Read Chol Josue 6 Bible Online

Josue 6 - Chol bible

Josue 6

¹Ñup'ul jini tejclum Jericó, wen ñup'bil, come tsi' bʌc'ñayob jini israelob. Ma'anic majch tsa' mejli ti loq'uel ti ochel.

²Lac Yum tsi' sube Josué: Q'uele, joñon tsa'ix cʌq'ueyet Jericó, yic'ot i yumob, yic'ot pejtelel jini winicob yujilo' bʌ guerra.

³Yom mi la' joyojtan jini tejclum yic'ot pejtelel jini winicob yujilo' bʌ guerra. Yom mi' la' joyojtan junyajl ti jujump'ejl q'uin. Wʌcp'ejl q'uin yom mi la' joyojtan.

⁴Yom wuctiquil motomaj cha'an mi' ch'ʌmob majlel wucts'ijt trompeta melbil bʌ ti' xulub tat tiñʌme'. La' majlicob ñaxan ti' tojel jini Arca. Che' ti' wucp'ejlel q'uin, yom wucyajl mi la' joyojtan. Jini motomajob mi caj i wusob majlel jini trompeta.

⁵Che' ti wucyajlel la' i cha'leñob c'am bʌ t'an pejtelel soldadojob che' mi' caj ti wustʌl i xulub tat tiñʌme'. Che' mi la' wubin i t'an trompeta mi caj i bʌc' jejmel jini ts'ajc am bʌ ti' joytilel jini tejclum. Pejtelel jini soldadojob toj mi caj i yochelob ti tejclum ti jujuntiquil.

⁶Jini cha'an Josué i yalobil Nun tsi' pʌyʌ tilel jini motomajob. Tsi' yʌq'ueyob mandar: Ch'ʌmʌla majlel jini Arca yic'ot jini Xuc'ul bʌ T'an. Yom wuctiquil motomajob cha'an mi' ch'ʌmob majlel trompeta melbil bʌ ti' xulub tat tiñʌme'. Ñaxan yom mi' majlelob jini wuctiquil motomajob ti' tojel jini Arca, che'en Josué.

⁷Tsi' sube ja'el jini soldadojob: Cha'lenla xʌmbal. Joyojtanla jini tejclum. Ñaxan yom mi' majlelob jini winicob i cha'an Manasés, Rubén yic'ot Gad. Ti wi'il mi caj i majlel jini Arca i cha'an lac Yum, che'en.

⁸Awilan che' bʌ tsa' ujti i subeñob, tsa' c'axiyob ti' tojlel lac Yum jini wuctiquil motomajob ch'ʌmʌl i cha'añob i trompeta ti jujuntiquil. Ti wi'il tsa' c'axi jini Arca ba' lotol jini Xuc'ul bʌ i T'an lac Yum.

⁹Ñaxan tsa' majliyob jini winicob chajpʌbilo' bʌ cha'an guerra. Wi'ilix tsa' majliyob jini motomajob mu' bʌ i wusob trompeta. Jini xcʌntayajob tsa' tiliyob ti' pat jini Arca che' wolix ti wustʌl jini trompeta tac.

¹⁰Josué tsi' subeyob jini soldadojob cha'an ñʌch'ʌl jach mi' cha'leñob xʌmbal jinto che' i yorajlelix oñel.

¹¹Che' jini tsi' q'uecheyob ñumel jini Arca ti' joytʌlel jini tejclum. Junyajl tsi' joyojtayob jini tejclum. Che' jini tsa' sujtiyob majlel ba' mi' wʌyʌlob. Ya'i tsi' ñusayob jump'ejl ac'ʌlel.

¹²Wen seb to tsa' ch'ojyi Josué. Jini motomajob tsi' ch'ʌmʌyob jini Arca i cha'an lac Yum.

¹³Jini wuctiquil motomajob ch'ʌmʌl bʌ i cha'añob jini wucts'ijt trompeta tac tsa' majliyob ti' tojel Arca. Tsi' wusuyob trompeta che' bʌ tsa' majliyob. Wi'il tsa' majli jini Arca i cha'an lac Yum.

