Read Chol Josue 7 Bible Online

Josue 7 - Chol bible

Josue 7

¹Jini israelob tsi' ñusʌbeyob i t'an Dios. Acán (i yalobil Carmi, i yalobil bʌ Zabdi, i yalobil bʌ Zera tilemo' bʌ ti Judá) tsi' ch'ʌmʌ chuqui tac aq'uebil Dios. Dios tsi' mich'le israelob.

²Che' ya' añob ti Jericó, Josué tsi' choco majlel winicob ba'an jini tejclum i c'aba' Hai. Lʌc'ʌl Hai ba'an Betavén, am bʌ ti' tojel Betel ya' ti' pasibal q'uin. Tsi' subeyob majlel ti' lumal Hai.

³Tsa' cha' tiliyob ba'an Josué i subeñob: Mach yomic mi lac majlel ti lac pejtelel. Jasʌl jach cha'p'ejl o uxp'ejl mil cha'an mi' cha'leñob guerra ti' contra Hai. Mach wocolic mi lac ch'ʌm, come mach cabʌlobic ya' ti Hai, che'ob.

⁴Tsa' majliyob ti Hai uxp'ejl mil winicob, pero tsa' puts'iyob ti' tojlel jini ya' bʌ chumulob.

⁵Jini año' bʌ ti Hai tsi' tsʌnsayob wʌclujuntiquil i cha'c'al (36) israelob. Tsi' yajñesayob majlel c'ʌlʌl ti Sebarim. Tsi' tsʌnsayob yaño' bʌ ya' ba' woli' jubelob majlel. Che' jini tsa' jili i ch'ejlel i pusic'al israelob.

⁶Josué yic'ot jini añobix bʌ i jabilel tsi' tsiliyob i pislel cha'an tsi' meleyob i pusic'al. Tsi' pʌcchocoyob i bʌ ti lum ya' ba'an jini Arca i cha'an bʌ lac Yum c'ʌlʌl tsa' ic'a pañimil. Tsi' p'ujp'ujyob ts'ubejn ti' jol cha'an ch'ijiyem i pusic'al.

⁷Josué tsi' yʌlʌ: C Yum Dios, ¿chucoch tsa' wʌc'ʌyob ti c'axel ti Jordán ili winicob cha'an ma' wʌc'on lojon ti jisʌntel ti' c'ʌb jini amorreojob? Ñumen uts'at tsa'ic cʌleyon lojon ya' ti junwejl Jordán.

⁸C Yum, ¿chuqui mi mejlel c mel? Come laj contrajob tsa'ix mʌjliyob i cha'an.

⁹Che' mi' yubiñob jini cananeojob yic'ot pejtelel chumulo' bʌ ya' ti lum, mi caj i joy mʌctañon lojon. Mi caj i jisañon lojon. ¿Chuqui mi caj a mel che' jini, cha'an i ñuclel a c'aba'? che'en Josué.

¹⁰Lac Yum tsi' sube Josué: Ch'ojyen. ¿Chucoch ma' pʌcchocon a bʌ?

¹¹Jini israelob tsa'ix i cha'leyob mulil. Tsa'ix i ñusayob c t'an tsa' bʌ c subeyob. Tsa'ix i ch'ʌmʌyob jini tic'bil bʌ c cha'an. Tsa'ix i cha'leyob xujch'. Tsa'ix i xʌbʌ tac yic'ot i chubʌ'an.

¹²Jini cha'an mach chʌn mʌjlix i cha'añob ti' tojlel i contrajob. I contrajob mi caj i yajñesañob, come tsa'ix i yʌc'ʌyob i bʌ ti chojquel tic tojlel. Ma'anix mic chʌn ajñel la' wic'ot jinto mi la' jisan jini tsa' bʌ i cha'le xujch'.

¹³Sʌq'uesan jini israelob. Yom ma' subeñob: “Sʌq'uesan la' bʌ cha'an mi la' tempan la' bʌ ijc'ʌl, come lac Yum i Dios Israel mi' yʌl: Tsa'ix la' xujch'i c cha'an bʌ. Mach mʌjlic la' cha'an ti' tojlel la' contrajob jinto mi la' choc loq'uel jini tic'bil tac bʌ.

