Read Chol xRut 2 Bible Online

xRut 2 - Chol bible

xRut 2

¹An juntiquil winic wen chumul bʌ, i c'aba' Booz. Jiñʌch i pi'ʌl Elimelec, i ñoxi'al Noemí tsa' bʌ chʌmi. Juntiquil jach i ñojte'el ti cha'ticlel.

²Rut jini ch'oyol bʌ ti Moab tsi' sube Noemí: A wocolic la' majlicon ti jamil cha'an mic tempan cʌlejem bʌ cebada. Mux c tsajcan majlel jini stsep cebada mu' bʌ i q'uelon ti uts'at, che'en. I yʌ'lib tsi' sube Rut: Cucu calobil, che'en.

³Jini cha'an tsa' majli Rut. Tsa' c'oti ya' ti jamil. Tsi' tempa majlel cebada ti' pat stsep cebadajob. I yum jini jamil ba' tsa' c'oti jiñʌch Booz, lajal bʌ i ñojte'el yic'ot Elimelec.

⁴Awilan tsa' c'oti Booz loq'uem bʌ ti Belén. Tsi' sube stsep cebadajob: La' ajnic lac Yum la' wic'ot, che'en. Jini stsep cebadajob tsi' cha' sutq'uibeyob cortesía: La' i yʌq'ueñet i yutslel lac Yum, che'ob.

⁵Booz tsi' c'ajtibe i winic, jiñʌch mu' bʌ i q'uel stsep cebadajob: ¿Majqui i cha'an jini xch'oc? che'en.

⁶I winic Booz tsi' sube i yum: Jiñʌch xch'oc bʌ x'ixic ch'oyol bʌ ti Moab. Noemí tsi' pʌyʌ tilel che' bʌ tsa' loq'ui ti' lumal Moab.

⁷Tsi' subeyon: Awocolic, la' c tempan cebada ti jamil. La' c tsajcan majlel jini stsep cebadajob cha'an mic tempan jini cʌlejem bʌ, che'en. Tsa' juli che' ti sʌc'ajel. C'ʌlʌl wʌle wʌ'to an. Maxto anic tsi' cʌyʌ i ye'tel cha'an mi' sujtel ti' yotot. Che' tsi' yʌlʌ i winic Booz.

⁸Booz tsi' sube Rut: Ubibeñon xch'oc. Uts'at tsa' tiliyet ilayi. Mach ma' majlel a tempan cebada ti yambʌ jamil. Mach ma' cʌy ili lum cha'an yambʌ. Jalijen wʌ'i ti' t'ejl x'ixic bʌ x'e'telob c cha'an.

⁹Q'uele jini jamil ba' woli' tsepob cebada. Tsajcañob majlel. Tsac subeyob c winicob cha'an ma'anic mi' tic'lañetob. Che' tiquinix a ti' cucu ba'an uc'um. Japʌ chuqui tsi' luchuyob jini winicob, che'en Booz.

¹⁰Rut tsi' ñocchoco i bʌ ti' t'ejl i yoc, ñucul i jol. Tsi' sube: Wocolix a wʌlʌ, c yum. Cabʌl wola' pʌsbeñon i yutslel a pusic'al, anquese yambʌyʌch c lumal ba' ch'oyolon, che'en.

¹¹Booz tsi' sube: Ti isujm tsa cubi pejtel chuqui tsa' melbe a wʌ'lib che' bʌ tsa' chʌmi a ñoxi'al c'ʌlʌl wʌle. Tsa cubi bajche' tsa' cʌyʌ a tat a ña' yic'ot a lumal cha'an ma' tilel ba'an winicob x'ixicob mach bʌ a cʌñʌyobic.

¹²La' i yʌq'ueñet lac Yum a chobejtʌbal cha'an jini tsa' bʌ a mele. Ts'ʌcʌl yom ma' wʌq'uentel ti lac Yum, come tsa' wʌc'ʌ a bʌ ti' wenta i Dios Israel cha'an ma' taj a coltʌntel ti yebal i wich', che'en.

