Read Chol Juezob 10 Bible Online

Juezob 10 - Chol bible

Juezob 10

¹Che' chʌmenix Abimelec, jini Tola tsa' caji i coltan israelob. Tola i yalobilʌch Fúa, i yalobil Dodo, loq'uem bʌ ti' p'olbal Isacar. Tsa' chumle ti Samir am bʌ ti Efraín wits.

²Uxp'ejl i cha'c'al (23) jab tsi' cha'le yumʌntel ti' tojlel israelob. Tsa' chʌmi. Tsa' mujqui ya' ti Samir.

³Ti wi'il tsa' caji i mel i ye'tel Jair jini ch'oyol bʌ ti Galaad. Cha'p'ejl i cha'c'al jab tsi' cha'le yumʌl ti' tojlelob israelob.

⁴An lujuntiquil i cha'c'al (30) i yalobilob Jair. Tsi' c'ʌchtayob lujuncojt i cha'c'al (30) burro. An i cha'an lujump'ejl i cha'c'al tejclum ja'el otsʌbil bʌ i c'aba' i tejclum tac Jair c'ʌlʌl ti ili ora. Ya'an ti' lumal Galaad.

⁵Che' bʌ tsa' chʌmi Jair, tsa' mujqui ti Camón.

⁶Jini israelob tsa' cha' caji i melob chuqui tac jontol ti' wut lac Yum, come tsa' cha' caji i ch'ujutesañob jini dios Baal yic'ot Astarot, yic'ot i dios tac Siria, yic'ot Sidón, yic'ot Moab, yic'ot amoñob, yic'ot filisteojob. Tsi' junyajlel cʌyʌyob lac Yum. Ma'anix tsi' chʌn melbeyob chuqui yom.

⁷Jini cha'an lac Yum tsa' caji i contrajiñob. Tsi' yʌc'ʌyob ti c'ʌb filisteojob yic'ot ti' c'ʌb amoñob.

⁸Waxʌclujump'ejl (18) jab tsi' tic'layob jini israelob año' bʌ ti junwejl Jordán já ti' lumob amorreojob ya' ti Galaad.

⁹Jini amoñob tsa' c'axiyob ti Jordán cha'an mi' majlelob ti guerra ti' contra Judá yic'ot ti' contra Benjamín yic'ot ti' contra Efraín. C'ax p'ump'uñob tsa' tic'lʌntiyob jini israelob.

¹⁰Jini cha'an jini israelob c'am tsi' pejcayob lac Yum: Isujm tsa'ix c cha'le lojon mulil ti a tojlel, come tsa'ix j cʌyʌ lojon jini mero Dios. Tsac lon ch'ujutesa lojon jini Baal, che'ob.

¹¹Lac Yum tsi' jac'beyob: ¿Mach ba anic tsaj coltayetla che' bʌ tsa' la' wubi la' tic'lʌntel ti Egipto ti' tojlel amorreojob, yic'ot ti' tojlel amoñob, yic'ot ti' tojlel filisteojob,

¹²ti' tojlel año' bʌ ti Sidón, ti' tojlel Amalec, yic'ot ti' tojlel Maón? Che' c'am tsa' la' pejcayon, tsaj coltayetla.

¹³Pero tsa'ix la' cʌyʌyon cha'an mi la' lon ch'ujutesan dioste'. Jini cha'an ma'anix mi caj c chʌn coltañetla wʌle.

¹⁴Cucula, pejcan la' dios tac tsa' bʌ la' yajca. La'ix i coltañetla ti pejtelel la' wocol mu' bʌ la' taj. Che' tsi' yʌlʌ lac Yum.

¹⁵Jini israelob tsi' cha' subeyob lac Yum: Isujm tsa'ʌch c cha'le lojon mulil. Mele che' bajche' a wom tic tojlel lojon. Cojach mij c'ajtibeñet lojon ti wocol t'an cha'an ma' coltañon lojon ti ili q'uin, che'ob.

¹⁶Che' jini tsi' chocoyob loq'uel jini dioste' tac. Tsa' caji i ch'ujutesañob lac Yum. Awilan jini lac Yum tsi' mele i pusic'al cha'an i wocol israelob.

¹⁷Tsa' caji i tempañob i bʌ jini amoñob. Tsa' majliyob ti much'tʌl ya' ti Galaad. Che' ja'el tsa' caji i tempañob i bʌ jini israelob. Tsa' majliyob ti much'tʌl ya' ti Mizpa.

¹⁸Jini ñuc taco' bʌ am bʌ i ye'tel ya' ti Galaad tsi' c'ajtibeyob i bʌ. ¿Majqui mi caj i tech guerra ti' tojlel amoñob? Jini mu' bʌ i tech mi caj i yumʌntel ti' tojlel jini chumulo' bʌ ti Galaad, che'ob.