mi' bʌjlel q'uin, am bʌ ti joctʌl i c'aba' Refaim ya' ti norte.

⁹Che' jini tsa' c'axi loq'uel jini cayajon ti' jol wits c'ʌlʌl tsa' c'oti ti ja' i cha'an Neftoa. Tsa' c'axi ba'an jini tejclum tac am bʌ ti wits i c'aba' Efrón. Tsa' c'oti ba'an Baala. Jiñʌch Quiriat Jearim.

¹⁰Tsa' ñumi ti Baala c'ʌlʌl tsa' c'oti ti' tojel Seir ba' mi' bʌjlel q'uin. Tsa' c'axi ti' tojel jini wits i c'aba' Jearim ti norte. Jiñʌch Quesalón. Tsa' c'axi ti Betsemes yic'ot ti Timna.

¹¹Tsa' ñumi jini cayajon c'ʌlʌl tsa' c'oti ti' tojel jini Ecrón am bʌ ti norte, yic'ot ti Sicrón. Tsa' c'axi ti wits i c'aba' Baala. Tsa' c'oti ti Jabneel yic'ot ti ñajb.

¹²Ya' jaxʌl ti' bʌjlibal q'uin ba'an colem ñajb. Jiñʌch pejtelel i lum i p'olbalob Judá che' bajche' c'amel jini otot tac.

¹³Tsa' aq'uenti lum jini Caleb i yalobil Jefone ti' tojlel jini año' bʌ ti Judá che' bajche' lac Yum tsi' sube Josué. Jiñʌch Hebrón ya' ti' lum Quiriat Arba. Jini Arba i tatʌch jini anaceojob.

¹⁴Caleb tsi' choco loq'uel jini uxtiquil anaceojob i p'olbalo' bʌ Anac, i c'aba'ob Sesai, Ahimán yic'ot Talmai.

¹⁵Caleb tsi' contraji jini año' bʌ ti Debir. I c'aba' wajali jiñʌch Quiriat Sefer.

¹⁶Caleb tsi' yʌlʌ: Jini mu' bʌ i contrajin Quiriat Sefer, mu' bʌ i ch'ʌme', joñon mi caj cʌq'uen Acsa jini xch'oc bʌ calobil cha'an i yijñam, che'en.

¹⁷Tsi' ch'ʌmʌ Otoniel i yalobil Cenez i yeran Caleb. Caleb tsi' yʌq'ue i pʌy jini xch'oc i c'aba' Acsa.

¹⁸Che' bʌ tsi' pʌyʌ Otoniel, Acsa tsi' xic'be cha'an mi' c'ajtiben lum ti' tojlel i tat. Acsa tsa' jubi ti burro cha'an mi' pejcan i tat. Caleb tsi' c'ajtibe: ¿Chuqui a wom? che'en.

¹⁹Acsa tsi' jac'ʌ: Awocolic, pʌsbeñon i yutslel a t'an. Tsa'ix a wʌq'ueyon jini tiquin bʌ lum am bʌ ti Neguev. Aq'ueñon cuxul bʌ ja' ja'el, che'en. Jini cha'an Caleb tsi' yʌq'ue jini cuxul bʌ ja' am bʌ ti chan yic'ot jini am bʌ ti entʌl.

²⁰Jiñʌch i lumob tsa' bʌ aq'uentiyob i p'olbal Judá, che' bajche' c'amel jini otot tac.

²¹Jiñʌch i lum Judá ya' ba' jaxʌl ba'an Edom am bʌ ti sur: Cabseel, Edar, Jagur, Cina, Dimona, Adada, Cedes, Hazor, Itnán, Zif, Telem, Bealot, Hazor Hadata, Queriot, Hezrón (jiñʌch Hazor), Amam, Sema, Molada, Hazargada, Hesmón, Betpelet, Hazarsual, Beerseba, Bizotia, Baala, Iim, Esem, Eltolad, Quesil, Horma, Siclag, Madmana, Sansana, Lebaot, Silhim, Aín yic'ot Rimón, bolomp'ejl i cha'c'al (29) tejclum tac yic'ot jini xchumtʌl tac ti pejtelel.

³³Jiñʌch tejclum tac am bʌ ti joctʌl: Estaol, Zora, Asena, Zanoa, Enganim, Tapúa, Enam, Jarmut, Adulam, Soco, Azeca, Saaraim, Aditaim, Gedera yic'ot Gederotaim, chʌnlujump'ejl (14) tejclum yic'ot jini xchumtʌl tac.

³⁷Zenán, Hadasa, Migdalgad, Dileán, Mizpa, Jocteel, Laquis, Boscat, Eglón, Cabón, Lahmam, Quitlis, Gederot, Betdagón, Naama yic'ot Maceda, wʌclujump'ejl (16) tejclum yic'ot jini xchumtʌl tac. Libna, Eter, Asán, Jifta, Asena, Nezib, Keila, Aczib yic'ot Maresa, bolomp'ejl tejclum tac yic'ot jini xchumtʌl tac. Ecrón yic'ot jini xchumtʌl tac.

⁴⁶Pejtelel jini tejclum tac an tac bʌ ti ojlil yic'ot Ecrón yic'ot jini ñajb, pejtelel jini tejclum tac lʌc'ʌl ba'an Asdod yic'ot jini xchumtʌl tac.

⁴⁷Asdod yic'ot jini xchumtʌl tac, Gaza yic'ot jini xchumtʌl tac c'ʌlʌl ti ja' am bʌ ti Egipto yic'ot i ti' jini colem bʌ ñajb.

⁴⁸Jini an tac bʌ ti wits jiñʌch iliyi: Samir, Jatir, Soco, Dana, Quiriatsana (jiñʌch Debir), Anab, Estemoa, Anim, Gosén, Holón yic'ot Gilo, junlujump'ejl tejclum yic'ot jini xchumtʌl tac. Arab, Duma, Esán, Janum, Bettapúa, Afeca, Humta, Quiriat Arba (jiñʌch Hebrón) yic'ot Sior, bolomp'ejl tejclum yic'ot jini xchumtʌl tac. Maón, Carmel, Zif, Juta, Jezreel, Jocdeam, Zanoa, Caín, Gabaa yic'ot Timna, lujump'ejl tejclum tac yic'ot jini xchumtʌl tac. Halhul, Betsur, Gedor, Maarat, Betanot yic'ot Eltecón, wʌcp'ejl tejclum tac yic'ot xchumtʌl tac. Quiriat Baal (jiñʌch Quiriat Jearim) yic'ot Rabá, cha'p'ejl tejclum tac yic'ot jini xchumtʌl tac. Jini an tac bʌ ti tiquin bʌ lum: Betarabá, Midín, Secaca, Nibsán, Irmelac Engadi, wʌcp'ejl tejclum tac yic'ot jini xchumtʌl tac.

⁶³Jini winicob año' bʌ ti Judá ma'anic tsa' mejli i chocob loq'uel jini jebuseojob chumulo' bʌ ti Jerusalén. Lajal woliyob ti chumtʌl ti Jerusalén jini jebuseojob yic'otob judíojob c'ʌlʌl wʌle.