Read Chol Juezob 20 Bible Online

Juezob 20 - Chol bible

Juezob 20

¹Tsa' cajiyob ti loq'uel pejtelel jini israelob ti jump'ejl jach i pusic'al. Tsa' caji i tempañob i bʌ c'ʌlʌl ti Dan c'ʌlʌl ti Beerseba yic'ot ya' ti' lumal Galaad. Tsa' c'oti i tempañob i bʌ ti' tojlel lac Yum ya' ti Mizpa.

²Pejtelel jini ñuc taco' bʌ i ye'tel loq'uemo' bʌ ti jujunmojt israelob tsi' tempayob i bʌ ti' tojlel Dios. Ti pejtelelob añob jumbajc' mil winicob chajpʌbilo' bʌ cha'an guerra.

³Jini benjamiñob tsi' yubiyob tsa'ix letsiyob tilel jini israelob ti Mizpa. Jini israelob tsi' c'ajtiyob: ¿Bajche' tsa' tejchi ili wocol? che'ob.

⁴I ñoxi'al jini chʌmen bʌ x'ixic tsi' jac'be: Tsa' c'otiyon ti Gabaa ti' lum jini benjamiñob cha'an mic poj ñusan ac'ʌlel ya'i temel quic'ot jini quixic.

⁵Pero ti ac'ʌlel tsa' c'oti i bʌc'tesañon lojon jini winicob ya' ti Gabaa. Tsi' joy mʌctayon lojon ya' ti otot cha'an mi' tsʌnsañon, pero tsi' pi'leyob jini quixic. Jini cha'an tsa' chʌmi.

⁶Tsac bic'ti tsepe jini quixic. Tsac chocbeyob majlel jujunmojt israelob cha'an mi' ña'tañob c'ax leco chuqui tsa' mejli ti' tojlel israelob.

⁷Jini cha'an ña'tanla jatetla ti la' pejtelel bajche' yom melol cha'an ili wocol tsa' bʌ ujti, che'en.

⁸Jini cha'an pejtelel jini winicob ti junsujm bʌ t'an tsi' yʌlʌyob: Ti jujuntiquilonla ma'anic mi caj lac bʌc' sujtel ti lac lumal cha'an mi lac majlel ti la cotot.

⁹Jiñʌch yom bʌ mi lac tumben Gabaa. Yom mi lac cha'len yajcaya ti alas cha'an mi' tsictiyel majqui mi caj i contrajiñob.

¹⁰Mi caj lac loc'san lujuntiquil winicob ti jo'jo'c'al israelob, yic'ot jo'jo'c'al ti jujump'ejl mil, yic'ot jujump'ejl mil ti lujump'ejl mil, cha'an mi' sʌclʌbeñob i bʌl i ñʌc' jini soldadojob, cha'an ma'anic chuqui yom i cha'añob che' mi' majlelob ti Gabaa ti' lum jini benjamiñob. Che' jini mi mejlel i melbenob che' bajche' yom cha'an cabʌl i mul tsa' bʌ i meleyob ti' tojlel israelob, che'ob.

¹¹Che' jini tsi' tempayob i bʌ pejtelel jini israelob cha'an mi' majlelob ti guerra ti' contra jini tejclum Gabaa. Junsujm jach i pensarob jini winicob. Tsa' cajiyob ti majlel.

¹²Jini israelob tsi' chocoyob majlel winicob ba' anob jini benjamiñob. Tsi' subeyob: ¿Chuqui jini mulil tsa' bʌ ujti ti la' tojlel? che'ob.

¹³Jini cha'an yom mi la' wʌc' tij c'ʌb lojon jini jontol bʌ winicob año' bʌ ti Gabaa, cha'an mic tsʌnsan lojon, cha'an mi' jilel jini jontolil ti' tojlelob israelob, che'ob. Pero jini benjamiñob ma'anic tsi' wis mulayob jini t'an woli bʌ i yʌlob jini israelob i pi'ʌlo' bʌ.

¹⁴Tsa' loq'uiyob benjamiñob ti yantac bʌ tejclum cha'an mi' much'quiñob i bʌ ya' ti Gabaa, cha'an mi' cha'leñob guerra ti' contra jini israelob.

¹⁵Añob wʌcp'ejl i cha'c'al mil (26,000) winicob ti pejtelob. Jini benjamiñob tsa' loq'uiyob majlel cha'an guerra che' ch'ʌmbilix ti tsic. Che' bʌ tsa' ñumi lista, añob jo'lujunc'al i cha'bajc' (700) winicob chumulo' bʌ ti Gabaa.

