Read Chol Juezob 5 Bible Online

Juezob 5 - Chol bible

Juezob 5

¹Ti jini q'uin Débora yic'ot Barac (i yalobil Abinoam) tsi' cha'leyob c'ay bajche' jini:

²La' sujbic i ñuclel lac Yum. Wen ch'ejlob i yumob israelob. Jini israelob tsi' tsajcayob majlel ti guerra.

³Ubinla reyet bʌ la, ñich'tanla yumʌlet bʌ la. Joñon mi caj j c'ʌyin lac Yum. Mi caj j c'ʌyin salmo tac cha'an lac Yum, i Dios Israel.

⁴C Yum, che' bʌ tsa' pʌyʌyon lojon loq'uel ti Seir, Che' bʌ tsa' pʌyʌyon lojon ñumel ti' lumal edomob, Jini lum tsa' ñijcʌyi, jini panchan ja'el. Jini tocal tsa' pʌntʌyi ti ja'.

⁵Tsa' nijcʌyi Sinaí wits ti' tojlel lac Yum Cha'an ya'an lac Yum, i Dios Israel.

⁶Che' woli ti yumʌntel Samgar i yalobil Anat, Ch'ijiyem jax jini colem bij tac. Jini mu' bʌ i xʌñob toj bʌ bij tsi' xʌñʌyob mucubij.

⁷Jochol tsa' cʌle jini tejclum tac ti Israel, tsa' t'ox jojmiyob, Jinto tsa' ch'ojyiyon Débora. Tsa' caji c mel que'tel che' bajche' juntiquil ña'ʌl i cha'an Israel.

⁸Jini israelob tsi' yajcayob tsiji' bʌ dios tac. Tsa' junyajlel pujch'iyob jini israelob. Ma'anic i ye'tʌjib soldadojob ti lac tojlel. Ma'anic mʌctʌjib, mi lanza ti' tojlel cha'c'al mil israelob.

⁹Yumʌlob ti Israel, tijicña mij q'ueletla. Tsa' la' wʌc'ʌ la' bʌ cha'an mi la' majlel la' coltan Israel. La' sujbic i ñuclel lac Yum.

¹⁰Yumʌlob c'ʌchʌlo' bʌ ti sʌsʌc bʌ burro, Yic'ot buchulo' bʌ ti' tasil mal, Yic'ot xñumelo' bʌ woliyo' bʌ ti xʌmbal ñumel, subenla i ñuclel Dios.

¹¹Nich'tanla i t'an música ya' ba'an cuxul bʌ ja'. Ya'i mi cajel la' wʌl bajche' tsa' mʌjli i cha'an lac Yum. Tsa' mʌjli i cha'an israelob, I cha'año' bʌ lac Yum tsi' cha'leyob marcha. Tsa' ñumiyob ti' ti' tac tejclum.

¹²Cañʌ a wut, cañʌ a wut, Débora. Cañʌ a wut, cañʌ a wut, c'ʌyin c'ay tac, Ch'ojyen, Barac, i yalobilet bʌ Abinoam. Pʌyʌ majlel jini xcʌjchelob a cha'an.

¹³Che' jini tsa' cajiyob ti majlel ti guerra jini uts'ato' bʌ. I tejclum lac Yum tsi' xʌnʌ majlel i contrajin jini p'ʌtʌlo' bʌ.

¹⁴Jini efraiñob tsa' wersa ochiyob ti joctʌl. Wi'ilix tsa' majli i p'olbalob Benjamín. Jini yumʌlob i cha'an Maquir tsa' tiliyob. Jini año' bʌ i ye'tel tsa' loq'uiyob ti Zabulón.

¹⁵Jini yumʌlob loq'uemo' bʌ ti Isacar tsa' majliyob yic'ot Débora yic'ot Barac. Tsa' ochi Barac ti joctʌl ti' tojlel jini soldadojob. Pero ma'anic tsa' majliyob i p'olbal Rubén. Cabʌl tsi' yʌc'ʌyob i t'an tilem bʌ ti pusic'al.

