Read Chol Josue 22 Bible Online

Josue 22 - Chol bible

Josue 22

¹Josué tsi' pʌyʌ tilel jini rubeñob yic'ot jini gadob yic'ot lamital jini Manasés i pi'ʌlob Efraín.

²Tsi' subeyob: Tsa'ix la' wen jac'ʌ jini tsa' bʌ i subeyetla Moisés i winic lac Yum. Tsa'ix la' wen jac'beyon c t'an tsa' bʌ c subeyetla ja'el.

³Ma'anic tsa' la' cʌyʌ la' pi'ʌlob. C'ʌlʌl ti ili ora tsa'ix la' wen jac'be i t'an la' Yum Dios.

⁴Lac Yum Dios tsa'ix i yʌq'ueyob la' pi'ʌlob i ñʌch'tʌlel ti' tojlel i contrajob. Jini cha'an sujtenixla majlel ti la' chumlib ti jini lum tsa' bʌ i yʌq'ueyetla Moisés i winic lac Yum ya' ti junwejl Jordán ja'.

⁵Yom tsajaletla cha'an mi la' jac' ti ts'ʌcʌl jini t'an yic'ot jini mandar tsa' bʌ i subeyetla Moisés i winic lac Yum. Yom mi la' c'uxbin lac Yum Dios. Cha'lenla xʌmbal ti' bijlel. Yom mi la' jac'ben i mandar. Yom mi la' tsajcan majlel. Yom xuc'ul mi la' wajñel ti pejtelel la' pusic'al, che'en Josué.

⁶Josué tsi' yʌq'ueyob i yutslel i t'an. Tsi' cʌyʌyob ti' bij. Tsa' sujtiyob majlel ti' chumlib tac.

⁷Moisés tsa'ix i yʌq'ueyob i lum lamital i p'olbalob Manasés (i pi'ʌl bʌ Efraín) ya' ti Basán. Jini cha'an Josué tsi' yʌq'ueyob i lum i pi'ʌlob Manasés año' bʌ ti' tojel Jordán ja' ya' ti' bʌjlibal q'uin. Josué tsi' yʌq'ueyob i yutslel i t'an ja'el. Tsi' chocoyob sujtel ba'an i chumlib tac.

⁸Tsi' subeyob: Che' mi la' sujtel majlel ti la' chumlib, yom mi la' t'oxbeñob la' pi'ʌlob jini chubʌ'añʌl tsa' bʌ la' taja ti' tojlel la' contrajob, cabʌl wacax, plata, oro, c'ʌnc'ʌn taq'uin, cabʌl pisil tac, che'en.

⁹Jini rubeñob, yic'ot jini gadob, yic'ot i cha'año' bʌ Manasés tsa' loq'uiyob ti' tojlel jini israelob año' bʌ ti Silo am bʌ ti Canaán. Tsa' majliyob ti jini lum am bʌ ti Galaad tsa' bʌ aq'uentiyob. Come tsa'ix i ch'ʌmʌyob ti' wenta jini lum che' bajche' lac Yum tsi' wʌn sube Moisés.

¹⁰Che' bʌ tsa' c'otiyob ti jini lum am bʌ ti Canaán lʌc'ʌl bʌ ti Jordán ja', jini rubeñob yic'ot gadob yic'ot i cha'año' bʌ Manasés tsi' meleyob pulʌntib lʌc'ʌl ti Jordán ja'. Colem tsi' meleyob i pulʌntib i majtan Dios cha'an mi' wen tsictiyel.

¹¹Jini israelob tsi' yubiyob che' bʌ tsi' meleyob jini pulʌntib jini rubeñob yic'otob gadob yic'ot manasesob. Melbil jini pulʌntib ti' lumal Canaán lʌc'ʌl ti Jordán ja' ti' tojelob jini israelob.

¹²Che' bʌ tsi' yubiyob jini israelob, tsi' laj tempayob i bʌ ya' ti Silo cha'an mi' contrajiñob ti guerra.

¹³Jini israelob tsi' chocoyob majlel Finees i yalobil jini motomaj Eleazar ya' ti' lumal Galaad ba' añob jini rubeñob yic'ot gadob yic'otob manasesob.

¹⁴Tsa' majli yic'ot lujuntiquil winicob, loq'uemo' bʌ ti jujunmojt israelob. Ti jujuntiquil tatʌlʌch ti' yotot ti' tojlel israelob.

¹⁵Che' bʌ tsa' c'otiyob ba' añob jini rubeñob yic'ot jini gadob yic'ot jini manasesob año' bʌ ti Galaad, tsi' subeyob:

¹⁶Pejtelel i cha'año' bʌ lac Yum woli' c'ajtibeñetla: “¿Chucoch tsa' la' ñusʌbe i t'an i Dios Israel? Tsa' la' cʌyʌ Dios che' bʌ tsa' la' mele jini pulʌntib, come tsa' la' chan'esa la' bʌ ti' tojlel Dios.

¹⁷Ña'tanla bajche' tsa' la' mele mulil ya' ti Peor. An to yom lac sʌq'uesʌntel cha'an jini mulil. Jini cha'an tsa' cajiyob ti wen c'amʌjel i cha'año' bʌ lac Yum.

¹⁸¿Chucoch wolix la' cha' cʌy lac Yum ti ili ora? Tsa'ix la' cʌyʌ lac Yum wʌle. Jini cha'an ijc'ʌl mi caj i mich'leñob pejtelel i cha'año' bʌ Israel.