¹⁴Lajal tsi' cha' joyojtayob jini tejclum ti cha'p'ejlel q'uin. Tsa' cha' sujtiyob ba' jijlemob. Che'ʌch tsi' meleyob wʌcp'ejl q'uin.

¹⁵Pero ti wucp'ejlel q'uin tsa' ch'ojjiyob che' seb to. Tsi' joyojtayob jini tejclum che' bajche' ti yambʌ q'uin, pero ti ili q'uin wucyajl tsi' joyojtayob.

¹⁶Che' ti wucyajlel, jini motomajob tsi' wusuyob trompeta. Josué tsi' subeyob jini soldadojob: Cha'lenla oñel, come lac Yum tsa'ix i yʌq'ueyetla jini tejclum, che'en.

¹⁷Tsi' wʌn subeyob: Chocbil jini tejclum ti lac Yum. Pejtelel año' bʌ ti tejclum mi caj i jisʌntelob. Cojach jini ts'i'lel bʌ xixic Rahab mi caj i cʌytʌl yic'ot pejtelel año' bʌ ti' yotot, come tsi' colta jini winicob tsa' bʌ c choco lojon tilel.

¹⁸Yom mi la' tsajin la' bʌ cha'an mach mi la' mulan jini chocbil bʌ. Mach mi la' ch'ʌm, ame la' wʌc' ti chojquel i tejclum Israel ja'el, ame tilic wocol ti lac tojlelob.

¹⁹Mi caj la cʌq'uen lac Yum pejtelel jini oro yic'ot plata, yic'ot p'ejt tac melbil bʌ ti c'ʌnc'ʌn taq'uin yic'ot ti tsucul taq'uin. I cha'añʌch lac Yum. Wersa mi caj i lotbentel lac Yum, che'en.

²⁰Jini motomajob tsa' caji i wusob i trompeta. Che' bʌ tsi' yubiyob trompeta tac jini soldadojob, tsi' cha'leyob c'am bʌ oñel. Tsa' jejmi tac jini ts'ajc. Jini soldadojob tsa' ochiyob majlel ti tejclum. Toj tsa' ochiyob ti jujuntiquil. Tsi' ch'ʌmʌyob ti' wenta.

²¹Tsi' jisayob pejtelel am bʌ ti tejclum. Tsi' laj tsʌnsayob ti pejtelob, winicob, x'ixicob, ch'itoñob yic'ot xñox. Che' ja'el tsi' tsʌnsayob jini wacax, tiñʌme' yic'ot burro.

²²Josué tsi' subeyob jini cha'tiquil winicob tsa' bʌ chojquiyob majlel cha'an mi' cʌñob jini lum, cha'an mi' yochelob ti' yotot jini ts'i'lel bʌ x'ixic cha'an mi' pʌyob loq'uel Rahab yic'ot pejtelel i pi'ʌlob che' bajche' tsi' yʌq'ueyob i t'an.

²³Jini cha'an jini winicob tsi' pʌyʌyob loq'uel Rahab yic'ot i tat i ña' i yʌscuñob yic'otob pejtelel i pi'ʌlob año' bʌ ti' yotot. Tsi' yʌc'ʌyob ti parte ba' tempʌbilob israelob.

²⁴Tsi' puluyob jini tejclum yic'ot pejtelel i bʌl. Jini jach jini plata yic'ot oro yic'ot jini p'ejt tac melbil bʌ ti c'ʌnc'ʌn taq'uin yic'ot ti tsucul taq'uin tsi' yotsayob ti' yotot lac Yum.

²⁵Josué ma'anic tsi' tsʌnsa jini ts'i'lel bʌ x'ixic Rahab, yic'ot i pi'ʌlob año' bʌ ti' yotot, come tsi' colta jini winicob chocbilo' bʌ majlel cha'an Josué cha'an mi' q'uelob jini tejclum.

²⁶Che' jini Josué tsi' yʌlʌ ti' contra Jericó: Chocbil ti lac Yum jini winic mu' bʌ i cha' mel jini tejclum Jericó. Chocbil ti lac Yum yic'ot pejtelel i yalobilob yic'ot chuqui tac an ti' yotot, che'en.

²⁷Lac Yum Dios an yic'ot Josué. Ñuc tsa' q'uejli ti pejtelel pañimil.