¹⁶¿Chucoch tsa' cʌleyet ti corral tac, cha'an ma' wubin i t'an tiñʌme'? Isujm mach tijicñayic i p'olbal Rubén. Cabʌl woli ti t'an i pusic'al.

¹⁷Galaad tsa' cʌle ti junwejl Jordán. ¿Chucoch tsa' cʌle Dan ti barco tac? Aser tsa' cʌle ti' ti' mar. Tsa' cʌle ba' mi c'otel barco.

¹⁸I p'olbalob Zabulón tsi' yʌc'ʌyob i bʌ cha'an mi' chʌmelob. Neftalí ja'el tsi' yʌc'ʌ i bʌ ti chʌmel ti bujtʌl tac.

¹⁹Tsa' tiliyob reyob, tsi' cha'leyob leto. Jini reyob ti Canaán tsi' cha'leyob guerra ti Taanac, ti' t'ejl jini pasib ja' ti Meguido. Ma'anic tsi' tajayob taq'uin.

²⁰Ya' ti panchan jini ec' tac tsi' cha'leyob guerra yilal. Ya' ba' woliyob ti xʌmbal tsi' cha'leyob guerra ti' contra Sísara.

²¹Tsi' jexbayob majlel jini ja' i c'aba' Cisón. C pusic'al, cha'len xʌmbal ti cabʌl a p'ʌtʌlel.

²²Ju'ucña tsa' la cubin i yoc caballo Ba' woli' ñumelob jini ch'ejl bʌ caballo.

²³“Chocbil ti' wut Dios jini tejclum Meroz”, che'en i yAngel lac Yum. Chocbilix ja'el i pi'ʌlob ti chumtʌl, Come ma'anic tsa' tili i coltañob lac Yum Ti' contra jini p'ʌtʌlo' bʌ.

²⁴Wen tijicña Jael ti' tojlel x'ixicob, I yijñam Heber jini ceneo. Numen tijicña bajche' yambʌ x'ixicob mu' bʌ i chumtʌlob ti pisil bʌ otot.

²⁵Tsi' c'ajtibe ja', tsa' aq'uenti lech. Ti wen bʌ taza tsi' yʌq'ue crema.

²⁶Tsi' ch'ʌmʌ jay bʌ i ni' te'. Tsi' ch'ʌmʌ martillo ti' ñoj. Tsi' ch'ijbe i jol Sísara. Tsi' sʌl jec'be i jol ti te'.

²⁷Tsa' ñoj yajli ti' yoc, ñʌch'ʌl tsa' cʌle. Ya' ba' tsa' pʌcle, tsa' chʌmi.

²⁸I ña' Sísara tsa' loq'ui i q'uel ti' ti' otot. Ya' ti' ti' otot tsi' yʌlʌ: “¿Chucoch ma'anic tsiquil mi' julel i carreta? ¿Chucoch mi' jal'an i t'an i yoc carreta?” che'en.

²⁹Juntiquil xch'oc am bʌ cabʌl i ña'tibal tsi' jac'ʌ. I ña' Sísara tsi' jac'ʌ ja'el:

³⁰“¿Mach ba wolic i pucbeñob i bʌ jini chubʌ'añʌl tsa' bʌ i ch'ʌmʌyob? Juntiquil o cha'tiquil xch'oc cha'an jujuntiquil soldado. Jini ch'ʌlbil bʌ bujcʌl mi caj i ch'ʌm tilel Sísara, Joch'bil bʌ bujcʌl am bʌ i ts'ijbal tac Che' bajche' mi' ch'ʌmob año' bʌ i ye'tel, che' mi' mʌjlelob i cha'an”, che'en.

³¹Che'ʌch yom mi' laj jilelob a contrajob c Yum. Pero jini mu' bʌ i c'uxbiñetob yom lajal i p'ʌtʌlel bajche' q'uin che' mi' pasel. Che'ʌch tsi' cha'leyob c'ay. Cha'c'al jab ma'anic tsi' yubiyob i tic'lʌntel jini israelob.