Read Chol Josue 2 Bible Online

Josue 2 - Chol bible

Josue 2

¹Josué tsi' choco loq'uel ti Sitim cha'tiquil stsajiyajob. Tsi' chocoyob majlel ti mucul. Tsi' subeyob: Yom mi la' joy ñumel ti jini tejclum tac cha'an mi la' q'uel bajche' an, che'en. Tsa' majliyob c'ʌlʌl che' bʌ tsa' c'otiyob ti Jericó ya' ti' yotot juntiquil ts'i'lel bʌ x'ixic, i c'aba' Rahab. Tsa' ochiyob ti jini otot cha'an mi' jijlelob.

²Tsa' subenti jini rey ti Jericó: Tsa' juliyob winicob israelob ti ili ac'ʌlel cha'an mi' tsajiñob lac tejclum, che'en.

³Jini rey ti Jericó tsi' choco majlel t'an ba'an Rahab cha'an mi' suben: Pʌybeñon tilel jini winicob tsa' bʌ c'otiyob ya' ba' añet, come tsa' jach tiliyob cha'an mi' tsajiñob lac tejclum, che'en.

⁴Pero jini x'ixic tsi' sube jini cha'tiquil winicob cha'an mi' mujcuñob i bʌ. Jini x'ixic tsi' sube i winic rey: Isujm tsa' tiliyob winicob wʌ' ba' añon, pero mach cujilic baqui ch'oyolob, che'en.

⁵Che' bʌ tsa' ic'a tsac ñup'u i ti' cotot. Tsa' loq'uiyob jini winicob. Mach cujilic baqui tsa' majliyob. Sajcanla majlel ti ora. Mux la' tajob, che'en Rahab.

⁶Pero che' maxto c'otemic i winic jini rey, jini x'ixic tsi' subeyob letsel ti' jol otot. Ya' tsi' mucuyob ba' lʌtsbil jam c'uxbil bʌ i wut.

⁷I winicob jini rey tsi' sajcayob majlel ti' bijlel Jordán c'ʌlʌl ba'an c'axibal ti ja'. Tsa' ñujpi i ti' tejclum che' bʌ tsa' loq'uiyob majlel ti sajcaya.

⁸Che' maxto anic tsa' wʌyiyob jini winicob, jini x'ixic tsa' letsi ya' ti' jol otot i subeñob:

⁹Cujilʌch la' Yum tsa'ix i yʌq'ueyetla ili lum, come tsa'ix caji c bʌc'ñañet lojon. Tsa' toj sajtiyob i pusic'al pejtel xchumtʌlob ti ili lum cha'añetla,

¹⁰come tsa'ix cubi lojon chuqui tsi' melbeyetla la' Yum. Tsi' tsʌc'mesa jini colem ja', i c'aba' Chʌchʌc Bʌ, che' bʌ tsa' loq'uiyetla ti Egipto. Tsa'ix cubi lojon chuqui tsa' la' tumbe jini cha'tiquil rey, Sehón yic'ot Og, ya' ti junwejl Jordán. Tsa' la' jisa jini amorreojob.

¹¹Tsa' toj sajti c pusic'al lojon che' bʌ tsa cubi lojon. Mach chʌn tijicñayobix i pusic'al winicob ti la' tojlel. Come la' Yum Dios Diosʌch ya' ti panchan yic'ot ti pañimil.

¹²Jini cha'an mij c'ajtibeñetla ti wocol t'an cha'an mi la' wa'chocobeñon la' t'an ti' tojlel la' Yum. Che' bajche' tsac p'untayetla che'ʌch yom mi la' melbeñon yic'ot c pi'ʌlob ti' yotot c tat. Pʌsbeñon mi isujm mi caj la' coltañon.

¹³Ac'ʌ la' t'an cha'an mi la' coltan c tat yic'ot c ña' yic'ot querañob yic'ot pejtelel i cha'año' bʌ. Mach mi la' wʌc'on lojon ti tsʌnsʌntel, che'en.

¹⁴Jini winicob tsi' jac'ʌyob: Lajal yom mic chʌmel lojon la' wic'ot mi ma'anic tsa' ts'ʌctiyi lojon jini c t'an. Jini jach mach yomic ma' sub chuqui wolic mel lojon. Che' tsa'ix i yʌq'ueyon lojon ili lum lac Yum, mi caj j q'uelet lojon ti' yutslel c pusic'al lojon ti isujm, che'ob.

¹⁵Che' jini ili x'ixic tsi' cʌchʌ lazo ya' ti q'ueloñib. Tsi' ju'sayob ti lum, come ya'an i yotot ti' ts'ajquil tejclum. Ya' tsa' chumle ti ts'ajc.

¹⁶Tsi' subeyob: Cucuxla ti wits cha'an ma'anic mi' tajetla jini woli bʌ i sajcañetla. Ya' yom mi la' muc la' bʌ uxp'ejl q'uin, jinto mi' sujtelob jini woli bʌ i sajcañetla. Ti wi'il mi mejlel la' majlel ti la' bijlel, che'en.

¹⁷Jini winicob tsi' subeyob: Mi mach isujmic a t'an, librejon lojon cha'an jini t'an tsa' bʌ cʌlʌ lojon.

¹⁸Awilan, che' mi cochel lojon ti ili lum, yom ma' cʌch jini lazo ya' ti ventana ba' tsa' ju'sayon lojon. Yom ma' tempan ti a wotot a tat yic'ot a ña' yic'ot a werañob yic'ot pejtelel i pi'ʌlob a tat.

¹⁹Majqui jach mi' loq'uel ti' ti' a wotot bʌbʌq'uen mi' chʌmel. Mach c mulic lojon. Pero c mulʌch lojon majqui jach mi' chʌmel mi tsa' ochi ti a wotot.

²⁰Mi tsa' tsictesa ti' tojlel jini año' bʌ ti tejlum, mach wersajix mi caj j coltañet lojon che' bajche' tsac subeyet lojon, che'ob.

²¹Jini x'ixic tsi' yʌlʌ: La' ujtic che' bajche' ma' wʌl, che'en. Che' bʌ tsa' majliyob, tsi' cʌchʌ jini chʌchʌc bʌ chij ti q'ueloñib.

²²Che' jini tsa' majliyob c'ʌlʌl ti wits ba' tsa' cʌleyob uxp'ejl q'uin jinto tsa' cha' sujtiyob jini tsa' bʌ i yajñesayob. Jini x'ajñesajob tsi' lon sʌclayob ñumel ya' ti bij, pero ma'anic tsi' tajayob.

²³Che' jini ili cha'tiquilob tsa' loq'uiyob jubel ti wits. Tsa' c'axiyob ti colem ja'. Tsa' sujtiyob ba'an Josué. Tsi' subeyob pejtelel tsa' bʌ ujti ti' tojlelob.

²⁴Tsi' subeyob: Lac Yum woli' yʌc' ti laj c'ʌb pejtel i lumal. Woli' toj sajtelob i pusic'al jini ya' bʌ chumulob, che'ob.