Read Chol Juezob 3 Bible Online

Juezob 3 - Chol bible

Juezob 3

¹Lac Yum tsi' cʌyʌ cabʌl tejclum ti' tojlel israelob cha'an mi' tsictiyel mi mux i chʌn jac'beñob lac Yum jini israelob. Maxto i cʌñʌyobic guerra che' bajche' i tatob tsa' bʌ ochiyob ti Canaán.

²Jini cha'an lac Yum tsi' yʌq'ueyob i ñop guerra cha'an mi' pʌsbeñob i ñuclel maxto bʌ anic tsi' q'ueleyob.

³Jiñobʌch i contrajob: jini filisteojob yic'ot jo'tiquil i yumob, jini cananeojob, yic'ot jini sidoniojob, yic'ot jini heteojob chumulo' bʌ ti wits i c'aba' Líbano ya' ti jini wits Baal Hermón c'ʌlʌl ti Hamat.

⁴Lac Yum tsi' cʌyʌyob cha'an mi' yʌc'ob ti prueba Israel, cha'an mi' q'uejlel mi muq'uix i jac'ob i mandar lac Yum che' bajche' tsi' sube Moisés ti' tojlel i ñojte'elob.

⁵Jini cha'an tsa' chumleyob israelob yic'ot cananeojob yic'ot heteojob yic'ot amorreojob, yic'ot ferezeojob, yic'ot heteojob, yic'ot jebuseojob.

⁶Tsi' pʌyʌyob xch'oc bʌ i yalobilob cha'an i yijñamob i yalobilob. Che' ja'el tsi' sijiyob i yalobilob cha'an mi' pʌjyelob. Tsi' ch'ujutesayob jini dioste' tac.

⁷Jini israelob tsi' cha'leyob jontolil ti' wut lac Yum, come tsa' ñajʌyi i cha'añob lac Yum Dios. Tsi' ch'ujutesayob jini baalob yic'ot jini aserajob.

⁸Jini cha'an lac Yum tsi' wen mich'leyob. Tsi' yʌc'ʌyob ti' c'ʌb jini rey Cusan Risataim, am bʌ ti Mesopotamia. Waxʌcp'ejl jab jini israelob tsa' ajniyob ti' wenta Cusan Risataim.

⁹Che' jini c'am tsi' pejcayob lac Yum. Lac Yum tsi' yʌc'ʌ juntiquil juez cha'an mi' coltañob, jiñʌch Otoniel i yalobil Cenaz, i yijts'in Caleb.

¹⁰I yEspíritu lac Yum tsi' yʌq'ue i p'ʌtʌlel cha'an mi' coltan Israel. Tsa' loq'ui majlel ti guerra. Lac Yum tsi' yʌq'ue i jisan Cusan Risataim jini i rey Siria. Otoniel tsi' mʌlbe jini Cusan Risataim.

¹¹Cha'c'al jab tsa' lajmi i tic'lʌntelob jini israelob che' cuxul to Otoniel. Tsa' chʌmi Otoniel i yalobil Cenaz.

¹²Jini israelob tsa' caji' cha' melob chuqui jontol ti' wut lac Yum. Jini cha'an lac Yum tsi' yʌc'ʌyob ti' c'ʌb Eglón, i rey Moab.

¹³Eglón tsi' laja i t'an yic'ot jini amoñob yic'ot jini amalecob. Tsi' mʌlbeyob jini israelob. Tsi' wersa ch'ʌmʌyob jini tejclum i c'aba' Palmeras.

¹⁴Jini israelob tsa' ochiyob ti' wenta Eglón, i rey Moab. Añob ti' wenta waxʌclujump'ejl (18) jab.

¹⁵C'am tsi' cha'leyob t'an jini israelob ti' tojlel lac Yum. Lac Yum tsi' yʌq'ueyob juntiquil sts'ej c'ʌb cha'an mi' coltañob, jiñʌch Aod i yalobil Gera, i p'olbal Benjamín. Jini israelob tsi' chocoyob majlel tojoñel ba'an Eglón rey ti Moab. Tsi' yʌc'ʌyob ti' c'ʌb Aod.

¹⁶Aod tsi' mele jump'ejl alʌ machit cha'wejl bʌ i yej. I tamlel jiñʌch junxujc'ubʌyel. Tsi' cʌchʌ ti mal i pislel ti ñoj bʌ i ya'.