¹⁶Ti' tojlel pejtelel ili soldadojob añob jo'lujunc'al i cha'bajc' winicob yujilo' bʌ i c'ʌñol ts'ej bʌ i c'ʌb. Yujilob julbʌl yic'ot jini sʌrʌntun. Wen toj mi' c'otel tac.

¹⁷Ti pejtelel jini israelob añob jumbajc' mil, laj chajpʌbilob cha'an guerra. Partejʌch jini benjamiñob.

¹⁸Ti ora jach tsa' majliyob ti Betel jini israelob cha'an mi' c'ajtibeñob Dios: ¿Majqui ñaxan mi' majlel ti guerra ti' contra jini benjamiñob? che'ob. Lac Yum tsi' jac'beyob: Yom ñaxan mi' letselob jini ch'oyolo' bʌ ti Judá, che'en.

¹⁹Ti' yijc'ʌlal che' wen seb to, tsa' majliyob jini israelob cha'an mi' cha'leñob guerra ti' contra jini benjamiñob. Tsa' c'otiyob ti' tojel Gabaa.

²⁰

²¹Tsa' loq'uiyob tilel jini benjamiñob año' bʌ ti Gabaa. Tsi' jisayob cha'tiquil i cha'c'al mil (22,000) israelob ti jini ñaxan bʌ q'uin.

²²Pero che' bʌ tsa' utsi ch'ejl'ayob jini israelob, tsa' caji i cha' cha'leñob guerra ya' ba' tsi' cha'leyob ti ñaxan bʌ q'uin.

²³Jini israelob ñaxan tsa' letsiyob majlel ba'an lac Yum. C'am tsi' cha'leyob uq'uel c'ʌlʌl ti ic'ajel. Tsi' c'ajtibeyob lac Yum: ¿Yom to ba mic chʌn cha'len lojon guerra ti' tojlel jini benjamiñob, jini c pi'ʌlob lojon? che'ob. Lac Yum tsi' subeyob: Cha' letsenla ti guerra ti' contrajob, che'en.

²⁴Jini cha'an jini israelob tsa' cha' cajiyob ti guerra yic'ot jini benjamiñob che' ti yijc'ʌlal.

²⁵Tsa' loq'uiyob tilel ti guerra jini benjamiñob ti Gabaa. Ti jim bʌ ora tsi' jisayob waxʌclujump'el mil (18,000) israelob yujilo' bʌ guerra.

²⁶Jini cha'an pejtelel jini israelob tsa' majliyob ti Betel. C'am tsi' cha'leyob uq'uel. Ya' tsa' buchleyob ti' tojlel lac Yum. Ma'anic chuqui tsi' c'uxuyob ti jini q'uin c'ʌlʌl ti ic'ajel. Tsi' yʌq'ueyob pulbil tac bʌ i majtan lac Yum yic'ot i majtan cha'an i ñʌch'tilel i pusic'al.

²⁷Jini israelob tsi' c'ajtibeyob lac Yum ya'i, come ti jim bʌ ora ya'an ti Betel jini Arca i cha'an lac Yum.

²⁸Ya' woli' mel i ye'tel Finees i yalobil Eleazar i yalobil bʌ Aarón. Jiñʌch motomaj ti jim bʌ ora. Tsi' yʌlʌyob: ¿Yom ba mic cha' loq'uel lojon ti guerra ti' contra jini benjamiñob jini c pi'ʌlob lojon? ¿Mach ba yomic mij cʌy lojon guerra? che'ob. Lac Yum tsi' yʌlʌ: Yom mi la' cha' contrajiñob ijc'ʌl, come mi caj cʌc'ob ti la' c'ʌb, che'en.

²⁹Jini cha'an jini israelob tsi' wa'chocoyob winicob cha'an mi' joy mʌctañob Gabaa.

³⁰Che' bʌ tsa' cha' cajiyob ti letsel jini israelob ti' yuxyajlel ti' contra jini benjamiñob, tsa' caji' cha' techob guerra ya' ti Gabaa che' bajche' ti ñaxan.

³¹Tsa' loq'uiyob ti tejclum jini benjamiñob cha'an mi' q'uelob jini soldadojob. Ñajt tsi' tsajcayob majlel jini israelob. Tsa' caji i tsʌnsañob israelob che' bajche' ti ñaxan. Tsa' tsʌnsʌntiyob che' bajche' lujuntiquil i cha'c'al (30). Tsi' tsʌnsayob ti' bijlel Betel, yic'ot ti yambʌ bij mu' bʌ i letsel majlel ya' ti Gabaa.

