Read Chol Josue 21 Bible Online

Josue 21 - Chol bible

Josue 21

¹Jini levíjob año' bʌ i ye'tel tsa' c'otiyob ba'an jini motomaj Eleazar, yic'ot ba'an Josué i yalobil Nun, yic'ot ba' añob jini israelob año' bʌ i ye'tel ti mojt ti mojt.

²Tsa' c'otiyob ti Silo am bʌ ti' lumal Canaán. Tsi' yʌlʌyob: Lac Yum tsi' sube Moisés cha'an mux cʌq'uentel lojon lum tac baqui mic chumtʌl lojon yic'ot potrero tac ja'el cha'an c wacax lojon. Che'ʌch tsi' yʌlʌyob jini levíjob.

³Jini cha'an jini israelob tsi' yʌq'ueyob levíjob i lum tac yic'ot potrero tac ya' ti' tojlelob.

⁴Jini coatajob tsa' aq'uentiyob uxlujump'ejl (13) tejclum tac ya' ti Judá, Simeón yic'ot Benjamín. Jini levíjob i p'olbalobʌch Aarón.

⁵Yambʌ coatajob tsi' tajayob lujump'ejl tejclum ya' ti Efraín, ti Dan, yic'ot ti Manasés. Tsa' aq'uentiyob che' bajche' c'amel i yotot tac. Tsa' yajcʌnti tac ti alas.

⁶Tsa' aq'uentiyob i p'olbalob Gersón uxlujump'ejl tejclum ya' ti Isacar, ti Aser, ti Neftalí, yic'ot ti' tojlel lamital i p'olbal Manasés chumul bʌ ti Basán. Tsa' yajcʌnti tac ti alas che' bajche' c'amel i yotot tac.

⁷I p'olbalob tsa' aq'uentiyob lajchʌmp'ejl tejclum tac ya' ti Rubén, ti Gad yic'ot ti Zabulón.

⁸Jini israelob tsi' yʌq'ueyob levíjob ili tejclum tac yic'ot i lumob. Tsi' cha'leyob yajcaya ti alas. Che'ʌch tsi' meleyob che' bajche' lac Yum tsi' sube Moisés.

⁹Jini israelob tsi' yʌq'ueyob levíjob tejclum tac ya' ti Judá yic'ot ti Simeón.

¹⁰Tsa' aq'uentiyob i p'olbalob Aarón jini tsa' bʌ i yila pañimil ti Coat, come ñaxan tsi' cha'le yajcaya ti alas cha'an Coat.

¹¹Tsa' aq'uentiyob Quiriat Arba yic'ot jini potrero tac. Arba i tatʌch Anac. Tsa' otsʌbenti i c'aba' ti Hebrón. An ti wits i cha'an Judá.

¹²Pero i cha'añʌch Caleb i yalobil Jefone jini jamil tac ti' joytilel tejclum yic'ot jini xchumtʌl tac.

¹³I p'olbalob jini motomaj Aarón tsa' aq'uentiyob Hebrón. Jiñʌch tejclum ba' mi' mejlel ti puts'el jini mu' bʌ i cha'len tsʌnsa. Tsa' aq'uentiyob ja'el: Libna yic'ot i lum, Jatir yic'ot i lum, Estemoa yic'ot i lum, Holón yic'ot i lum, Debir yic'ot i lum,

¹⁶Aín yic'ot i lum, Juta yic'ot i lum, Betsemes yic'ot i lum, bolomp'ejl tejclum ya' ti' lumal ili cha'mojt israelob, Judá yic'ot Simeón.

¹⁷Tsa' aq'uentiyob ja'el jini tejclum tac yic'ot i lum ya' ti Benjamín: Gabaón, Geba,

¹⁸Anatot, Almón, chʌmp'ejl tejclum tac.

¹⁹I p'olbal jini motomaj Aarón tsa' aq'uentiyob uxlujump'ejl tejclum tac yic'ot i lum.

²⁰I colojbal jini otot tac cha'an Coat tsa' aq'uentiyob tejclum tac ja'el. Tsa' aq'uentiyob i p'olbalob levíjob tsa' bʌ i yilayob pañimil ti Coat. Jintacʌch tejclum tsa' bʌ aq'uentiyob ya' ti Efraín.

