Read Chol Juezob 6 Bible Online

Juezob 6 - Chol bible

Juezob 6

¹Jini israelob tsi' cha'leyob chuqui jontol ti' wut lac Yum. Jini cha'an lac Yum tsi' yʌc'ʌyob ti' wenta Madián wucp'ejl jab.

²Che' añobix ti' wenta Madián, tsi' q'ueleyob cabʌl wocol. Cha'an ti caj jini madiañob tsa' caji i sʌclañob ch'en tac ti wits ba' mi' yajñelob.

³Che' bʌ tsi' cha'leyob pac', tsa' tiliyob madiañob yic'ot amalecob, yic'ot yaño' bʌ ch'oyolo' bʌ ti' pasibal q'uin cha'an mi' contrajiñob.

⁴Che' bʌ tsa' coli pac', tsi' jisayob i wut jini pʌc'ʌbʌl c'ʌlʌl ti Gaza. Ma'anic chuqui tsi' cʌybeyob israelob cha'an mi' c'uxob, mi tiñʌme', mi wacax, mi burro.

⁵Come motocña tsa' tiliyob yic'ot i wacax yic'ot pisil bʌ otot tac yic'ot camello. Jomocñayob che' bajche' sajc'. Tsa' tili i ch'ʌmob pejtelel chubʌ'añʌl ti jini lum.

⁶Che' jini tsa' ochi ti pobre pejtelel israelob cha'an ti' caj jini madiañob. C'am tsi' pejcayob lac Yum.

⁷Che' bʌ tsi' pejcayob lac Yum jini israelob ti c'am bʌ t'an ti' caj madiañob,

⁸lac Yum tsi' chocbeyob tilel juntiquil x'alt'an. Tsi' yʌlʌ: Lac Yum, i Dios Israel, woli' yʌl: “Joñon tsac loc'sayetla ti Egipto ba' woliyetla ti majtan e'tel.

⁹Tsa cʌc'ʌyetla ti libre che' añetla ti' wenta egiptojob, yic'ot che' añetla ti' wenta yaño' bʌ tsa' bʌ i tic'layetla. Tsac chocoyob loq'uel ti la' tojlel. Tsa cʌq'ueyetla i lum.

¹⁰Tsac subeyetla: A Yumon, a Dioson. Mach mi' la' bʌc'ñan i diosob amorreojob ba' woliyetla ti chumtʌl, cho'on, pero ma'anic tsa' la' jac'ʌ c t'an”. Che' tsi' yʌlʌ lac Yum, che'en jini x'alt'an.

¹¹Tsa' tili i yAngel lac Yum. Tsa' buchle ti yebal c'olol am bʌ ti Ofra, i cha'an Joás jini abiezer. Jini Gedeón (i yalobil Joás) woli' tijcan trigo ti' yotlel vino. Woli' muc jini trigo cha'an ma'anic mi' q'uelob jini madiañob.

¹²I yAngel lac Yum tsa' c'oti i pejcan. Tsi' yʌlʌ: Wʌle lac Yum an a wic'ot ti isujm. Wen ch'ejlet, che'en.

¹³Gedeón tsa' caji i yʌl: Mi isujm wʌ' an lac Yum quic'ot, ¿chucoch tsa' ujti pejtelel ili wocol tic tojlel lojon? ¿Bacan tsiquil pejtelel i p'ʌtʌlel tsa' bʌ i pʌsbeyob c ñojte'el lojon? Tsi' subeyon lojon bajche' tsi' pʌyʌyob loq'uel ti Egipto. Lac Yum tsa'ix i cʌyʌyon lojon. Tsa'ix i yʌc'ʌyon lojon ti jilel ti' c'ʌbob madiañob. Che' tsi' yʌlʌ Gedeón.

¹⁴Lac Yum tsi' pʌsbe i yutslel. Tsi' sube: Cucu, c'ʌñʌ ili a p'ʌtʌlel cha'an ma' coltan loq'uel jini israelob ti' c'ʌbob madiañob. Come joñoñʌch mu' bʌ c choquet majlel, che'en lac Yum.

¹⁵Gedeón tsi' yʌlʌ: C Yum, ¿bajche' mi mejlel j coltan jini israelob? Come p'ump'uñob c pi'ʌlob i p'olbalob Manasés. Joñon ja'el cojix bʌ i yalobilon c tat, che'en.

