Read Chol xRut 1 Bible Online

xRut 1 - Chol bible

xRut 1

¹Che' woli to i cha'leñob yumʌntel jini juezob, an cabʌl wi'ñal ti' lumal Judá. Juntiquil winic ya' bʌ chumul ti Belén ti Judá tsa' majli ti chumtʌl ya' ti' lumal Moab yic'ot i yijñam yic'ot cha'tiquil ch'iton bʌ i yalobilob.

²I c'aba' jini winic jiñʌch Elimelec. I c'aba' i yijñam jiñʌch Noemí. I c'aba' jini cha'tiquil i yalobilob jiñʌch Mahlón yic'ot Quelión. Ch'oyolob ti Belén am bʌ i cha'chajplel i c'aba' Efrata ya' ti Judá. Tsa' tem majliyob ti' lumal Moab. Ya' tsa' cʌleyob.

³Tsa' chʌmi Elimelec, i ñoxi'al Noemí. Tsa' cʌle ti meba' Noemí yic'ot i yalobilob.

⁴Jini cha'tiquil i yalobilob tsi' pʌyʌyob i yijñam chumulo' bʌ ti Moab. I c'aba' juntiquil Orfa, i c'aba' yambʌ Rut. Ya' tsa' chumleyob che' bajche' lujump'ejl jab.

⁵Tsa' chʌmiyob ja'el Mahlón yic'ot Quelión ti cha'ticlel. Meba'ix tsa' cʌle Noemí come ma'anix i yalobil, ma'anix i ñoxi'al.

⁶Che' bʌ ya'to an Noemí yic'ot cha'tiquil i yʌ'lib ti' lumal Moab, tsi' yubi cha' añix i bʌl i ñʌc' i pi'ʌlob cha'an tsi' p'untayob lac Yum. Tsi' chajpa i bʌ Noemí cha'an mi' sujtel ti' lumal.

⁷Jini cha'an tsa' caji ti loq'uel ya' ba' chumul cha'an mi' sujtel majlel ti' lumal Judá. Jini cha'tiquil i yʌ'lib tsa' caji' pi'leñob majlel ti xʌmbal.

⁸Noemí tsi' subeyob: Cucuxla ti sujtel ti la' cha'ticlel ya' ti' yotot la' ña'. La' i pʌsbeñetla i yutslel lac Yum che' bajche' tsa' la' pʌsbeyon i yutslel la' pusic'al quic'ot calobilob tsa' bʌ chʌmiyob.

⁹La' i yʌq'ueñetla lac Yum la' ñoxi'al yic'ot la' wotot ti la' cha'ticlel cha'an tijicña mi la' c'aj la' wo, che'en. Noemí tsi' ts'ujts'uyob. C'am tsa' cajiyob ti uq'uel.

¹⁰I yʌ'libob Noemí tsi' subeyob: Isujm mux c majlel lojon quic'otet ba'an a pi'ʌlob, che'ob.

¹¹Noemí tsi' subeyob: Sujtenla calobilob. ¿Chucoch mi la' lon ña'tan majlel quic'ot? ¿Mejl ba j cʌntan yambʌ calobilob cha'an mi' pʌyetob?

¹²Sujtenla calobilob. Cucuxla. Xñejep'onix. Mach c chʌn tajayix c ñoxi'al. Muq'uic c taj yambʌ c ñoxi'al wʌle ti jini jach bʌ ac'ʌlel, muq'uic j cʌntan yaño' bʌ calobilob,

¹³¿la' wom ba la' pijtañob ti colel che' jini? I yorajlelix mi la' pʌjyel wʌle. ¿La' wom ba la' to'ol ajñel? Mach che'ic yom, calobilob. Wen ch'ijiyem c pusic'al cha'an woli la' wubin wocol, come lac Yum tsi' chilbeyoñob tijicña bʌ, che'en.

¹⁴Tsi' cha' cha'leyob c'am bʌ uq'uel. Orfa tsi' ts'ujts'u i yʌ'lib cha'an wolix ti sujtel. Tsʌts tsi' tul meq'ue i yʌ'lib Rut, come mach yomic i cʌy.

¹⁵Noemí tsi' sube Rut: Awilan tsa'ix sujti a jawʌn ba'an i pi'ʌlob yic'ot i dioste' tac. Tsajcan majlel, che'en.

¹⁶Rut tsi' yʌlʌ: Mach a subeñon sujtel cha'an mij cʌyet. Mach a tic'on ti majlel a wic'ot, come ya' ba' ma' majlel mic majlel ja'el. Ya' ba' ma' chumtʌl mi caj c chumtʌl. Jini a pi'ʌlob mi caj i sujtelob tic pi'ʌlob. Jini a Dios c Diosʌch.

¹⁷Ya' ba' ma' chʌmel mi caj c chʌmel ja'el. Ya'i mi caj c mujquel. Mi tsaj cʌyʌyet che' cuxulon to, la' i cʌyon lac Yum. La' i melon ti ñumen p'ump'un. Che' tsi' yʌlʌ Rut.

¹⁸Che' bʌ tsi' ña'ta Noemí cha'an ti jump'ejl jach i pusic'al yom i pi'len majlel Rut, tsi' cʌyʌ i suben sujtel.

¹⁹Jini cha'an jini cha'tiquil tsa' tem cajiyob ti xʌmbal majlel. Tsa' c'otiyob ti Belén. Che' bʌ tsa' ochiyob ti Belén, tsa' cajiyob ti t'an pejtel winicob x'ixicob. Che' bʌ tsi' q'ueleyob tsi' yʌlʌyob: ¿Isujm ba jiñʌch Noemí jini? che'ob.

²⁰Noemí tsi' subeyob: Mach la' pejcañon ti Noemí (jiñʌch tijicña bʌ). Pejcañon ti Mara (jiñʌch ch'ijiyem bʌ), come cabʌl tsi' yʌq'ueyon i ch'ijiyemlel c pusic'al jini Mach Bʌ Anic I P'isol I P'ʌtʌlel.

²¹Ts'ʌcʌlon lojon tsa' majliyon lojon quic'ot lojon c chubʌ'an. C bajñelix tsi' cha' pʌyʌyon sujtel lac Yum, jocholix j c'ʌb. ¿Chucoch mi la' pejcañon ti Noemí? come tsiquil tsi' yʌq'ueyon wocol lac Yum. Jini Mach Bʌ Anic I P'isol I P'ʌtʌlel tsi' yʌq'ueyon i ch'ijiyemlel c pusic'al. Che' tsi' yʌlʌ Noemí.

²²Che' jini tsa' sujti Noemí yic'ot Rut i yʌ'lib ch'oyol bʌ ti Moab. Tsi' cʌyʌyob i lumal Moab cha'an mi' sujtelob ti Belén. Tsa' c'otiyob che' ti' tejchibal i yorajlel che' mi' tsepob cebada.