²¹Tsa' aq'uentiyob Siquem ya' ti wits i cha'an Efraín. Jiñʌch tejclum ba' mi' mejlel ti puts'el jini tsa' bʌ i cha'le tsʌnsa. Tsa' aq'uentiyob ja'el ili tejclum tac yic'ot i lum: Gezer, Kibsaim, Bethorón, chʌmp'ejl tejclum ti pejtelel.

²³Tsa' aq'uentiyob ili tejclum tac yic'ot i lum ya' ti Dan: Elteque, Gibetón, Ajalón, Gatrimón, chʌmp'ejl tejclum.

²⁵Tsa' aq'uentiyob ili tejclum tac yic'ot i lum ya' ti' tojlel Manasés i pi'ʌl bʌ Efraín: Taanac, Gatrimón, cha'p'ejl tejclum.

²⁶Tsa' aq'uentiyob yambʌ coatajob lujump'ejl tejclum yic'ot i lum.

²⁷Tsa' aq'uentiyob jini levíjob tsa' bʌ i yilayob pañimil ti' tojlel Gersón jini tejclum Golan am bʌ ti Basán yic'ot i lum ba' mi' mejlel ti puts'el jini mu' bʌ i cha'len tsʌnsa. Tsa' aq'uentiyob yambʌ tejclum i c'aba' Beestera yic'ot i lum, cha'p'ejl tejclum.

²⁸Tsa' aq'uentiyob ili tejlum tac yic'ot i lumob ya' ti Isacar: Cisón, Daberat, Jarmut, Enganim, chʌmp'ejl tejclum tac.

³⁰Tsa' aq'uentiyob ili tejclum tac yic'ot i lumob ya' ti Aser: Miseal, Abdón, Helcat, Rehob, chʌmp'ejl tejclum tac.

³²Tsa' aq'uentiyob uxp'ejl tejclum yic'ot i lumob ya' ti Neftalí: Cedes am bʌ ti Galilea ba' mi' mejlel ti puts'el jini mu' bʌ i cha'len tsʌnsa, Hamotdor, Cartán.

³³I p'olbalob Gersón tsa' aq'uentiyob uxlujump'ejl tejclum yic'ot i lumob che' bajche' c'amel i yotot tac.

³⁴Jini yaño' bʌ i cha'año' bʌ Merari, i p'olbalo' bʌ Leví, tsa' aq'uentiyob chʌmp'ejl tejclum yic'ot i lumob ya' ti Zabulón: Jocneam, Carta, Dimna, Naalal.

³⁶Tsa' aq'uentiyob chʌmp'ejl tejclum yic'ot i lumob ya' ti Rubén: Beser, Jahaza, Cademot, Mefaat.

³⁸Tsa' aq'uentiyob chʌmpejt lum tac yic'ot i lumob loq'uem tac bʌ ti Gad: Ramot am bʌ ti Galaad ba' mi' mejlel ti puts'el jini tsa' bʌ i cha'le tsʌnsa, Mahanaim, Hesbón, Jazer.

⁴⁰Jini lajchʌmpejt lum tac yic'ot i lumob lum tac tsa' aq'uentiyob i cha'año' bʌ Merari, i colobal bʌ levíjob, che' bajche' c'amel i yotot tac.

⁴¹An cha'c'al yic'ot waxʌcp'ejt (48) lum tac yic'ot jini lum an tac bʌ ti' tojlelob israelob tsa' bʌ aq'uentiyob ti' wenta levíjob.

⁴²Ti jujump'ejl lum tac añob i lum. Che'ʌch an ti pejtelel.

⁴³Jiñʌch bajche' lac Yum tsi' yʌq'ueyob israelob pejtel jini lum che' bajche' tsi' wʌn subeyob i ñojte'elob. Ya' ba' tsi' ch'ʌmʌyob ti' wenta jini lum tsa' chumleyob.

⁴⁴Lac Yum tsi' yʌq'ueyob i ñʌch'tʌlel ti' tojlel pejtelel año' bʌ ti' joytilel, che' bajche' tsi' wʌn subeyob i ñojte'elob. Ma'anic majch tsa' mʌjli i cha'an ti' tojlelob, come lac Yum tsi' yʌc'ʌ i contrajob ti' c'ʌb.

⁴⁵Ti pejtelel jini wʌn albil bʌ i cha'an lac Yum tsa' ts'ʌctiyi ti uts'at che' ti' tojlel israelob bajche' tsi' wʌn subeyob.