Read Chol Juezob 16 Bible Online

Juezob 16 - Chol bible

Juezob 16

¹Tsa' majli Sansón ti Gaza ba' tsa' caji i q'uel juntiquil sts'i'lel bʌ x'ixic. Tsa' majli i pi'len.

²Tsa' subentiyob jini winicob año' bʌ ti Gaza: Wʌ'ix an Sansón ti lac tejclum, che'ob. Che' jini tsa' caji i joy mʌctañob ya' ti' ti'il tejclum. Ñʌch'ʌlob tsi' ñusayob ac'ʌlel. Tsi' yʌlʌyob ti' pusic'al: Che' mi' sʌc'ʌn pañimil mi caj lac wersa tsʌnsan, che'ob.

³Pero Sansón tsi' cha'le wʌyel c'ʌlʌl ti' yojlil ac'ʌlel. Tsa' ch'ojyi. Tsi' chucu i trancajlel jini tejclum. Tsi' jʌm bots'o loq'uel yic'ot cha'ts'ijtlel i yoyel. Tsi' wel q'ueche majlel ti' quejlab. Tsa' majli i cʌy c'ʌlʌl ti pam wits am bʌ ti' tojel Hebrón.

⁴Che' ñumeñix cabʌl q'uin, Sansón tsi' mula yambʌ xch'oc ya' ti joctʌl i c'aba' Sorec. I c'aba' jini xch'oc jiñʌch Dalila.

⁵Tsa' tiliyob filisteojob año' bʌ i ye'tel ba'an jini xch'oc. Tsi' subeyob: Yom ma' pejcan ti uts bʌ t'an jini Sansón cha'an ma' c'ajtiben baqui mi' taj cabʌl i p'ʌtʌlel. Yom ma' ña'tan ja'el bajche' mi mejlel lac mʌlben, yic'ot bajche' mi mejlel laj cʌch. Che' jini ti jujuntiquil mi caj cʌq'ueñet lojon lajchʌmp'ejl mil peso, che'ob.

⁶Jini cha'an Dalila tsi' sube Sansón: A wocolic subeñon baqui tilem a p'ʌtʌlel come cabʌl jax. Subeñon bajche' mi mejlel ti sajtel cha'an ma' cʌjchel, che'en.

⁷Sansón tsi' jac'be: Mi tsa' cʌjchiyon yic'ot wucpojch sʌjy bʌ ch'ajan, che' jini lajal mic sujtel bajche' yaño' bʌ winicob, che'en.

⁸Jini cha'an jini filisteojob año' bʌ i ye'tel tsi' ch'ʌmbeyob tilel jini wucpojch sʌjy bʌ ch'ajan. Dalila tsi' c'ʌñʌ i cʌche'

⁹che' mucul jini winicob ya' ti mal i yotot. Tsi' sube Sansón: Ix tilel jini filisteojob cha'an mi' tsʌnsañetob, che'en. Ti ora jach tsi' bic'ti ts'oco jini ch'ajan che' bajche' mi' ts'ojquel junt'ujm chij che' mi' pulel. Ma'anic tsa' mejli i ña'tañob baqui tilem cabʌl i p'ʌtʌlel Sansón.

¹⁰Dalila tsi' cha' sube: Awilan tsa'ix a lotiyon che' bʌ tsa' subeyon yom sʌjy bʌ ch'ajan. Wʌle a wocolic subeñon ti isujm bajche' ma' mejlel ti chujquel, che'en.

¹¹Sansón tsi' jac'be: Mi tsa' cʌjchiyon ti tsiji' bʌ lazo maxto bʌ c'ʌmbilic, muq'uix c sujtel che' bajche' yambʌ winicob, che'en.

¹²Dalila tsi' ch'ʌmʌ jini wen tsiji' bʌ chij. Tsi' c'ʌñʌ i cʌche'. Tsi' sube: Sansón, umba' añob jini filisteojob ti a tojlel, che'en. Ya' ti mal otot woli' chijtañob winicob. Pero ti ora jach Sansón tsi' ts'oco jini lazo che' bajche' mi' ts'ojquel alʌ puy.

¹³Che' jini Dalila tsi' sube: Woli jach a lotiñon c'ʌlʌl wʌle. Yomix ma' tsictesʌbeñon ti isujm baqui tilem a p'ʌtʌlel yic'ot bajche' ma' mejlel ti chujquel, che'en. Sansón tsi' yʌlʌ: Mi tsa' jalʌ i tsutsel c jol ti wuct'ujm ba' mi' jajlel pisil cha'an tsʌts chucul mi' cʌytʌl, che' jini mi caj c sujtel bajche' yambʌ winicob, che'en.

¹⁴Jini cha'an tsʌts tsi' jalbe i jol ya' ti te'. Tsi' sube: Sansón, wʌ'ix añob filisteojob cha'an mi' chuquetob, che'en. Pero tsa' cajni i wut. Tsi' jots'o jini te'. Tsa' laj tijqui i tsutsel i jol ya' ti te'.

¹⁵Dalila tsa' caji i yʌl: ¿Bajche' isujm ma' subeñon wen c'ux ma' wubiñon, che' mach wen lajalic lac pusic'al? Come uxyajlix tsa' lotiyon. Ma'anic wola' tsictesʌbeñon baqui tilem a p'ʌtʌlel, che'en.

¹⁶Che' jini ti q'uin ti q'uin tsi' chʌn c'ajtibe. Ma'anic tsi' cʌyʌ i pejcan. Tsa' caji ti wen c'ojyel Sansón.

