Read Chol Juezob 19 Bible Online

Juezob 19 - Chol bible

Juezob 19

¹Ti jim bʌ ora maxto anic rey ti' tojlel israelob. Ya' chumul juntiquil leví ñajt bʌ ch'oyol. Tsa' tili ti chumtʌl ti' lumal Efraín ba' puru wits. Tsi' pʌyʌ i yixic loq'uem bʌ ti Belén ti Judá.

²Pero i yixic tsa' caji ti mich'. Tsa' cha' sujti ti' yotot i tat ya' ti Belén ti Judá. Chʌmp'ejl uw tsa' ajni yic'ot.

³Tsa' cha' majli i ñoxi'al cha'an mi' cha' pʌy. Tsi' pʌyʌ majlel juntiquil i yaj e'tel, yic'ot cha'cojt burro. Tsa' c'ʌlʌ c'oti ti' yotot i nij'al. Tsa' majli i pejcan ti uts bʌ t'an cha'an mi' cha' tilel yic'ot.

⁴Che' bʌ tsi' q'uele i tat jini x'ixic, wen tijicña tsa' loq'ui tilel i taj. Tsi' sube cʌytʌl. Jini cha'an uxp'ejl q'uin ya'an ti' yotot i nij'al. Tsi' tem cha'leyob we'el uch'el. Ya' tsi' c'ajayob i yo.

⁵Che' ti chʌmp'ejlel q'uin tsa' ch'ojyi cha'an mi' cha' sujtel jini leví, pero i tat jini x'ixic tsi' sube: Chʌn c'uxu waj quic'ot. Ti wi'il mi mejlel a majlel, che'en.

⁶Che' jini tsa' cajiyob ti buchtʌl ti cha'ticlel ti' we'el ti uch'el. I tat jini x'ixic tsi' sube: Yom ma' cʌytʌl cha'an ma' ñusan ili ac'ʌlel ti cotot cha'an ma' tijicñesan a pusic'al, che'en.

⁷Che' bʌ tsa' cha' tejchi jini winic cha'an mi' sujtel, i tat jini x'ixic tsi' cha' sube cʌytʌl. Jini cha'an tsi' cha' ñusa yambʌ jump'ejl ac'ʌlel.

⁸Che' ti jo'p'ejlel q'uin seb to tsa' ch'ojyi cha'an mi' sujtel, pero i tat jini x'ixic tsi' cha' sube: Yom ma' poj jalijel. Ñaxan yom ma' cha'len we'el. Mi mejlel a sujtel ti och'ajel q'uin, che'en. Che' jini tsa' tem buchleyob ti c'ux waj ti' cha'ticlel.

⁹Che' jini tsa' tejchi jini winic cha'an mi' sujtel yic'ot i yijñam yic'ot i yaj e'tel. Jini i tat jini x'ixic tsi' cha' sube i nij'al: Awilan wolix ti bʌjlel q'uin. Cʌlen to cha'an ma' ñusan ili ac'ʌlel wʌle, come iq'uix cajel. Jini cha'an yom to ma' cha' wʌyel ilayi. Tijicñesan a pusic'al wʌ'i. Ijc'ʌl to ti wen seb ma' majlel, che'en.

¹⁰Pero jini winic ma'anix tsi' chʌn jac'ʌ i ñusan ac'ʌlel ya' ti' yotot i nij'al. Tsa' caji ti sujtel. Tsa' c'oti ya' ti' tojel Jebús (jiñʌch Jerusalén). Woli' pʌy majlel cha'cojt jini burro yic'ot x'ixic.

¹¹Che' bʌ ya'ix añob ti' tojel Jebús, wolix ti bʌjlel jini q'uin. Jini cha'an i yaj e'tel tsi' sube: Yom mi la cochel ilayi cha'an mi lac jijlel ila ti' tejclum jebuseojob, che'en.

¹²Awilan i yum tsi' jac'be: Mach yomic mi lac jijlel ti' tejclum yaño' bʌ winicob mach bʌ israelobic. Yom mi lac ñumel majlel ti Gabaa.

¹³Conla ti ora cha'an mi lac jijlel ti yambʌ tejclum cha'an mi lac ñusan ac'ʌlel ya' ti Gabaa mi ti Ramá, che'en.

¹⁴Che' jini tsa' to ñumiyob ti Jebús. Woli ti bʌjlel q'uin che' bʌ tsa' ochiyob ti Gabaa ba'an i lum Benjamín.

¹⁵Che' jini tsa' ochiyob majlel ti yambʌ bij cha'an mi' ñusañob ac'ʌlel ya' ti Gabaa. Tsa' c'otiyob ti buchtʌl ya' ti calle, pero ma'anic majch tsi' pʌyʌyob ochel ti' yotot cha'an mi' jijlelob.

