Read Chol Juezob 11 Bible Online

Juezob 11 - Chol bible

Juezob 11

¹Jefté ch'oyol bʌ ti Galaad jiñʌch juntiquil soldado wen cabʌl bʌ i ch'ejlel. I yalobilʌch ts'i'lel bʌ x'ixic. I tat Jefté jiñʌch Galaad.

²Pero jini mero i yijñam bʌ Galaad an i yalobilob ja'el. Che' bʌ tsi' tajayob i colel, tsi' chocoyob loq'uel Jefté. Tsi' subeyob: Ma'anic chuqui mi caj a wis taj ti pejtelel i chubʌ'an c tat lojon, come i yalobilet yambʌ x'ixic, che'ob.

³Jini cha'an Jefté tsa' wersa loq'ui ti' tojlel i yerañob. Tsa' majli ti chumtʌl ya' ti lum i c'aba' Tob. Ya' tsa' caji i tempañob jini winicob mach bʌ añobic i ye'tel. Temel tsa' cajiyob ti xujch' baqui jach tsa' majliyob.

⁴Jini amoñob tsa' caji i contrajiñob israelob.

⁵Che' bʌ tsa' cajiyob ti guerra yic'ot jini israelob, jini xñoxob ya' ti Galaad tsa' majli i pʌyob tilel Jefté ya' ti lum i c'aba' Tob.

⁶Tsi' subeyob: La' quic'ot lojon cha'an ma' wochel tic yum lojon, cha'an mi lac cha'len guerra ti' contra jini amoñob, che'ob.

⁷Pero Jefté tsi' jac'beyob jini xñoxob ti Galaad: Tsa'ix la' ts'a'leyon. Tsa'ix la' chocoyon loq'uel ti' yotot c tat. ¿Chucoch mi la' tilel tic tojlel wʌle che' poj an la' wocol? che'en.

⁸Jini xñoxob ti Galaad tsi' jac'beyob: Talon lojon c pʌyet cha'an ma' majlel quic'ot lojon ti guerra ti' contra jini amoñob. Jini cha'an yom ma' wochel tic yum lojon yic'ot ti' yum pejtelel ya' bʌ añob ti Galaad, che'ob.

⁹Pero Jefté tsi' jac'beyob: Mi tsa' sujtiyon la' wic'ot cha'an mic pʌyetla majlel ti guerra ti' contra jini amoñob, ¿isujm ba mi caj la' wotsañon ti la' yum che' lac Yum mi yʌc'ob tij c'ʌb? che'en.

¹⁰Jini xñoxob ti Galaad tsi' cha' subeyob: Lac Yum jiñʌch testigo ti lac tojlel. Mux c mel lojon che' bajche' tsac subeyet lojon, che'ob.

¹¹Jini cha'an Jefté tsi' jac'ʌ. Temel tsa' majliyob. Pejtelel jini winicob tsi' wa'chocoyob cha'an mi' yumañob. Jefté tsi' cha' ac'ʌ i t'an ti' tojlel lac Yum ti Mizpa.

¹²Jini cha'an Jefté tsi' choco majlel suboñelob ba'an i rey jini amoñob. Tsi' c'ajtibe chucoch woli' tech guerra ti' lumal Israel.

¹³I rey amoñob tsi' sube i winicob Jefté: Jini israelob tsi' chilbeyoñob c lum che' bʌ tsa' loq'uiyob tilel ti Egipto. Tsi' chiliyob lum am bʌ ti Arnón ja' c'ʌlʌl ti Jaboc yic'ot ti Jordán. Jini cha'an yom ma' sutq'uibeñon c lum lojon ti' yutslel a pusic'al, che'en.

¹⁴Jini cha'an Jefté tsi' cha' choco majlel suboñelob ti' tojlel jini rey ya' ti Amón.

¹⁵Tsi' subeyob: Jefté tsi' yʌlʌ: “Jini israelob ma'anic tsi' ch'ʌmbeyob i lum jini moabob, mi i lumic amoñob.

