Read Chol Josue 4 Bible Online

Josue 4 - Chol bible

Josue 4

¹Che' bʌ tsa'ix lu' c'axiyob ti Jordán ja' jini israelob, lac Yum tsi' sube Josué:

²Yajcan lajchʌntiquil winicob ti' tojlel israelob, jujuntiquil ti jujunmojt israelob.

³Yom ma' subeñob: Ch'ʌmʌla lajchʌmp'ejl xajlel loq'uem bʌ ti' yojlil Jordán ja' ya' ba' tsa' wa'leyob jini motomajob. Yom mi la' ch'ʌm majlel la' wic'ot c'ʌlʌl ba' mi caj la' jijlel ti ili ac'ʌlel, che'en.

⁴Josué tsi' pʌyʌ jini lajchʌntiquil israelob tsa' bʌ wa'chocontiyob, loq'uemo' bʌ ti jujunmojt israelob.

⁵Tsi' subeyob: Cucula ti ojlil Jordán ba'an jini Arca i cha'an lac Yum Dios. Q'uechela tilel jump'ejl xajlel ti jujuntiquiletla. Yom jump'ejl xajlel cha'an jujunmojt israelob.

⁶Jiñʌch i yejtal ti la' tojlel che' mi' c'ajtibeñetla la' walobilob: “¿Chuqui i wentʌjlel cha'añetla ili xajlel tac?” che'ob.

⁷Mi caj la' subeñob: “Tsi' t'oxo i bʌ jini Jordán ja' ti' tojel Arca che' bʌ tsa' c'axiyon lojon”, che'etla. Jini xajlel tac mi caj i yʌq'ueñob i chʌn ña'tan jini israelob ti pejtelel ora, che'en.

⁸Jini winicob tsi' meleyob che' bajche' Josué tsi' subeyob. Tsi' q'uecheyob loq'uel lajchʌmp'ejl xajlel ti' yojlil Jordán ja', jump'ejl xajlel cha'an jujunmojt israelob. Tsi' q'uecheyob tilel c'ʌlʌl ya' ba' tsa' c'otiyob ti jijlel. Ya' tsi' ju'sayob cʌytʌl.

⁹Josué tsi' lʌtsʌ cʌytʌl yambʌ ti' yojlil Jordán ja' ya' ba' tsa' wa'leyob motomajob q'uechel bʌ i cha'añob jini Arca ba' lotol jini Xuc'ul bʌ T'an. Ya'to an c'ʌlʌl wʌle.

¹⁰Jini motomajob q'uechel bʌ i cha'an Arca tsa' wa'leyob ti' yojlil Jordán ja' c'ʌlʌl jinto tsa' ts'ʌctiyi pejtel i t'an lac Yum che' bajche' tsi' sube Josué. Josué tsi' cha' subeyob winicob. Tsa' ts'ʌctiyi ti pejtelel che' bajche' Moisés tsi' sube Josué. Tsa' c'axiyob ti ora jini winicob x'ixicob.

¹¹Che' bʌ tsa'ix ujti ti c'axel pejtelel israelob, tsa' c'axiyob jini motomajob yic'ot jini Arca i cha'an lac Yum.

¹²Jini rubeñob yic'ot gadob yic'ot junmojt manasesob ñaxan tsa' c'axiyob, chajpʌbilo' bʌ cha'an guerra. Wi'il tsa' c'axiyob yaño' bʌ israelob che' bajche' Moisés tsi' wʌn subeyob.

¹³Cha'c'al ti mil soldadojob tsolocña tsa' ñumiyob majlel ti mojt ti mojt. Tsa' c'otiyob ti jini joctʌl am bʌ ti' tojel Jericó.

¹⁴Ti jim bʌ ora lac Yum tsi' yʌq'ue i ñuclel Josué. Ñuc tsi' q'ueleyob winicob che' bajche' tsa' q'uejli ti ñuc Moisés che' anto ti pañimil.

¹⁵Lac Yum tsi' yʌq'ue Josué tsiji' bʌ i mandar:

¹⁶Subeñob motomajob q'uechel bʌ i cha'añob Arca: “Loq'uenla ti Jordán ja'”. Che'ʌch yom ma' subeñob, che'en lac Yum.

¹⁷Jini cha'an Josué tsi' yʌc'ʌ mandar: Loq'uenla ti Jordán ja', che'en.

¹⁸Jini motomajob tsa' cajiyob ti letsel loq'uel q'uechel bʌ i cha'añob jini Arca. Che' bʌ tsa' c'otiyob ba' tiquin lum, ti ora tsa' cha' caji ti bujt'el jini ja'. Tsa' cha' caji ti ajñel che' bajche' ti ñaxan.

¹⁹Che' ti 25 de marzo jini winicob x'ixicob tsi' cʌyʌyob jini Jordán ja'. Tsa' jijliyob ti Gilgal ti' tojel Jericó ba' mi' bʌjlel q'uin.

²⁰Ya' ti Gilgal Josué tsi' lʌtsʌ cʌytʌl jini lajchʌmp'ejl xajlel tsa' bʌ i ch'ʌmʌ loq'uel ti Jordán ja'.

²¹Tsi' subeyob israelob: Tal i yorajlel mi caj i c'ajtibeñetla la' walobilob: “¿Chuqui i sujmlel ili xajlel tac?” che'ob.

²²Che' jini mi cajel la' cʌntesañob: “Ya' ba' lʌtsʌl ili xajlel jini israelob tsa' c'axiyob ti Jordán ja' che' bajche' ti tiquin bʌ lum”, che'etla.

²³Come lac Yum Dios tsi' tsʌc'mesa jini ja' ti' wut israelob c'ʌlʌl tsa' c'axiyob majlel, che' bajche' tsi' tsʌc'mesa jini Chʌchʌc bʌ Ñajb ti wajali che' bʌ tsa' c'axiyonla.

²⁴Che' jini winicob x'ixicob ti pejtelel pañimil mi caj i ña'tañob wen p'ʌtʌl lac Yum. Mi caj i bʌc'ñañob lac Yum Dios ti pejtelel ora. Che' tsi' yʌlʌ Josué.