¹⁹Mi mach wʌ'ic an lac Yum ti la' tojlel ti ili lum tsa' bʌ la' ch'ʌmʌ, yom mi la' c'axel ya' ba'an i lum lac Yum ya' ba' wa'chocobil jini Tabernáculo. Ch'ʌmʌla lum tic tojlel lojon. Mach yomic mi la' chan'esan la' bʌ ti' tojlel lac Yum mi tic tojlel lojon, come che'ʌch woli la' mel che' mi la' bajñel mel i pulʌntib i majtan Dios. Anix i pulʌntib i majtan lac Yum Dios.

²⁰Na'tanla bajche' Acán (i yalobil Zera) tsi' ñusʌbe i t'an Dios che' bʌ tsi' ch'ʌmʌ jini tic'bil bʌ chubʌ'añʌl. Jini cha'an Dios tsi' mich'le pejtelel jini israelob. Mach jinic jach Acán tsa' chʌmi cha'an i mul”, che'ob.

²¹Che' jini Efraín tsi' jac'ʌyob jini rubeñob yic'ot jini gadob yic'otob manasesob. Tsi' subeyob:

²²Jini P'ʌtʌl Bʌ, jini lac Yum Dios, jini P'ʌtʌl Bʌ, jini lac Yum Dios mi' ch'ʌmben isujm. La' i ch'ʌmbeñob isujm jini israelob ja'el. Mi tsa'ix c chañ'esa lojon c bʌ ti' tojlel Dios, mi tsa'ix c ñusʌbe lojon i t'an, mach la' coltañon lojon.

²³Mi tsa'ix c mele lojon i pulʌntib cha'an mic pulben lojon i majtan, cha'an mi cʌq'uen lojon i majtan tac yic'ot majtañʌl cha'an wocolix i yʌlʌ, la' i melon lojon lac Yum.

²⁴Tsa' jach c mele lojon cha'an bʌq'uen, ame talobic la' walobilob i subeñob calobil lojon: “¿Chuqui to la' we'tel ti' tojlel lac Yum i Dios Israel?

²⁵Ya' jaxʌl c lum lojon ti' ti' Jordán ja' che' bajche' lac Yum tsi' yʌlʌ. Jatetla rubeñob yic'ot gadob, ma'anic chuqui an la' cha'an ti lac Yum”, ame che'icob. Che' jini la' walobilob mi mejlel i tic'ob calobilob lojon cha'an ma'anix mi' chʌn bʌc'ñañob lac Yum.

²⁶Jini cha'an tsac ña'ta lojon c melben lojon jump'ejl i pulʌntib i majtan Dios, mach cha'anic mic pulben lojon i majtan mi cha'anic mic tsʌnsʌben lojon i majtan.

²⁷Pero tsac mele lojon cha'an mic chʌn ña'tan lojon Dios quic'ot calobilob lojon. Che' jini mi mejlel c tsictesan lojon i cha'añon lojon Dios lajal bajche' jatetla. Yom mic ch'ujutesan lojon lac Yum ti' yʌc'ol pulbil bʌ majtañʌl yic'ot ti yʌc'ol ja'el yan tac bʌ majtañʌl. Che' jini la' walobilob ma'anic mi caj i subeñob calobilob lojon: “Jatetla ma'anic chuqui la' we'tel ti lac Yum”, che'ob.

²⁸Tsac ña'ta lojon, mi tsi' subeyoñob lojon, o mi tsi' subeyob calobil lojon, mi mejlel cʌl lojon: “Ya'an i pulʌntib i majtan lac Yum che' bajche' tsi' meleyob lac ñojte'el. Anquese mach cha'anic pulbil bʌ i majtan lac Yum mi cha'anic yambʌ i majtan, an i c'ʌjñibal cha'an ma'anic mi lac t'ox lac bʌ”.

²⁹Ma'anic wolic chañ'esan lojon c bʌ ti' tojlel lac Yum. Ma'anic wolij cʌy lojon lac Yum cha'an parte mic melben lojon i pulʌntib cha'an pulbil bʌ i majtan yic'ot yambʌ majtañʌl tac. An jach jump'ejl i pulʌntib i majtan lac Yum Dios ya' ti' tojel i Tabernáculo. Che' tsi' yʌlʌyob jini rubeñob yic'ot gadob yic'ot manasesob.

³⁰Jini motomaj i c'aba' Finees yic'ot año' bʌ i ye'tel yic'ot tatʌlob ti' tojlel Israel uts'at tsi' yubibeyob i t'an jini rubeñob yic'ot gadob yic'ot manasesob.

³¹Finees tsi' yʌlʌ: Wʌle cujil lojon wʌ'ʌch an lac Yum la quic'ot. Ma'anic chuqui jontol tsa' la' mele ti' tojlel lac Yum. Ma'anic tsa' la' xic'beyob israelob ti mulil cha'an mi' yʌq'uentelob wocol ti' tojlel lac Yum, che'en.

³²Che' jini, jini motomaj Finees i yalobil Eleazar yic'ot jini año' bʌ i ye'tel tsi' cʌyʌyob rubeñob yic'ot gadob. Tsa' sujtiyob i tsictesʌbeñob jini israelob ya' ti Canaán jini t'an tsa' bʌ i yubiyob.

³³Tijicñayob i pusic'al jini israelob che' bʌ tsi' yubiyob. Tsi' subeyob wocolix i yʌlʌ Dios. Ma'anix tsi' chʌn ña'tayob i tech guerra ti' contra jini rubeñob yic'ot gadob.

³⁴Jini rubeñob yic'ot jini gadob tsi' yʌlʌyob: Jini i pulʌntib mi' yʌc' ti tsictiyel ti lac tojlel cha'an lac tem cha'an jach lac Yum Dios. Tsa' otsʌbenti i c'aba' Testigo bʌ Pulʌntib.