¹⁶Lac Yum tsi' jac'be: Añon a wic'ot. Mi caj a laj jisan jini madiañob ti pejtelelob, che'en.

¹⁷Gedeón tsi' sube: Mi uts'at ma' q'uelon awocolic pʌsbeñon i yejtal a p'ʌtʌlel cha'an mic ña'tan ti isujm tsa' pejcayon jatet.

¹⁸Ti wocol t'an mij c'ajtibeñet, mach ma' cʌyon jinto mic cha' julel che' mic ch'ʌmbeñet tilel a majtan, che'en. Lac Yum tsi' jac'be: Mi caj c pijtañet jinto ma' cha' julel, che'en.

¹⁹Gedeón tsa' ochi i chajpan juncojt alʌ chivo yic'ot waj melbil bʌ ti juncujch harina mach bʌ anic i levadurajlel. Tsi' yotsa jini we'elʌl ti chiquib. Tsi' yotsa i ya'lel ti p'ejt. Che' bʌ tsa' loq'ui, tsa' caji i yʌq'uen lac Yum ya' ti yebal c'olol.

²⁰Awilan i yAngel lac Yum tsi' sube: Jini we'elʌl yic'ot jini caxlan waj mach bʌ anic i levadurajlel yom ma' wʌc' ila ti pam xajlel. Mulu yic'ot i ya'lel, che'en. Che'ʌch tsi' mele che' bajche' tsa' subenti Gedeón.

²¹I yAngel lac Yum tsi' sʌts'ʌ i c'ʌb yic'ot jini te' chucul bʌ i cha'an. Che' bʌ tsa' c'ʌlʌ c'oti jini te' ya' baqui an jini we'elʌl yic'ot jini waj, tsa' loq'ui c'ajc ya' ti xajlel. Tsi' pulu jini we'elʌl yic'ot jini caxlan waj mach bʌ anic i levadurajlel. Che' bʌ tsa' ujti jini, tsi' cha' sʌtʌ i bʌ i yAngel lac Yum ti' wut.

²²Che' bʌ tsi' ña'ta Gedeón ti isujm jiñʌch i yAngel lac Yum tsa' bʌ i pejca, tsi' yʌlʌ: C Yum Dios, p'ump'uñon come tsa'ix j q'uele lojon c bʌ yic'ot i yAngel c Yum che' tic wa'tʌlel. Mi caj c chʌmel, che'en.

²³Lac Yum tsi' jac'be: La' ñʌch'lec a pusic'al. Mach a cha'len bʌq'uen, come ma'anic ma' cajel ti chʌmel, che'en.

²⁴Jini cha'an Gedeón tsa' caji i melben lac Yum i pulʌntib i majtan. Tsi' yotsʌbe i c'aba' c Yum Salom mu' bʌ i yʌl ti lac t'an: “Lac Yum mi' ñʌch'tesañonla”. C'ʌlʌl wʌle ya'to an ili pulʌntib ya' ti Ofra ba'an jini abiezerob.

²⁵Awilan ti jini jach bʌ ac'ʌlel lac Yum tsa' caji' pejcan: Loc'san tat wacax ti' potrero a tat, juncojt tat wacax am bʌ jump'ejl i jabilel. Yom ma' jem jini pulʌntib i cha'an Baal am bʌ ti' yotot a tat. Bic'ti top'o jini dios Asera ya' bʌ lotol ti' t'ejl.

²⁶Cha' wa'chocobeñon pulʌntib cha'an ma' wʌq'uen i majtan a Yum Dios ti' pam jini xuc'ul bʌ xajlel. Tsolol yom jini xajlel tac. Pʌyʌ tilel jini wacax. Yom ma' pulbeñon c majtan ya' ti pulʌntib. Pulu jini dioste' Asera che' bajche' si', che'en.

²⁷Jini cha'an Gedeón tsi' pʌyʌ tilel lujuntiquil x'e'telob i cha'an. Tsa' caji i mel che' bajche' tsi' sube lac Yum. Pero cha'an woli' bʌc'ñan i pi'ʌlob i tat yic'ot yaño' bʌ ti tejclum, ma'anic tsi' mele ti q'uiñil. Tsi' mele ti ac'ʌlel.