¹⁷Jini cha'an tsi' tsictesʌbe i pusic'al. Tsi' yʌlʌ ti jamʌl: Ma'anic ba' ora tsa' wis sejt'i i tsutsel c jol, come nazareojon i cha'an Dios c'ʌlʌl che' cʌntʌbilon to i cha'an c ña'. Muq'uic i sejt'el i tsutsel col, che' jini mic sujtel bajche' pejtelel winicob, che'en.

¹⁸Yujilix Dalila che' bʌ tsi' subu pejtelel chuqui an ti' pusic'al Sansón. Tsi' choco ti pʌyol jini filisteojob año' bʌ i ye'tel. Tsi' subeyob: Yomix mi la' bʌc' tilel, come tsa'ix i tsictesʌbeyon pejtelel am bʌ ti' pusic'al, che'en. Jini filisteojob año' bʌ i ye'tel tsa' tiliyob ba'an jini x'ixic. Tsi' ch'ʌmʌyob tilel taq'uin ti jujuntiquil.

¹⁹Jini x'ixic tsa' caji' wʌysan Sansón ti' ya'. Tsi' pʌyʌ tilel juntiquil winic cha'an mi' set'ben jini wuct'ujm tam bʌ i tsutsel i jol. Che' bʌ tsa' ujti, tsa' caji i tic'lan. Tsiquil ma'anix i p'ʌtʌlel, come tsa'ix jili i wersa.

²⁰Che' jini tsi' cha' sube: Sansón, wʌ'ix añob jini filisteojob, che'en. Che' bʌ tsa' cajni i wut Sansón, tsi' lon ña'ta ti' pusic'al: Mi caj j colel che' bajche' ti yan tac bʌ ora. Che' tsi' ña'ta. Pero mach yujilic mi cʌybilix i cha'an lac Yum.

²¹Jini filisteojob tsi' cʌchʌyob. Tsi' loc'sʌbeyob i bʌc' i wut. Tsi' pʌyʌyob majlel c'ʌlʌl ti Gaza. Ya' tsi' cʌchʌyob ti cadena cha'an mi' cha'len juch'bal ti mʌjquibʌl.

²²Pero i tsutsel i jol tsa' cha' caji ti c'unte pasel.

²³Jini cha'an jini filisteojob año' bʌ i ye'tel tsi' tempayob i bʌ cha'an mi' yʌq'ueñob i majtan jini dioste' i c'aba' Dagón. Ya'i tsi' wen meleyob q'uin cha'an tijicñayob. Tsi' yʌlʌyob: Lac dios tsa'ix i yʌc'ʌ ti laj c'ʌb laj contra, che'ob.

²⁴Pejtel jini winicob tsi' q'ueleyob Sansón. Tsi' ch'ujutesayob jini dioste'. Tsi' yʌlʌyob: Lac dios tsa'ix i yʌc'ʌ ti laj c'ʌb laj contra tsa' bʌ i jisa lac lumal. Jiñʌch tsa' bʌ i tsʌnsa cabʌl lac pi'ʌlob, che'ob.

²⁵Che' bʌ tsi' wen ubiyob i tijicñʌyel i pusic'al tsi' yʌlʌyob: Pʌyʌla tilel Sansón cha'an mi' tijicñesan lac pusic'al, che'ob. Che' jini tsa' majli i pʌyob loq'uel Sansón ya' ti' mal jini ñujp'ibʌl. Tsa' caji i wajleñob. Che' bʌ tsi' wa'chocoyob ya' ti' nʌc' jini cha'ts'ijt wa'al bʌ ts'ajc tac,

²⁶Sansón tsi' pejca jini ch'iton woli bʌ i toj'esan majlel: Ac'ʌ j c'ʌb bʌ mic tʌl i yoyel otot cha'an mic ñʌctʌl ya' ba' chucul, che'en.

²⁷Ti jim bʌ ora wen but'ul jini otot ti bajc'ʌl filisteojob yic'ot ja'el jini ñuc taco' bʌ i ye'tel. Ya' añob ti' jol otot uxp'ejl mil winicob x'ixicob woli bʌ i q'uelob i wocol Sansón woli bʌ i wajleñob.

²⁸Sansón c'am tsi' pejca lac Yum: C Yum Dios, p'untañon ti ili ora. Ti wocol t'an mij c'ajtibeñet p'ʌtesañon ti ili cojix bʌ ora, Dios, cha'an mi cʌq'ueñob i toj i mul jini filisteojob, cha'an tsi' loc'sʌbeyon jini cha'p'ejl i bʌc' c wut, che'en.

²⁹Che' jini Sansón tsi' tsʌy chucu jini cha'ts'ijt i yoyel otot, ya' ba' c'ʌcʌl jini otot yic'ot pejtelel i yalel. Jujunts'ijt i c'ʌb tsi' laj bʌ chucu i yoyel otot.

³⁰Che' jini Sansón tsi' yʌlʌ: La'ix chʌmicon ilayi yic'ot jini filisteojob, che'en. Che' jini ti pejtelel i p'ʌtʌlel tsi' c'uchu i bʌ. Tsi' wersa tujc'a i yoyel jini otot. Tsa' yajli jini otot ba' añob bajc'ʌl winicob x'ixicob yic'ot jini ñuc taco' bʌ i ye'tel. Ti pejtelel tsa' bʌ i tsʌnsa che' bʌ tsa' chʌmi ñumen on che' bajche' tsi' tsʌnsa ti ñaxan.

³¹Che' jini tsa' jubiyob tilel i pi'ʌlob yic'ot i yerañob cha'an mi' lotob majlel. Tsa' majli i mucob ya' ti' yojlil Zora yic'ot Estaol, ya' ba' mucul i tat i c'aba' Manoa. Junc'al jab tsi' cha'le yumʌl Sansón ti' tojlel israelob.