Read Chol Juezob 8 Bible Online

Juezob 8 - Chol bible

Juezob 8

¹Jini winicob ti Efraín tsa' caji i subeñob Gedeón: ¿Chucoch leco jax woli a mel? Ma'anic tsa' pʌyʌyon lojon che' bʌ tsa' majliyetla ti guerra ti' contra Madián, che'ob. Cabʌl tsa' caji i yʌ'leñob ti tsʌts bʌ t'an.

²Jini cha'an Gedeón tsi' subeyob: Mach yoque anic i c'ʌjñibal jini tsa' bʌ c cha'le, pero wen ñuc jini tsa' bʌ la' cha'le. Come lac Yum tsa'ix i yʌc'ʌ ti la' c'ʌb jini Oreb yic'ot Zeeb, jini yumʌlo' bʌ ti Madián. Jini cha'an, ¿chuqui i c'ʌjñibal jini tsa' bʌ c cha'le? che'en. Che' jini tsa' lajmiyob i mich'ajel che' bʌ tsi' yubiyob ili t'an.

⁴Tsa' cha' tili Gedeón ti Jordán. Temel tsa' c'axi yic'ot jini jo'lujunc'al i winicob. Wen lujbeñobix, pero tsi' chʌn ajñesayob i contrajob.

⁵Che' jini tsa' tiliyob ti Sucot. Gedeón tsi' subeyob jini ya' bʌ añob ti Sucot: Awocolic mic subeñetla aq'ueñob chuqui mi' c'uxob yic'ot chuqui mi' japob ili winicob año' bʌ quic'ot, come wen lujbeñobix. Wolic toj sʌclan lojon jini Zeba yic'ot Zalmuna, reyob ti Madián, che'en.

⁶Jini año' bʌ i ye'tel ti Sucot tsi' yʌlʌyob: ¿Tsa'ix ba ajq'ui ti la' wenta jini Zeba yic'ot Zalmuna? ¿Yom ba mi cʌq'ueñob waj a soldadojob che' maxto anic tsa' la' cʌchʌyob? che'ob.

⁷Gedeón tsi' jac'beyob: Lac Yum mi caj i yʌc' tij c'ʌb lojon jini Zeba yic'ot Zalmuna. Che' jini mi caj c joch'etla ti ch'ix ti pejtelel la' bʌc'tal ya' ti colem bʌ i tiquiñal pañimil, che'en.

⁸Tsa' caji ti letsel majlel ti Peniel. Che' c'otemobix tsi' c'ajtibeyob i bʌl ñʌc'ʌl. Pero jini año' bʌ ti Peniel lajal tsa' caji i yʌlob che' bajche' jini año' bʌ ti Sucot.

⁹Gedeón tsi' subeyob jini año' bʌ ti Peniel: Jinto che' tsa'ix mʌjli c cha'an, mux caj c cha' sujtel tilel. Mi caj c jem jubel ili chan bʌ ts'ajc, che'en.

¹⁰Ti jim bʌ ora ya' añob Zeba yic'ot Zalmuna ti Carcor temel yic'ot jo'lojuntiquil mil soldadojob. Jiñobʌch i colobal jini winicob tilemo' bʌ ti' pasibal q'uin. Tsa' tsʌnsʌntiyob che' bajche' wʌcc'al mil winicob yujilo' bʌ guerra.

¹¹Tsa' letsi tilel Gedeón ya' ti bij baqui mi' ñumelob jini ch'oyolo' bʌ ti Noba yic'ot ti Jogbeha ya' ti' pasibal q'uin, chumulo' bʌ ti pisil bʌ otot. Gedeón tsi' jisa jini soldadojob che' mach yʌxʌlobic i yo.

¹²Che' bʌ tsa' puts'iyob Zeba yic'ot Zalmuna, tsa' caji i wersa ajñesañob majlel jinto tsa' mejli i chucob jini cha'tiquil rey ti Madián. Jini yaño' bʌ soldadojob tsa' wen cajiyob ti puts'el.

¹³Ti jim bʌ ora Gedeón (i yalobil Joás) tsa' cha' sujti ti guerra. Tsa' sujti ti' jajp wits i c'aba Heres.

¹⁴Tsi' chucu juntiquil ch'iton winic ch'oyol bʌ ti Sucot. Tsi' c'ajtibe i c'aba' tac jini yumʌlob yic'ot jini ñuc bʌ i ye'tel ti Sucot. Tsi' yʌc'ʌ ti ts'ijbuntel ti jun. Ti' pejtelel añob wuclujuntiquil i chʌnc'al (77) winicob.

¹⁵Che' bʌ tsa' cha' c'oti Gedeón ya' ti Sucot, tsa' caji i subeñob: Awilan wʌ'ix an jini Zeba yic'ot Zalmuna. Tsa' la' wajleyon. Tsa' la' subeyon: “¿Anix ba ti la' c'ʌb jini Zeba yic'ot Zalmuna? ¿Yom ba mi cʌq'ueñob i bʌl i ñʌc' la' winicob che' lujbeñob?” che'etla, che'en Gedeón.

¹⁶Che' jini tsi' chucu jini año' bʌ i ye'tel ti Sucot. Tsi' ju'sʌbeyob i pusic'al yic'ot jini ch'ix yic'ot tsajatun am bʌ ti' tiquiñal pañimil.