¹⁶Awilan ti jim bʌ ora woli' sujtel ti' ye'tel juntiquil ñoxix bʌ winic am bʌ i lumal ya' ti' lumal Efraín ba puru wits. Ya' chumul ti Gabaa, pero mach mero i lumalic. Jini ya' bʌ chumulob ti Gabaa jiñʌch i p'olbal Benjamín.

¹⁷Che' bʌ tsi' sutq'ui i wut jini xñox, tsi' q'uele jini winic am bʌ ti calle. Tsi' sube: ¿Baqui samiyet? ¿Baqui ch'oyolet? che'en.

¹⁸Tsi' jac'be: Wolic majlel lojon ti Efraín, ba' ch'oyolon. Tsajniyon lojon ti jula' ya' ti Belén ti Judá. Woliyonix ti sujtel. Ma'anic majqui yom i pʌyon lojon ochel ti' yotot.

¹⁹Añʌch c cha'an lojon jam cha'an c mula yic'ot waj yic'ot vino cha'an mij c'ux temel quic'ot quijñam quic'ot caj e'tel. Jini cha'an ma'anic chuqui anto yom c cha'an lojon, che'en.

²⁰Jini ñoxix bʌ winic ti' yʌlʌ: La' ñʌjch'ic a pusic'al. Joñon mi caj cʌq'ueñet pejtel chuqui yom a cha'an. Ma'anic mi caj a ñusan ac'ʌlel ila ti jumpat, che'en.

²¹Che' jini tsi' pʌyʌ majlel ti' yotot. Tsi' yʌq'ue chuqui mi' c'ux jini burro tac yic'ot ja' cha'an mi' pocob i yoc. Tsa' cajiyob ti we'el ti uch'el.

²²Che' wen tijicñayob i pusic'al ya' ti mal otot, jini jontolo' bʌ winicob ya' ti tejclum tsa' tili i joy mʌctañob jini otot. Tsa' caji i jats'beñob i ti'. Tsi' pejcayob jini i yum otot, ñoxix bʌ winic: Loc'san jini winic woli bʌ i c'aj i yo ti a wotot cha'an mic pi'len lojon, che'ob.

²³Jini i yum otot tsa' loq'ui i subeñob: Ti wocol t'an mic subeñetla mach yomic mi' la' mel ili jontolil. Tsa'ix c pʌyʌ ochel ili winic ti cotot. Mach yomic mi la' mel ili jontolil.

²⁴Mi caj c loc'sʌbeñetla jini xch'oc to bʌ calobil yic'ot i yixic ili winic cha'an mi la' pi'len, cha'an mi la' mel chuqui la' wom, pero mach yomic mi la' tic'lan ili winic, che'en.

²⁵Pero jini winicob ma'anic tsi' chʌn ñich'tʌbeyob i t'an. Jini cha'an jini winic tsi' choco loq'uel i yixic. Che' jini tsa' caji i pi'leñob c'ʌlʌl tsa' ñumi ac'ʌlel. C'ʌlʌl ti sʌc'ajel tsi' cʌyʌyob i tic'lan.

²⁶Che' sʌquix cajel, jini x'ixic tsa' to i xʌñʌ ts'ita'. Tsa' ñuc yajli ya' ti' ti' otot. Ya' tsa' ñole c'ʌlʌl tsa' wen sʌc'a.

²⁷Che' bʌ tsa' tejchi ti wʌyel i ñoxi'al, tsi' jamʌ i ti' otot cha'an mi' cha' tech xʌmbal. Tsi' can q'uele ya' ñolol jini i yixic ti' ti' jini otot, sʌts'ʌl tac i c'ʌb ti' ñʌc' jini ts'ajc.

²⁸Tsi' sube: Tejchenix cha'an mi lac cha' majlel, che'en. Pero jini x'ixic ma'anix tsi' chʌn cha'le t'an. Che' jini tsi' licchoco ti' pam jini burro. Tsa' cha' caji ti xʌmbal majlel ti' lumal.

²⁹Che' bʌ tsa' c'oti ti' yotot, tsi' jʌm ch'ʌmʌ i cuchilu. Tsi' bic'ti tsepe ti lajchʌmp'ajc. Tsi' choco majlel ti' jujunmojt i p'olbal israelob.

³⁰Pejtelel majqui jach tsi' q'uele tsi' yʌlʌyob: Ma'anic ba' ora tsa' laj q'uele bajche' iliyi, c'ʌlʌl che' bʌ tsa' letsiyonla tilel ti Egipto c'ʌlʌl wʌle. Jini cha'an yom mi la' wen ña'tan chuqui tsa' ujti cha'an mi la' wen sub bajche' yom mi lac mel, che'ob.