Read Chol Juezob 21 Bible Online

Juezob 21 - Chol bible

Juezob 21

¹Che' ya'to añob jini israelob ti Mizpa, che' maxto loq'uemobic ti guerra, tsi' cha'leyob trato. Tsi' yʌlʌyob: Ma'anic mi caj lac sijibeñob la quixic'al jini benjamiñob, che'ob.

²Pero jini israelob tsa' cha' tiliyob ti Betel. Ya' añob c'ʌlʌl ti ic'ajel ti' tojlel lac Yum. C'am tsi' cha'leyob t'an ti oración. Tsi' cha'leyob uq'uel. Tsi' yʌlʌyob:

³C Yum i Dioset bʌ Israel, ¿chucoch leco jax chuqui woli' yujtel ti' tojlel jini israelob? come tsa'ix jili junmojt i p'olbal Israel, che'ob.

⁴Che' ti yijc'ʌlal seb to tsa' ch'ojyiyob pejtelel jini israelob. Tsi' meleyob pulʌntib cha'an mi' pulbeñob i majtan lac Yum, cha'an mi' yʌq'ueñob majtañʌl cha'an i ñʌch'tʌlel i pusic'al.

⁵Jini israelob tsi' yʌlʌyob: ¿Am ba juntiquil winic, i p'olbal Israel, mach bʌ anic tsajni ti' yotot lac Yum? che'ob. Come tsa'ix i cha'leyob trato. Tsi yʌlʌyob wersa mi' cajelob ti chʌmel pejtelel jini mach bʌ anic mi' letselob ba'an lac Yum ya' ti Mizpa.

⁶Jini israelob tsi' wen meleyob i pusic'al, come tsa' caji i ña'tañob: Tsa'ix jili junmojt israelob, che'ob.

⁷Jini cha'an tsi' c'ajtibeyob: ¿Bajche' mi caj laj coltan jini winicob tsa' bʌ cʌleyob cha'an mi' tajob i yijñam? Come tsa'ix lac cha'le trato ti' tojlel lac Yum cha'an ma'anic mi caj lac sijibeñob la quixic'al, che'ob.

⁸Jini cha'an tsi' yʌlʌyob: ¿Am ba winicob ti' tojlel israelob mach bʌ anic tsa' letsiyob ba'an lac Yum ya' ti Mizpa? che'ob. Che' jini tsa' caji' ña'tañob ma'anic tsa' letsiyob tilel ba'an lac Yum jini año' bʌ ti Jabes Galaad mi juntiquilic.

⁹Come che' bʌ tsa' tsijquiyob jini winicob, tsiquil ma'anic tsa' c'oti mi juntiquilic am bʌ ti Jabes Galaad.

¹⁰Jini cha'an jini israelob tsi' chocoyob majlel lajchʌmp'ejl mil winicob wen ch'ejlo' bʌ. Tsi' yʌlʌyob: Cucula jisañob ti espada jini winicob chumulo' bʌ ti Jabes Galaad. Laj tsʌnsañob ya'i yic'ot jini x'ixicob yic'ot jini alʌlob.

¹¹Yom mi la' tsʌnsan winicob yic'ot x'ixicob año' bʌ i ñoxi'al, che'ob.

¹²Jumbajc' xch'oc tacob maxto bʌ añobic i ñoxi'al tsa' cʌleyob ti Jabes Galaad. Che' bʌ tsi' tajayob jini winicob, tsi' pʌyʌyob majlel cha'an mi' jijlelob ti Silo ya' ti' lumal Canaán.

¹³Che' jini ti ora jach tsi' chocoyob majlel winicob ba'an jini benjamiñob tsa' bʌ cʌleyob ya' ti ch'en i c'aba' Rimón. Tsi' tsictesʌbeyob lajmenix guerra.

¹⁴Tsa' cha' tiliyob jini benjamiñob. Tsa' aq'uentiyob jini xch'oc tacob tsa' bʌ tajleyob ya' ti Jabes Galaad, pero ma'anic tsa' jastʌyi ti' tojlelob.

¹⁵Jini israelob tsa' caji i wen p'untañob jini benjamiñob, come lac Yum tsi' t'ox jisa junmojt israelob.

¹⁶Jini cha'an tsi' yʌlʌyob jini xñoxob ti Israel: ¿Bajche' yom mi laj coltan jini benjamiñob maxto bʌ anic tsi' tajayob i yijñam? che'ob. Come tsa'ix laj tsʌnsʌnti jini x'ixicob ti Benjamín.

¹⁷Jini cha'an tsi' yʌlʌyob: Yom mi lac sʌclʌbeñob i yijñam jini benjamiñob tsa' to bʌ cʌleyob cha'an ma'anic mi' junyajlel jilel junmojt israelob.

¹⁸Pero ti lac tojlel mach mejlic lac sijibeñob la quixic'al cha'an i yijñamob. Come tsa'ix lac mele trato. Jini israelob tsi' yʌlʌyob: “La' aq'uentic i wocol jini mu' bʌ i sijibeñob i yixic'al jini benjamiñob”, che'ob.

¹⁹Jini cha'an tsi' yʌlʌyob: Ti jujump'ejl jab mi lac mel q'uin ti' tojlel lac Yum ila ti Silo am bʌ ti junwejl bij ba' mi' pasel q'uin che' ma' loq'uel ti Betel ya' ti norte cha'an ma' majlel ti Siquem, lʌc'ʌl ti Lebona, che'ob.

²⁰Jini israelob tsi' subeyob jini benjamiñob: Cucula. Mucu la' bʌ ti ts'usubil.

²¹Pijtanla ya'i jinto mi la' q'uel jini xch'ocob ch'oyolo' bʌ ti Silo che' woli' loq'uelob ti son. Yom mi la' bʌc' loq'uel ba' muculetla ti ts'usubil, cha'an mi la' chucob ti jujuntiquiletla, cha'an mi la' pʌyob majlel ti la' lumal. Mi caj i yochelob ti la' wijñam.

²²Mi tsa' tiliyob i tatob mi i yerañob cha'an mi' letsañob i t'an, mi caj c subeñob: “La'ix majlicob ili xch'ocob, come ma'anic tsa' jastiyi jini xch'ocob ya' ti Jabes Galaad cha'an i yijñamob benjamiñob. Ma'anic tsa' la cʌq'ueyob i yijñam. Tsa'ic la cʌq'ueyob, an lac mul”, che'ob.

²³Jini cha'an che'ʌch tsa' caji i melob jini benjamiñob. Tsi' pʌyʌyob majlel jini xch'ocob cha'an i yijñam. Jujuntiquil an i pi'ʌl. Tsi' pʌyʌyob majlel jini xch'ocob tsa' bʌ loq'uiyob ti son. Tsi' cha' meleyob tejclum tac ya' ti' lumal ba' tsa' chumleyob.

²⁴Che' jini tsa' laj sujtiyob israelob ti' lumal. Maxto anic rey ti Israel ti jim bʌ ora. Ti jujuntiquil winic tsi' mele bajche' tsi' bajñel ña'ta ti' pusic'al.