¹³Rut tsi' sube: Cabʌl tsa' pʌsbeyon i yutslel a pusic'al, c yum. Tsa' wen ñuq'uesʌbeyon c pusic'al. Wen uts tsa' pejcayon anquese mach añonic ti a wenta, come mach a criadajonic, che'en.

¹⁴Che' ti' yorajlel c'ux waj Booz tsi' pʌyʌ Rut: La' wʌ'i. C'uxu waj. Ts'aja a waj ti vino, che'en. Tsa' tili ti buchtʌl ba'an stsep cebadajob. Booz tsi' yʌq'ue i c'ux woch' bʌ cebada. Tsi' c'uxu jinto tsa' ñaj'a. Tsi' loto i colojbal.

¹⁵Che' bʌ tsa' ch'ojyi Rut cha'an mi' cha' tempan cebada, Booz tsi' sube i winicob: La' i tempan ya' ba' tsepbil. Mach mi la' tic'.

¹⁶Tuc'ula loq'uel ts'ita' ti jujunsejt cebada. Yom mi la' t'ox yʌsan majlel cha'an mi' lot. Mach mi la' tic', che'en.

¹⁷Rut tsi' tempa c'ʌlʌl ti ic'ajel. Tsi' jats'ʌ jini tempʌbil bʌ cebada cha'an mi' loc'sʌben i sujl. Tsi' lotbe i bʌc'. Tsa' bujt'i jump'ejl chiquib.

¹⁸Tsi' q'ueche majlel. Tsa' sujti ti tejclum. Tsi' pʌsbe i yʌ'lib chuqui tsi' tempa. Tsi' jiti ja'el i colojbal i bʌl i ñʌc' tsa' bʌ cʌle che' bʌ tsa' ñaj'a. Tsi' yʌq'ue i yʌ'lib.

¹⁹I yʌ'lib tsi' c'ajtibe: ¿Baqui tsa' tempa sajmʌl? ¿Baqui tsa' cha'le e'tel? Uts jini winic tsa' bʌ i q'ueleyet ti uts'at, che'en Noemí. Rut tsi' sube i yʌ'lib chuqui tsa' ujti ya' ba' tsi' cha'le e'tel. Tsi' yʌlʌ: I c'aba' i yum jini lum ba' tsac cha'le e'tel sajmʌl, jiñʌch Booz, che'en.

²⁰Noemí tsi' sube i yʌ'lib: La' i yʌq'uen i yutslel i pusic'al lac Yum, come uts i pusic'al Booz. Lajal mi' pʌsbeñob i yutslel i pusic'al jini cuxulo' bʌ che' bajche' tsi' pʌsbeyob lac pi'ʌlob tsa' bʌ chʌmiyob, che'en. Tsi' yʌlʌ ja'el: Jini winic mero lac pi'ʌlʌch. Jiñʌch mu' bʌ mejlel i coltañonla, che'en.

²¹Rut ch'oyol bʌ ti Moab tsi' yʌlʌ: Booz tsi' subeyon ja'el cha'an mic jalijel ba'an x'ixic bʌ x'e'telob i cha'an jinto mi' yujtel i tsepob cebada, che'en.

²²Noemí tsi' sube Rut i yʌ'lib: Calobil, uts'atʌch bajche' mi' yʌl. Yom ma' majlel yic'ot x'ixic bʌ x'e'telob i cha'an ame anic majch mi' tic'lañet mi tsa' majliyet ti yambʌ jamil, che'en.

²³Jini cha'an tsa' jale Rut ya' ba'an x'ixic bʌ x'e'telob i cha'an Booz. Tsi' tempa cebada jinto tsa' ujti i tsepob cebada yic'ot trigo. Tsa' chumle ti' yotot i yʌ'lib.