Read Chol Josue 23 Bible Online

Josue 23 - Chol bible

Josue 23

¹Che' ñumeñix cabʌl ora lac Yum tsi' yʌq'ueyob israelob i ñʌch'tʌlel i pusic'al ti' tojlel i contrajob año' bʌ ti' joytilel. Anix cabʌl i jabilel Josué.

²Tsi' pʌyʌ tilel pejtelel israelob yic'ot año' bʌ i ye'tel yic'ot tatʌlob ti Israel yic'ot jini juezob yic'ot jini wa'chocobilo' bʌ. Tsi' subeyob: Anix cabʌl c jabilel.

³Tsa'ix la' q'uele pejtelel tsa' bʌ i mele lac Yum Dios ti' tojlel la' contrajob cha'an mi yʌq'ueñetla jini lum, come jiñʌch lac Yum Dios tsa' bʌ i coltayetla ti guerra.

⁴Tsa'ix c t'oxbeyetla la' lum ti jujunmojt i p'olbal Israel. Tsac chilbeyob i lumal jini winicob x'ixicob tsa' bʌ c jisa ti la' tojlel, yic'ot yaño' bʌ maxto bʌ chocbilob loq'uel c'ʌlʌl ti Jordán ja' c'ʌlʌl ti colem ñajb ba' mi' bʌjlel q'uin.

⁵Lac Yum Dios tsi' chocoyob loq'uel cha'an mi yʌq'ueñetla. Tsi' chocoyob loq'uel cha'an mi' la' ch'ʌmben i lum che' bajche' lac Yum Dios tsi' wʌn aq'ueyetla i t'an.

⁶Yom ch'ejletla che' jini. Yom mi la' jac'ben pejtelel i mandar Moisés che' bajche' ts'ijbubil. Mach yomic mi la' xoy la' bijlel mi ti la' ñoj mi ti la' tsej.

⁷Mach yomic mi la' wajñel la' wic'ot jini winicob x'ixicob tsa' bʌ cʌleyob ti la' tojlel. Mach yomic mi la' pejcʌben i dioste'. Mach yomic mi la' taj ti t'an i diosob. Mach yomic mi la' ch'ujutesan.

⁸Yom xuc'ul mi la' tsajcan lac Yum Dios che' bajche' woli la' mel c'ʌlʌl wʌle.

⁹Come lac Yum Dios tsa'ix i chocoyob loq'uel yumʌlob ti la' tojlel, jini p'ʌtʌl tac bʌ yic'ot ñuc tac bʌ. Ma'anic majqui tsa' mejli i contrajiñet c'ʌlʌl wʌle.

¹⁰Juntiquil mi mejlel i yajñesan jump'ejl mil, come lac Yum Dios mi' coltañetla ti guerra che' bajche' tsi' subeyetla.

¹¹Yom mi la' cʌntan la' bʌ che' jini. Yom mi la' c'uxbin lac Yum Dios.

¹²Mi tsa' la' tʌts'ʌ la' bʌ, mi tsa' cajiyetla ti tem ajñel la' wic'ot jini tsa' bʌ cʌleyob ti la' lumal, mi tsa' la' cha'le ñujpuñel la' wic'ot, mi tsa' la' xʌbʌ la' bʌ yic'otob,

¹³yom mi la' ña'tan ma'anix mi caj i chʌn chocob loq'uel ti la' tojlel lac Yum Dios. Mi caj i soquetla. Mi caj i chuquetla che' bajche' ti yac. Mi caj i ju'sʌbenet la' pusic'al che' bajche' ti asiyal. Mi caj i yʌp la' wut cha'an ma'anix mi la' ch'ʌmben isujm. Che' jini mi caj la' jilel.

¹⁴Wʌle mi caj c chʌmel che' bajche' pejtelel año' bʌ ti pañimil. Yom mi la' ña'tan ti pejtelel la' pusic'al ma'anic chuqui anto yom mi' ts'ʌctiyel ti pejtelel chuqui tsi' subeyetla lac Yum Dios. Tsa'ix laj ts'ʌctiyi.

¹⁵Pero che' bajche' tsa'ix ts'ʌctiyi ti la' tojlel pejtel jini t'an tsa' bʌ i wʌn subeyetla lac Yum Dios, che'ʌch mi mejlel i yʌq'ueñet la' wubin pejtelel jini wocol tac c'ʌlʌl mi' jisañetla loq'uel ti ili uts'at bʌ lum tsa' bʌ i yʌq'ueyetla.

¹⁶Mi tsa'ix la' ñusʌbe jini xuc'ul bʌ i t'an lac Yum Dios tsa' bʌ i yʌq'ueyetla, cha'an mi la' tsajcan dioste' tac, cha'an mi la' ch'ujutesan yambʌ dios tac, lac Yum mi caj i mich'leñetla. Ora jach mi caj la' jilel ti ili uts'at bʌ lum tsa' bʌ i yʌq'ueyetla. Che' tsi' yʌlʌ Josué.