³²Jini benjamiñob tsi' yʌlʌyob: Mi caj i mʌjlel lac cha'an che' bajche' ti yambʌ ora, che'ob. Pero jini israelob tsi' yʌlʌyob: Yom mi lac puts'el cha'an mi lac pʌyob loq'uel ti tejclum, che'ob.

³³Che' bʌ tsa' c'otiyob ya' ti Baal Tamar, tsi' sutq'uiyob i bʌ cha'an mi' tajob ti' pat. Yaño' bʌ israelob tsa' loq'uiyob ya' ba' muculob lʌc'ʌl ti Gabaa. Tsa' cajiyob ti guerra ya' ti' pat jini benjamiñob. Añob lujump'ejl mil soldadojob ti' pat, pero jini benjamiñob ma'anic tsi' ña'tayob mi mux caj i jilelob.

³⁴

³⁵Lac Yum tsi' jisayob ti' tojlel israelob. Ti jim bʌ q'uin jini israelob tsi' tsʌnsayob jo'p'ejl i cha'c'al mil yic'ot jo'c'al (25,100) winicob, año' bʌ i cha'an e'tʌjibʌl cha'an guerra.

³⁶Jini benjamiñob tsi' ña'tayob ma'anix i p'ʌtʌlel ti' tojlel israelob. Tijicñayob i pusic'al jini israelob cha'an jini xcʌñañob tsa' bʌ cʌleyob ti' joytʌlel Gabaa.

³⁷Come che' bʌ tsa' cajiyob ti puts'el yilal ti' tojlel i contrajob, tsi' poj tʌts'ʌyob i bʌ tsi' meleyob. Tsa' bʌc' loq'uiyob jini i pi'ʌlob ba muculob. Tsa' majli i tsʌnsañob jini año' bʌ ti Gabaa.

³⁸Jini israelob yic'ot jini muculo' bʌ ti' joytilel tejclum tsi' ñaxan temeyob i t'an cha'an mux i letsañob cabʌl buts' che' ochemobix ti Gabaa.

³⁹Che' q'uelbilix i cha'añob jini buts' jini israelob mi caj i cha' sutq'uiñob i bʌ. Jini benjamiñob tsi' tsʌnsayob lujuntiquil i cha'c'al israelob. Tsi' lon alʌyob: Isujm wersa mi caj lac jisañob che' bajche' ti yambʌ ora, che'ob.

⁴⁰Pero che' jini tsa' caji ti letsel jini buts' ya' ti tejclum. Jini benjamiñob tsa' sujti i q'uelob. Woli ti pulel pejtel jini tejclum.

⁴¹Che' jini tsi' cha' sutq'uiyob i bʌ jini israelob. Pejtel jini benjamiñob tsa' cajiyob ti wen bʌq'uen, come tsi' q'ueleyob muq'uix cajel i laj jilelob.

⁴²Tsa' cajiyob ti puts'el ti' tojlel israelob cha'an mi' majlelob ba' jochol lum, pero jini israelob tsi' joyoyob. Pejtel jini israelob tsa' loq'uiyob ya' ba' muculob.

⁴³Che' jini tsi' joy mʌctayob jini benjamiñob. Tsi' yajñesayob. Ma'anic tsi' cʌyʌyob. Tsi' tajayob ya' ti' tojel Gabaa, ti' tojel ba' mi' pasel jini q'uin.

⁴⁴Che' jini tsa' jiliyob waxʌclujump'ejl mil (18,000) benjamiñob, pejtelel jini wen yujilo' bʌ guerra.

⁴⁵Lamital tsi' lon chucuyob majlel i puts'el ti jochol bʌ lum ya' ti' ch'eñal xajlel i c'aba' Rimón. Tsa' jisʌntiyob jo'p'ejl mil winicob ti bij che' woliyob ti puts'el. Jini israelob tsi' yajñesayob majlel c'ʌlʌl ti Gidom ba' tsi' jisayob yambʌ cha'p'ejl mil winicob.

⁴⁶Ti jim bʌ q'uin tsa' jiliyob ti' tojlel Benjamín jo'p'ejl i cha'c'al mil (25,000) winicob chajpʌbilo' bʌ cha'an guerra.

⁴⁷Pero lujunc'al i cha'bajc' (600) tsi' wersa chucuyob majlel i puts'el ya' ti jochol bʌ lum ba'an i ch'eñal xajlel i c'aba Rimón. Chʌmp'ejl uw tsa' cʌleyob ya'i.

⁴⁸Pero jini israelob tsa' cha' cajiyob ti guerra yic'ot jini benjamiñob tsa' bʌ i tajayob. Tsi' laj jisayob jini winicob yic'ot i yʌlac'. Tsi' puluyob pejtelel i tejclum.