¹⁷Che' ja'el tsi' wersa jeme jini chan bʌ ts'ajc ti Peniel. Tsi' tsʌnsayob jini winicob ya'i.

¹⁸Gedeón tsi' sube jini Zeba yic'ot Zalmuna: ¿Bajche' yilal jini winicob tsa' bʌ la' tsʌnsa ti Tabor? che'en. Tsi' jac'beyob: Che' bajche' jatet. Ti jujuntiquil che'ʌch yilal bajche' i yalobil rey, che'ob.

¹⁹Gedeón tsi' subeyob: Querañobʌch jini winicob. Melel mic subeñetla, come mic bʌc'ñan jini cuxul bʌ lac Yum, tsa'ic la' wʌc'ʌyob ti sujtel ti' yotot, ma'anic mic wersa tsʌnsañetla, che'en.

²⁰Che' jini tsi' sube Jeter jini ascuñʌl bʌ i yalobil: Ch'ojyen ti ora, tsʌnsañob, che'en. Pero jini ch'iton ma'anic tsi' bots'o i machit come tsi' cha'le bʌq'uen, come ch'iton to.

²¹Zeba yic'ot Zalmuna tsi' subeyob: Ch'ojyen jatet, tsʌnsañon lojon, come winiquet lajal bajche' joñon lojon. La' chʌmicon lojon ti a p'ʌtʌlel, che'ob. Jini cha'an tsa' tejchi Gedeón. Tsi' tsʌnsa Zeba yic'ot Zalmuna. Tsi' ch'ʌmʌ jini uts'atax bʌ tsucu taq'uin am bʌ ti' bic' i camello.

²²Jini israelob tsi' subeyob Gedeón: La'ix ochiquet tic yum lojon, ti wi'il a walobil yic'ot a buts, come tsa'ix a coltayon lojon ti' tojlel jini madiañob, che'ob.

²³Pero Gedeón tsi' subeyob: Mach mejlicon ti ochel ti la' yum, mi calobilic, come co jach lac Yum Dios mi caj la' yuman.

²⁴Pero com c'ajtibeñetla wocol t'an cha'an mi la' wʌq'ueñon jini oro tsa' bʌ la' taja ti jujuntiquil, che'en. Come añob i cha'an wen uts'atax bʌ ujʌl melbil bʌ ti oro, come ismaelob jini winicob.

²⁵Tsi' jac'beyob: Ti pejtelel c pusic'al mi cʌq'ueñet lojon, che'ob. Che' jini tsa' caji i tʌsob pisil ba' tsi' yʌc'ʌyob jini uya'ʌl tac melbil bʌ ti oro tsa' bʌ i tajayob ti jujuntiquil.

²⁶Ti pejtelel i yalel jini oro tac tsa' bʌ i c'ajti añʌch i tojol che' bajche' lujunc'al mil peso. Parte an i ch'ʌjlil tac yic'ot jini xotol tac bʌ tsucu taq'uin yic'ot jini bujcʌl tac wen melbil bʌ tsa' bʌ i c'ʌñʌyob jini reyob ti Madián, yic'ot ja'el jini xotol bʌ tsucu taq'uin tsa' bʌ i yʌc'ʌyob ti' bic' jini camello.

²⁷Gedeón tsa' caji i mel jump'ejl efod* yic'ot jini oro cha'an mi' choc majlel ti cʌntʌntel ya' ti Ofra. Pejtelel jini israelob tsa' caji i ch'ujutesañob jini efod c'ʌlʌl jinto tsa' sojqui ja'el Gedeón temel yic'ot i yalobilob.

²⁸Che'i tsa' jisʌntiyob jini madiañob ti' tojlel israelob. Ma'anix tsa' mejli i chʌn ch'ejlesañob i bʌ. Cha'c'al jab ma'anix tsa' tic'lʌntiyob jini israelob che' cuxul to Gedeón.

²⁹Che' bʌ tsa' ujti pejtelel jini, Gedeón tsa' cha' sujti ti' yotot.

³⁰An lujuntiquil i chʌnc'al i yalobilob Gedeón ti pejtelelob, come cabʌl i yixicob.

³¹Tsi' yʌq'ue i yalobil ja'el juntiquil i yixic ya' bʌ an ti Siquem. Tsi' yotsʌbe i c'aba' Abimelec.

³²Wen ñoxix tsa' chʌmi Gedeón (i yalobil Joás). Ya' tsa' mujqui ti mucoñibʌl ti' t'ejl i tat i c'aba' Joás, ya' ti Ofra ba'an jini abiezerob.

³³Pero che' chʌmenix Gedeón, jini israelob tsa' cha' caji i ch'ujutesañob jini dios Baal. Tsi' diosiyob jini Baalberit.

³⁴Jini israelob ma'anix tsi' chʌn ña'tayob lac Yum Dios. Ma'anix tsi' chʌn ña'tayob ja'el mi jiñʌch lac Yum tsa' bʌ i coltayob ti' tojlel i contrajob.

³⁵Ma'anix tsi' wen pejcayob i yalobilob Jerobaal am bʌ i c'aba' ti Gedeón, anquese Gedeón tsi' wen coltayob che' woliyob ti wocol.