¹⁶Come che' bʌ tsa' loq'uiyob ya' ti Egipto tsa' ñumiyob ti jochol bʌ lum c'ʌlʌl tsa' c'otiyob ti Chʌchʌc bʌ Ñajb. Che' jini tsa' c'otiyob ti Cades.

¹⁷Awilan jini israelob tsi' chocoyob majlel suboñel ba'an jini rey ti Edom. Tsi' subeyob: Awocolic com ñumel lojon ti la' lum, che'ob. Pero jini rey ti Edom ma'anic tsi' jac'ʌ. Che' ja'el tsi' chocoyob majlel suboñel ba'an jini rey ti Moab. Jini ja'el ma'anic tsi' jac'ʌ. Jini cha'an jini israelob wersa tsa' cʌleyob ya' ti Cades.

¹⁸Ti wi'il tsa' caji i xoyob i bijlel ya' ti colem bʌ i tiquiñal pañimil. Tsi' wersa xoyoyob i bijlel ya' ti Edom yic'ot ti' lum Moab c'ʌlʌl tsa' c'otiyob ti' tojel Moab ba' mi' pasel q'uin. Tsa' c'otiyob ti jijlel ya' ti junwejl jini Arnón ja'. Ma'anic tsa' wis ochi ya' ti' lum Moab, come ya' ti Arnón ja' ya' jaxʌl i lumob jini Moab.

¹⁹Che' ja'el, jini israelob tsi' chocoyob majlel suboñel ba'an jini rey Sehón, i rey jini amorreojob. Jiñʌch rey ti Hesbón. Tsi' subeyob: Ti wocol t'an mij c'ajtin lojon, la' ñumicon lojon ya' ti la' lum cha'an mij c'otel lojon ya' ba' com lojon, che'ob.

²⁰Pero Sehón ma'anic tsi' wis jac'be i t'an israelob cha'an mi' yʌc'ob ti ñumel ti' lumal. Tsa' jach caji i tempan i winicob. Tsa' majliyob ti jijlel ti Jahaza. Tsi' cha'leyob guerra ti' contra israelob.

²¹Pero lac Yum i Dios israelob tsi' yʌc'ʌ Sehón yic'ot i winicob ti' c'ʌbob israelob. Tsi' laj jisayob. Che' jini tsi' ch'ʌmbeyob i lumob jini amorreojob.

²²Tsi' ch'ʌmʌyob pejtelel i lumob amorreojob ti Arnón ja' c'ʌlʌl ti Jaboc, ti colem bʌ i tiquiñal pañimil c'ʌlʌl ti Jordán ja'.

²³Awilan lac Yum i Dios israelob tsi' choco loq'uel jini amorreojob ti' lumob cha'an mi' yʌq'uen israelob. Jixcu jatet, ¿a wom ba a chilbeñon jini lum?

²⁴Isujm mi mejlel a ch'ʌm jini lum mu' bʌ i yʌq'ueñet a dios Quemos. Pero pejtelel chuqui tac tsi' yʌq'ueyon lojon tic wenta c Yum lojon, wersa mic ch'ʌm lojon.

²⁵Yom ma' ña'tan Balac i yalobil Zipor jini rey ya' ti Moab. Ma'anic tsa' mejli i contrajin jini israelob. Ma'anic tsi' cha'le guerra ti' contra. ¿Chucoch, che' jini, jatet wola' contrajin jini israelob?

²⁶Anix jo'lujunc'al (300) jab woliyob ti chumtʌl jini israelob ya' ti Hesbón yic'ot jini xchumtʌl tac am bʌ ti' joytʌlel yic'ot ti Aroer yic'ot xchumtʌl tac, yic'ot pejtelel jini tejclum am bʌ ti' ti' Arnón ja'. ¿Chucoch ma'anic tsa' toj ch'ʌmʌ ti jim bʌ ora?

²⁷Jini cha'an ma'anic c mul ti a tojlel, pero an a mul, come wolix a cha'len guerra tij contra lojon. Jini cha'an c Yum lojon jiñʌch mu' bʌ caj i melonla. La' i melonla bajche' yom, jini israelob, yic'ot ja'el jini amoñob”. Che' tsi' yʌlʌ Jefté, che'ob jini suboñelob.