²⁸Awilan che' ti sʌc'ajel, che' bʌ tsa' cajiyob ti ch'ojyel ya' ti tejclum, tsi' q'ueleyob jejmenix jini pulʌntib i cha'an Baal. Tsepbilix jini dioste' i c'aba' Asera am bʌ ti' tojel pulʌntib. Tsi' q'ueleyob jini wacax am bʌ jump'ejl i jabilel pulemix ya' ti tsiji' bʌ pulʌntib tsa' bʌ poj ujti i mel.

²⁹Che' jini tsa' caji i c'ajtibeñob i bʌ: ¿Majqui tsi' mele iliyi? che'ob. Che' bʌ tsa' wen caji i c'ajtiñob majqui tsi' mele, tsa' subentiyob: Gedeón (i yalobil Joás) jiñʌch tsa' bʌ i mele, che'ob.

³⁰Jini cha'an jini winicob ya' ti tejclum tsa' tili i pejcañob Joás: Pʌyʌ loq'uel a walobil cha'an mi' chʌmel. Come tsa'ix i jeme i pulʌntib Baal. Tsa'ix i laj bic'ti tsepe jini dios Asera am bʌ ti' tojel jini pulʌntib, che'ob.

³¹Jini Joás tsa' caji i subeñob winicob tsa' bʌ c'oti ti' tojlel: ¿Mu' ba cajel la' tech leto cha'an mi la' coltan Baal? ¿Mach ba diosic cha'an mi' coltan i bʌ? Majqui jach yom i coltan Baal mi caj i chʌmel wʌle. Mi diosʌch jini Baal, la' i bajñel cha'len leto ti' contra jini winic tsa' bʌ i jembe i pulʌntib, che'en.

³²Che' jini ti jim bʌ q'uin Joás tsi' yotsʌbe i c'aba' Gedeón ti Jerobaal, mu' bʌ i yʌl ti lac t'an: “La' i bajñel cha'len leto jini Baal”, come Gedeón tsi' jembe i pulʌntib.

³³Awilan pejtelel jini madiañob yic'ot jini amalecob, yic'ot jini año' bʌ ti' pasibal q'uin junsujm jach tsi' tempayob i bʌ. Tsa' majli i tempañob i bʌ ya' ti joctʌl i c'aba' Jezreel.

³⁴Ti jim bʌ ora i yEspíritu lac Yum tsa' c'oti ti' tojlel Gedeón. Tsi' wusu jini xulub. Pejtelel jini abiezerob tsa' laj tiliyob.

³⁵Tsi' choco majlel suboñelob tac ti lumal Manasés. Tsa' caji i much'quiñob i bʌ ti' tojlel ja'el. Che' ja'el tsi' choco majlel suboñelob ti Aser, yic'ot ti Zabulón, yic'ot ti Neftalí. Jini ya' bʌ chumulob tsa' tiliyob ti' tojlel ja'el.

³⁶Che' jini Gedeón tsi' sube Dios: Mi isujm mi caj a coltan jini israelob tic tojlel che' bajche' tsa' wʌlʌ,

³⁷mi caj c loc'san i tsutsel tiñʌme' ya' ti pam otot. Che' ti sʌc'ajel mi ach' i tsutsel che' wen tiquin lum, mi caj c ña'tan isujm mi caj a coltan Israel tic tojlel che' bajche' tsa' subeyon, che'en Gedeón.

³⁸Awilan che' bʌ tsa' sʌc'a pañimil ti yijc'ʌlal, tsa' caji' yʌts'ben i ya'lel i tsutsel tsa' bʌ ach'a. Tsa' bujt'i jump'ejl colem taza.

³⁹Che' jini Gedeón tsi' cha' sube lac Yum: Machme cajic a mich'leñon c Yum cha'an wolic cha' pejcañet yambʌ junyajl. Cojach yambʌ junyajl com j q'uel i yejtal a p'ʌtʌlel ya' ti' tsutsel tiñʌme. Awocolic che' mi cʌc' i tsutsel ti pañimil yom tiquin mi yajñel. Cojach yom mi' yʌch'an lum ti ye'eb, che'en.

⁴⁰Ti jim bʌ ac'ʌlel Dios tsi' mele che' bajche' tsi' c'ajtibe. Wen tiquin tsa' cʌle i tsutsel. Cojach jini lum tsa' ach'a ti ye'eb.