Read Chol 1 Timoteo 4 Bible Online

1 Timoteo 4 - Chol bible

1 Timoteo 4

¹Jini Espíritu mi' wen cʌntesañonla an mu' bʌ caj i cʌy i ñopob jini wen t'an ti wi'il bʌ q'uin. Mi caj i jac'beñob espíritujob mu' bʌ i cha'leñob lot yic'ot i cʌntesa xibajob.

²Xlot jini winicob mu' bʌ i cʌntesañob. Chʌmen i pusic'al cha'an mulil.

³Mi' lon tic'ob ñujpuñijel yic'ot ja'el i c'uxol we'elʌl tsa' bʌ i mele Dios cha'an mi' c'uxob jini xñopt'añob mu' bʌ i cʌñob i sujmlel, mu' bʌ i subeñob Dios wocolix i yʌlʌ.

⁴Come uts'atʌch pejtelel tsa' bʌ i mele Dios. Mach yomic mi lac ch'ajban. Yom tijicña mi laj c'ux mi tsa'ix lac sube Dios wocolix i yʌlʌ.

⁵Come sʌq'uesʌbilix che' mi lac ch'ʌm yic'ot i t'an Dios yic'ot oración.

⁶Mi wola' subeñob hermanojob ili cʌntesa, che' jini xuc'ul bʌ x'e'telet i cha'an Jesucristo, mʌc'lʌbilet ti jini t'an tsa' bʌ a ñopo yic'ot wen bʌ cʌntesa tsa' bʌ a wersa tsajca.

⁷Mach ma' ñopben i sajtemal la' ñojte'elob, yic'ot i tsucul t'an, come sojquem jax. Chajpan a pusic'al cha'an ch'ujul ma' wajñel.

⁸Mi lac taj ts'ita' lac wenlel che' mi laj cʌntan lac bʌc'tal. Pero cabʌl mi lac taj che' ch'ujul mi la cajñel. Come mi' coltañonla wʌle ti ili ora yic'ot ti jini tal to bʌ ora.

⁹Xuc'ul ili t'an. Yom mi' ñojpel ti pejtelelob.

¹⁰Jini cha'an woliyonla ti wersa e'tel yic'ot wocol come woli lac chʌn ñop jini cuxul bʌ Dios, i Yaj Coltaya pejtelel winicob, pero mero i cha'añob jini mu' bʌ i ñopob.

¹¹Cha' cʌntesan ti mandar jini woli bʌ c subeñet.

¹²Mach a wʌc' a bʌ ti ts'a'lentel ti' tojlel winicob cha'an ch'iton winiquet to. Pʌsbeñob ti a melbal bajche' yom mi' cha'leñob t'an xñopt'añob, yic'ot bajche' yom mi' yajñelob ti uts'at yic'ot c'uxbiya ti jump'ejl jach i pusic'al, yic'ot i xuc'tʌlel i pusic'al ti Cristo, yic'ot i sʌclel i pusic'al.

¹³Pejcʌbeñob i ts'ijbujel Dios. Cha'len subt'an yic'ot cʌntesa jinto mij c'otel.

¹⁴Wen cʌntan a c'ʌjñibal tsa' bʌ aq'uentiyet yic'ot a we'tel ti subt'an, che' bʌ tsi' yʌc'ʌyob i c'ʌb ti a jol jini ancianojob.

¹⁵Chʌn mele a we'tel. Yom bʌxet ti' melol cha'an mi' laj q'uelob uts'at wola' wajñel.

¹⁶Cʌntan a bʌ. Chʌn cha'len cʌntesa ti toj. Chʌn ajñen ti' sujmlel, come che' jini mi caj a coltan a bʌ yic'ot jini mu' bʌ i yubiñob a t'an.