²⁸Pero i rey jini amoñob ma'anic tsi' wen ñich'tʌbe i t'an Jefté che' bʌ tsi' choco majlel suboñelob ti' tojlel.

²⁹Pero jini Ch'ujul bʌ i yEspíritu lac Yum tsa' c'oti ti' tojlel Jefté. Tsa' ñumi majlel Jefté ti Galaad yic'ot ti Manasés. Tsa' ñumi ti Mizpa am bʌ ti Galaad. Tsa' c'oti ba'an jini amoñob.

³⁰Jefté tsi' cha'le trato ti' tojlel lac Yum. Tsi' yʌlʌ: Mi awom a wʌc' tij c'ʌb jini amoñob,

³¹che' jini mi caj cʌq'ueñet a majtan. Che' mi yujtel guerra ti' tojlel amoñob, majqui jach mi' ñaxan loq'uel tilel ti cotot cha'an mi' tajon mi caj cʌc' ti' wenta lac Yum che' bajche' pulbil bʌ i majtan, che'en.

³²Che' jini Jefté tsa' majli ti guerra ti' contra jini amoñob. Awilan lac Yum tsi' yʌc'ʌyob ti jilel ti' tojlel Jefté.

³³Tsi' mʌlbeyob ya' ti Aroer. Tsi' yajñesayob ñumel ti junc'al tejclum c'ʌlʌl tsa' c'oti ti Minit ya' ba'an ts'usubil. Wen obolob jax i bʌ tsa' cʌleyob. Che'ʌch tsa' caji' wersa ajñelob ti' wenta israelob jini amoñob.

³⁴Tsa' cha' sujti Jefté ti' yotot ya' ti Mizpa. Awilan woli' loq'uel tilel jini xch'oc bʌ i yalobil cha'an mi' taje'. Woli ti ñuqui tijp'ejl tilel yic'ot i t'an música cha'an i tijicñʌyel. Jiñʌch cojach bʌ i yalobil. Ma'anic yambʌ xch'oc mi ch'iton.

³⁵Che' bʌ tsi' q'uele, tsi' jet' tsili i bujc Jefté. Tsi' yʌlʌ: Calobil, p'ump'uñon jax. Tsa'ix a wʌq'ueyon c wocol, come tsac cha'le trato ti' tojlel lac Yum. Mach mejlix c chʌn yʌn c t'an, che'en.

³⁶Jini xch'oc tsi' jac'be i tat: C tat, tsa'ix a cha'le trato ti' tojlel lac Yum. Mele che' bajche' tsa' wʌlʌ cha'an ma' ts'ʌctesan a t'an ti' tojlel, come lac Yum tsa'ʌch i yʌq'ueyet a q'uextʌben i mul a contrajob jini amoñob.

³⁷Pero awocolic jac'beñon ili c t'an. Chocoyon majlel ya' ti wits. Chap'ejl uw yom mi cuc'tan c ch'oclel temel yic'ot jini xch'oc bʌ c pi'ʌlob, come mach mejlix cʌc' ti pañimil alʌl, che'en.

³⁸Jini Jefté tsi' sube i yalobil: Cucu, che'en. Che' jini tsa' majli yic'ot i pi'ʌlob. Tsi' yuc'tayob i ch'oclel ya' ti chan bʌ wits.

³⁹Che' bʌ ts'ʌctʌyemix cha'p'ejl uw, tsa' cha' sujti tilel ti' yotot i tat. Jefté tsi' mele ti' tojlel i yalobil che' bajche' tsi' yʌlʌ ti trato. Jini xch'oc ma'anic ba' ora tsi' pi'le winic.

⁴⁰Jini cha'an ti jab ti jab, jini xch'ocob ti Israel mi' majlelob chʌmp'ejl q'uin cha'an mi' yuc'tañob i yalobil Jefté jini galaad.