Read Chol Juezob 17 Bible Online

Juezob 17 - Chol bible

Juezob 17

¹Micaía jiñʌch winic ch'oyol bʌ ti' lumal Efraín ya' ba' puru wits.

²Jump'ejl q'uin tsi' sube i ña': Tsa cubi che' bʌ tsa' p'aja jini winic tsa' bʌ i xujch'ibeyet jo'lujunc'al i yuxbajc' (1,100) sʌsʌc taq'uin. Awilan jini taq'uin anix tij c'ʌb. Joñon tsac ch'ʌmʌ, che'en. Jini cha'an i ña' tsi' yʌlʌ: Calobil, la' i yʌq'ueñet i yutslel i t'an lac Yum, che'en.

³Tsi' cha' sutq'uibe jini jo'lujunc'al i yuxbajc' (1,100) sʌsʌc taq'uin. I ña' tsi' yʌlʌ: Mux caj cʌq'uen ili taq'uin lac Yum cha'an mi' yotsan ti' wenta calobil. Mi caj cʌc' ti' melol dioste' melbil bʌ ti sʌsʌc taq'uin, che'en.

⁴Che' bʌ tsi' cha' sutq'uibe i taq'uin, i ña' tsi' ch'ʌmʌ majlel lujunc'al sʌsʌc taq'uin ba'an jini xmel dioste'. Tsi' melbe jini dioste' cha'an mi' yʌjq'uel ti' yotot Micaía.

⁵An i cha'an Micaía i yotlel dioste' ba' mi' cha'len ch'ujutesaya. Tsi' mele ja'el jini efod cha'an mi' pejcan dioste'. Tsi' mele dioste' tac. Tsi' wa'choco juntiquil i yalobil cha'an mi' junyajlel mel i ye'tel ti motomaj.

⁶Ti jim bʌ ora ñoj ma'anic rey ti' tojlel israelob. Jini israelob tsi' meleyob che' bajche' tsi' bajñel ña'tayob ti' pusic'al ti jujuntiquil.

⁷Ti jim bʌ ora ya' chumul juntiquil ch'iton winic loq'uem bʌ ti Judá. Jiñʌch leví.

⁸Jini winic tsa' loq'ui ti Belén am bʌ ti Judá cha'an mi' majlel ti chumtʌl baqui mi' taj e'tel. Che' bʌ tsa' c'oti ti' lumal Efraín ba' puru wits, tsa' c'oti ti' yotot Micaía.

⁹Micaía tsi' sube: ¿Baqui ch'oyolet? che'en. Jini leví tsi' jac'be: Ch'oyolon ti Belén ti Judá. Wolic sʌclan baqui mi cajñel, che'en.

¹⁰Micaía tsi' sube: Cʌlenix ilayi ti cotot. Mi caj j q'uelet che' bajche' c tat. Mi caj a melbeñon e'tel ti motomaj. Lujump'ejl sʌsʌc taq'uin mi caj cʌq'ueñet ti jujump'ejl jab yic'ot a pislel, yic'ot chuqui ma' c'ux, che'en.

¹¹Uts'atʌch tsi' yubi jini leví. Tsa' caji ti ñoj chumtʌl yic'ot Micaía. Tsa' ajni che' bajche' mero i tat jini ch'iton winic.

¹²Micaía tsi' wa'choco jini leví cha'an mi' cha'len i ye'tel ti motomaj. Ya' tsa' ajni ti' yotot Micaía.

¹³Micaía tsa' caji i yʌl: Wʌle muq'uix cajel i wen coltañon lac Yum, come mero leví c motomaj woli bʌ i mel i ye'tel.