Read Chol Josue 18 Bible Online

Josue 18 - Chol bible

Josue 18

¹Tsi' tempayob i bʌ pejtelelob jini israelob ya' ti Silo. Ya' tsi' wa'chocoyob jini Tabernáculo, jini pisil bʌ i yotot lac Yum. Tsa'ix i ch'ʌmʌyob jini tejclum tac am bʌ ti' joytilel.

²An to wucmojt israelob maxto bʌ anic tsa' aq'uentiyob i lumob.

³Jini cha'an Josué tsi' subeyob: ¿Baqui to ora mi caj la' majlel cha'an mi la' ch'ʌm ti la' wenta jini lum tsa' bʌ i yʌq'ueyetla lac Yum i Dios la' ñojte'el?

⁴Yom mi la' wa'chocon u'uxtiquil ti jujunmojt la' p'olbal. Mi caj cʌq'ueñob i ye'tel cha'an mi' ñumelob majlel ti pejtelel jini lum. Mi caj i ts'ijbañob ti jun bajche' an jini lum cha'an mi' tsictiyel bajche' yom mi' t'oxtʌl tac.

⁵Mi caj i t'oxob jini lum ti wucpejt. Judá mi caj i cʌytʌl ti' tojel jini sur. José mi caj i cʌytʌl ti' tojel jini norte.

⁶Yom mi la' tsictesan ti jun bajche' yilal jini wucpejt lum. Ch'ʌmbeñon tilel cha'an mic t'oxbeñob che' bajche' tsi' yʌc'ʌ i t'an lac Yum Dios.

⁷Ma'anic mi caj i tajob i lum jini levíjob, come jini e'tel ti motomaj jiñʌch tsa' bʌ aq'uentiyob ti lac Yum. Tsa'ix aq'uentiyob i lum jini Gad, Rubén yic'ot Manasés, i pi'ʌl bʌ Efraín, come Moisés i winic lac Yum tsi' yʌq'ueyob i lum ti junwejl Jordán ja' ya' ba' mi' pasel q'uin, che'en.

⁸Josué tsi' subeyob jini winicob: Yom mi la' ñumel majlel ti pejtelel jini lum. Yom mi la' mel i planojlel. Yom mi la' cha' ch'ʌmbeñon tilel. Che' jini mi caj c yajcan ti alas ti' tojlel lac Yum wʌ' ti Silo, che'en.

⁹Tsa' majliyob jini winicob i xʌñob ñumel jini lum. Tsi' t'oxoyob ti wucpejt. Wi'ilix tsa' cha' sujtiyob ba'an Josué ya' ti Silo.

¹⁰Che' jini Josué tsi' cha'le yajcaya ti alas bajche' yom ti' tojlel lac Yum. Tsi' t'oxbeyob i lum israelob ti mojt ti mojt che' bajche' yom.

¹¹Tsa' aq'uenti i lum Benjamín che' bajche' c'amel i yotot tac: Ti ojlil an i lum Benjamín. Ti jujunwejl an i lum Judá yic'ot José.

¹²Jini cayajon am bʌ ti norte tsa' tejchi ya' ti Jordán ja'. Tsa' c'axi ti' tojel Jericó am bʌ ti norte. Tsa' majli ti' tojel i bʌjlibal q'uin ya' ba'an wits. Tsa' c'oti ti tiquin bʌ lum i c'aba' Betavén.

¹³Tsa' c'axi ti Luz, jiñʌch Betel, ti' tojel sur. Tsa' c'axi ti Atarotadar. Tsa' ñumi ti wits tac ti' tojel Bethorón am bʌ ti sur.

¹⁴Xotol tsa' majli ti' bʌjlibal q'uin. Wi'ilix tsa' loq'ui ti Bethorón cha'an mi' majlel ti' tojel jini sur. Tsa' c'oti ti Quiriat Baal am bʌ i cha'chajplel i c'aba' Quiriat Jearim, jump'ejl tejclum i cha'an Judá. Jiñʌch cayajon am bʌ ti' bʌjlibal q'uin.

¹⁵Jini cayajon am bʌ ti sur tsa' tejchi ti Quiriat Jearim. Tsa' c'axi ti' tojel i bʌjlibal q'uin ba'an jini cuxul bʌ ja i c'aba' Neftoa.

¹⁶Tsa' c'axi ti' tojel jini wits ba'an i joctʌl Ben Hinom am bʌ ti' tojel jini joctʌl Refaim am bʌ ti norte. Tsa' c'axi ti joctʌl i cha'an Hinom, ti' tojel sur ba' chumulob jini jebuseojob ti jini wits. Tsa' c'axi ti jini ja' i cha'an Rogel.

¹⁷Xotol tsa' majli ti' tojel jini norte. Tsa' c'axi ti Ensemes yic'ot ti Gelilot, am bʌ ti' tojel Adumín. Tsa' jubi majlel ba'an jini xajlel i cha'an Bohán i yalobil Rubén.

¹⁸Tsa' c'axi ti wits am bʌ ti' tojel jini Arabá am bʌ ti norte. Tsa' jubi majlel ti jini ja' i c'aba' Arabá.

¹⁹Tsa' ñumi ti wits ti' tojel Bethogla am bʌ ti norte. Tsa' c'oti ba'an jini colem Ñajb Ats'am ya' ti norte ba' mi' loq'uel jini Jordán ja'. Ya' jaxʌl jini cayajon ti sur.

²⁰Jini Jordán ja' jiñʌch cayajon am bʌ ti' pasibal q'uin. Ya' tsa' aq'uentiyob i lumob jini año' bʌ ti Benjamín che' bajche' c'amel i yotot tac.

²¹Jini año' bʌ ti Benjamín tsa' aq'uentiyob i lum yic'ot tejclum tac che' bajche' c'amel i yotot: Jericó, Bethogla, jini joctʌl cha'an Casis, Betarabá, Zemaraim, Betel, Avim, Pará, Ofra, Quefar Haamoni, Ofni yic'ot Geba, lajchʌmp'ejl tejclum yic'ot jini xchumtʌl tac. Gabaón, Ramá, Beerot, Mizpa, Cafira, Mozah, Requem, Irpeel, Tarala, Zela, Elef, Jebús (jiñʌch Jerusalén), Gabaa yic'ot Quiriat. Chʌnlujump'ejl (14) tejclum yic'ot jini xchumtʌl tac. Jiñʌch i lumob tsa' bʌ aq'uentiyob i p'olbalob Benjamín che' bajche' an i yonlel i yotot tac.