¹⁴Jini cha'an yom mi la' lʌc'tesan la' bʌ ijc'ʌl tic tojlel ti jujunmojt. Jini junmojt mu' bʌ c taj, la' i lʌc'tesan i bʌ ti jujump'ejl otot. Jini otot mu' bʌ c taj la' i lʌc'tesan i bʌ yic'ot i yalobilob ti jujuntiquil.

¹⁵La' pulic jini winic mu' bʌ i tajtʌl yic'ot jini tic'bil bʌ. La' pulic yic'ot pejtelel i chubʌ'an, come tsi' ñusʌbeyon c t'an. Tsi' cha'le mulil ti' tojlel israelob”. Che'ʌch yom ma' subeñob, che'en lac Yum.

¹⁶Josué tsa' ch'ojyi che' wen seb to. Tsi' yʌc'ʌyob ti ñumel jini israelob ti jujunmojt. Tsi' taja Judá.

¹⁷Tsi' yʌc'ʌyob ti ñumel jini año' bʌ ti Judá ti jujunmojt. Tsi' taja jini Zera. Tsi' yʌc'ʌ ti ñumel i pi'ʌlob Zera ti jujump'ejl i yotot. Tsi' taja i yotot Zabdi.

¹⁸Tsi' yʌc'ʌ ti ñumel i p'olbal Zabdi ti jujuntiquil winic. Tsi' taja Acán (i yalobil Carmi, i yalobil bʌ Zabdi, i yalobil bʌ Zera, loq'uemo' bʌ ti Judá).

¹⁹Che' jini Josué tsi' sube Acán: Calobil, suben i ñuclel lac Yum i Dios Israel. An a mul. Subeñon chuqui tsa' mele. Mach ma' muque'. Che' tsi' yʌlʌ Josué.

²⁰Acán tsi' jac'be Josué: Isujm, tsac cha'le mulil ti' contra lac Yum i Dios Israel. Che'ʌch tsac mele bajche' iliyi:

²¹Ya' ti Jericó tsaj q'uele pisil wen letsem bʌ i tojol, ch'oyol bʌ ti Babilonia, yic'ot lujump'ejl kilo plata bʌ taq'uin, yic'ot jump'ejl jʌlʌl bʌ oro, ñumen ti ojlil kilo. Tsac mula. Tsac ch'ʌmʌ. Ya'ʌch mucbil c cha'an ti mal lum ya' ti mal jini pisil bʌ cotot, che'en.

²²Josué tsi' choco majlel ti q'uelol. Ti ajñel tsa' majliyob ya' ti' yotot Acán. Tsi' tajayob ya'ʌch mucbil jini pisil yic'ot jini taq'uin ti yebal.

²³Tsi' ch'ʌmʌyob loq'uel ti' yotot. Tsi' ch'ʌmʌyob majlel ba'an Josué yic'ot ba' añob pejtelel israelob. Tsi' yʌc'ʌyob ti' tojlel lac Yum.

²⁴Che' jini Josué yic'ot israelob tsi' pʌyʌyob majlel Acán i yalobil Zera ya' ti joctʌl i c'aba' Acor. Tsi' ch'ʌmʌyob majlel ja'el jini plata yic'ot jini pisil yic'ot jini oro yic'ot pejtelel i chubʌ'an. Tsi' pʌyʌyob majlel i yixic'alob yic'ot i wacax yic'ot i burro yic'ot i tiñʌme'.

²⁵Josué tsi' yʌlʌ: ¿Chucoch tsa' wʌc'ʌyon lojon ti wocol? Lac Yum mi caj i yʌq'ueñet wocol, che'en. Pejtelel jini israelob tsi' juluyob ti xajlel jinto tsa' chʌmi. Tsi' puluyob ti c'ajc.

²⁶Tsi' lʌtsʌyob xajlel ti' pam. C'ʌlʌl ya' to an wʌle. Che' jini tsa' lajmi i mich'lel lac Yum. Jini cha'an jini joctʌl mi' pejcʌntel ti Joctʌl Acor c'ʌlʌl wʌle.