¹⁷Aod tsi' yʌq'ue tojoñel Eglón rey ti Moab. Wen jujp'em jini Eglón.

¹⁸Che' bʌ ujtemix i yʌc' jini tojoñel, tsi' subeyob sujtel jini winicob tsa' bʌ i cuchbeyob tilel jini tojoñel.

¹⁹Pero ya' ba' mi' melob xajlel lʌc'ʌl ti Gilgal tsi' cha' sutq'ui i bʌ cha'an mi' cha' majlel ba'an Eglón. Aod tsi' sube: An chuqui com c subeñet ti mucul, che'en. Che' jini Eglón tsi' subeyob loq'uel i yaj cʌntayajob. Tsa' laj loq'uiyob.

²⁰Tsi' bej lʌc'tesa i bʌ Aod, che' buchul jini rey ba' mi' ñusan ticwal ti' cha'p'ejlel bʌ piso. Aod tsi' sube: An i t'an Dios com bʌ c sub ti a tojlel, che'en. Tsa' ch'ojyi Eglón ba' buchul.

²¹Che' jini Aod ti ts'ej bʌ i c'ʌb tsi' loc'sa jini alʌ machit am bʌ ti ñoj bʌ i ya'. Tsi' jec'be i ñʌc' Eglón.

²²Pejtelel i yej yic'ot i yoc jini alʌ machit tsa' ochi majlel, come wen jujp'em. Ma'anic tsa' mejli i loc'san jini alʌ machit ti' ñʌc'. Jini i lewil tsi' laj pixbe i yoc jini machit. Tsa' caji ti c'unte yojlel loq'uel i soyta'.

²³Tsa' loq'ui Aod ti corredor. Tsi' ñup'u i ti' jini otot. Tsi' wen ñete jini puerta.

²⁴Che' bʌ tsa' loq'ui, tsa' tiliyob i mozojob jini rey. Che' bʌ tsi' q'ueleyob ñup'ul jini puerta, tsi' yʌlʌyob: Tic'ʌl woli' c'aj i yo ya' ba' tsʌwan bʌ tsalʌl, che'ob.

²⁵Ti wi'il tsa' cajiyob ti bʌq'uen, come ma'anic woli' jajmel jini puerta. Tsi' ch'ʌmʌyob jump'ejl llave. Tsi' jamʌyob jini otot. Che' bʌ tsa' ochiyob tsi' tajayob jini rey ñolol ti lum, chʌmenix.

²⁶Che' bʌ tsa' jal'ayob, ajñel tsa' loq'ui majlel Aod. Tsa' ñumi ba' mi' melob xajlel. Tsa' majli ti puts'el ti Seirat.

²⁷Che' bʌ tsa' c'oti ya' ti' wits i c'aba' Efraín, tsa' caji i wus jini xulub. Pejtelel israelob tsa' jubiyob tilel ti wits tac yic'ot Aod. Tsi' yʌc'ʌ i bʌ ti yumʌntel.

²⁸Tsi' yʌlʌ: Tsajcañonla, come lac Yum tsa'ix i yʌc'ʌ ti laj c'ʌb pejtelel laj contra ti Moab, che'en. Tsi' tsajcayob majlel. Tsi' mʌctayob jini c'axibʌl ya' ti Jordán ba' mi' c'axelob jini ch'oyolo' bʌ ti Moab. Ma'anic tsi' yʌc'ʌyob ti c'axel mi juntiquilic.

²⁹Ti jim bʌ ora tsa' tsʌnsʌntiyob lujump'ejl mil moabob p'ʌtʌlo' bʌ winicob yujilo' bʌ guerra ti pejtelel. Ma'anic tsa' mejli ti puts'el mi juntiquilic.

³⁰Che'ʌch tsa' peq'uesʌnti Moab ti jim bʌ ora ti' p'ʌtʌlel Israel. Chʌnc'al jab ma'anix i tic'lʌntelob jini israelob.

³¹Wi'ilix Samgar i yalobil Anat tsi' tsʌnsa lujunc'al i cha'bajc' (600) filisteojob yic'ot i nico' wacax. Che'ʌch tsi' colta Israel.