Read Chol Juezob 14 Bible Online

Juezob 14 - Chol bible

Juezob 14

¹Sansón tsa' jubi majlel ti Timnat. Awilan tsi' q'uele ya' ti Timnat juntiquil xch'oc bʌ i yalobil filisteo.

²Che' bʌ tsa' cha' sujti ti' yotot, tsi' tsictesʌbe i tat i ña': Tsaj q'uele juntiquil xch'oc bʌ i yalobil filisteo ya' ti Timnat. Yom majliquetla cha'an mi la' c'ajtibeñon, che'en.

³I tat yic'ot i ña' tsa' caji i subeñob: ¿Mach ba añobic xch'oc tacob ti' tojlel lac pi'ʌlob wʌ' ba' chumulonla? ¿Chucoch ma' majlel a pʌy i yalobil filisteo mach bʌ i cʌñʌyic Dios? che'ob. Sansón tsi' wersa sube i tat: Cajtibeñon jini xch'oc, come jiñʌch woli bʌ c mulan, che'en.

⁴Pero mach yujilobic i tat i ña' mi ch'oyolʌch ti lac Yum pejtelel iliyi, come Dios tsi' ña'ta i yʌq'ueñob wocol jini filisteojob. Come ti jim bʌ ora jini filisteojob woli' p'ump'un tic'lañob israelob.

⁵Sansón tsa' wersa jubi majlel yic'ot i tat i ña' ya' ti Timnat. Che' wolix i c'otelob ti' ts'usubilob jini año' bʌ ti Timnat, tsa' loq'ui tilel ti mate'el ch'iton bajlum cha'an mi' jisañob.

⁶Awilan i yEspíritu lac Yum tsa' c'oti ti' tojlel Sansón. Tsi' bic'ti jisa jini bajlum che' bajche' mi' bic'ti t'ojtʌl alʌ chivo. Pero ti jim bʌ ora ma'anic chuqui wisil an ti' c'ʌb Sansón. Ma'anic tsi' sube i tat i ña' chuqui tsa' ujti.

⁷Che' jini tsa' jubi majlel. Tsa' c'oti i pejcan jini xch'oc. Sansón tsi' mula jini xch'oc.

⁸Ti wi'il che' bʌ tsa' cha' majli Sansón cha'an mi' pʌy i yijñam, tsa' caji i q'uel ya' ti junwejl bij ba' tsi' choco jini bajlum, ya'ix jomjomña i chʌñil chab. Wen cabʌl i chʌbil.

⁹Tsi' ch'ʌmʌ majlel ti' c'ʌb. Tsa' caji i mʌc' majlel ya' ti bij. Che' bʌ tsa' c'oti i tajob i tat i ña', tsi' yʌq'ueyob i colobal, pero ma'anic tsi' subeyob mi loq'uem ti' cuctal jini chʌmen bʌ bajlum.

¹⁰Tsa' tili i tat Sansón ti' yotot jini xch'oc. Ya'i Sansón tsi' chajpa wen sumuc bʌ i bʌl nʌc'ʌl, che' bajche' i tilel mi' melob ch'iton winicob.

¹¹Jini filisteojob che' bʌ tsi' q'ueleyob, tsi' pʌyʌyob tilel lujuntiquil i cha'c'al (30) ch'iton winicob cha'an mi' tem ajñelob yic'ot Sansón.

¹²Sansón tsi' subeyob: Wʌle mi caj c subeñetla jump'ejl t'an. Che' woliyonla ti q'uiñijel wucp'ejl q'uin, mi tsa' mejli la' ña'tan i sujmlel jini t'an, che' jini mi caj cʌq'ueñetla lujump'ejl i cha'c'al bujcʌl ti lino yic'ot yambʌ lujump'ejl i cha'c'al bujcʌl cha'an q'uiñijel.

¹³Pero mi ma'anic tsa' mejli la' ña'tan, che' jini jatetla mi caj la' wʌq'ueñon lujump'ejl i cha'c'al bujcʌl ti lino, yic'ot yambʌ lujump'ejl i cha'c'al bujcʌl cha'an q'uiñijel, che'en. Tsi' jac'beyob: Alʌ jini t'an cha'an mi cubin lojon, che'ob.

¹⁴Sansón tsi' subeyob: Ti' tojlel jini xjisaya tsa' loq'ui we'elʌl. Ti' tojlel jini p'ʌtʌl bʌ tsa' loq'ui chuqui tsaj, che'en. Pejtelel jini winicob ma'anic tsa' mejli i wis ña'tañob i sujmlel jini t'an ti' yuxp'ejlel q'uin.

¹⁵Ti' chʌmp'ejlel q'uin tsi' subeyob i yijñam Sansón: Suben a ñoxi'al cha'an mi' tsictesʌbeñonla i sujmlel ili t'an. Aja machiqui mic pulet lojon temel yic'ot a tat a ña'. ¿Tsa' ba la' pʌyʌyon lojon tilel ilayi cha'an mi la' wotsañon lojon ti pobre? che'ob.

¹⁶I yijñam Sansón tsi' cha'le uq'uel ti' tojlel. Tsi' sube: Ts'a'atax ma' q'uelon. Ma'anic ma' c'uxbiñon, come ma'anic ma' subeñon i sujmlel jini t'an tsa' bʌ a subeyob c pi'ʌlob, che'en. Sansón tsi' jac'be: ¿Bajche' mi mejlel c poj tsictesʌbeñet, che' maxto anic subebilob c tat yic'ot c ña'? che'en.

¹⁷Tsi' chʌn cha'le uq'uel jini x'ixic che' woliyob to ti q'uiñijel jinto tsa' ts'ʌctiyi jini wucp'ejl q'uin. Che' jini tsi' c'un tsictesʌbe i sujmlel jini t'an, come tsi' wersa chʌn c'ajtibe. Jini x'ixic tsa' bʌc' majli i cha' subeñob i pi'ʌlob.

¹⁸Che' ti' wucp'ejlel q'uin, che' maxto bʌjlemic q'uin, tsa' tiliyob jini winicob. Tsi' yʌlʌyob: Ma'anic yambʌ tsaj bʌ bajche' jini chab. Ma'anic yambʌ p'ʌtʌl bʌ bajche' jini bajlum, che'ob. Sansón tsi' jac'beyob: Machic tsa' la' c'ajtibe quijñam, ma'anic tsa' mejli la' ña'tan i sujmlel c t'an, che'en.

¹⁹Awilan tsa' c'oti i yEspíritu lac Yum ti' tojlel Sansón yic'ot cabʌl i p'ʌtʌlel. Tsa' jubi majlel ya' ti Ascalón. Tsi' tsʌnsa lujuntiquil i cha'c'al winicob. Tsi' ch'ʌmbeyob i pislelob yic'ot chuqui tac an i cha'añob. Tsi' yʌq'ueyob jini ch'itoñob tsa' bʌ i ña'tayob i sujmlel jini t'an. Tsa' wen mich'a. Tsa' cha' majli ti' yotot i tat.

²⁰I yijñam Sansón tsa' sijinti yic'ot yambʌ winic tsa' bʌ wa'le yic'ot Sansón che' bʌ tsa' ñujpuni.