Read Chol xRut 3 Bible Online

xRut 3 - Chol bible

xRut 3

¹Noemí tsa' caji i suben: Calobil, ¿mach ba yomic mic sajcʌbeñet a ñoxi'al cha'an tijicña ma' wajñel?

²¿Mach ba mero lac pi'ʌlic jini Booz, i yum jini lum ba' tsa' cha'le e'tel yic'ot x'ixic bʌ x'e'telob i cha'an? Awilan, wʌle ti ac'ʌlel mi caj i wejlan i sujl cebada ya' ba' mi' jajts'el.

³Cha'len ts'ʌmel. Boño a bʌ ti xojocña bʌ aceite. Lʌpʌ wen bʌ a pislel. Cucu ti otot ba' mi' jats'ob cebada. Ti mucul jach yom ma' pijtan jini winic jinto mi' yujtel ti we'el ti uch'el.

⁴Che' mi' majlel ti wʌyel yom ma' q'uel baqui ñolol. Ti wi'il yom ma' majlel ya'i. Loc'sʌben i mosil ti' yoc. Ñoli' ya'i. Jini mi caj i subeñet chuqui yom ma' mel, che'en.

⁵Rut tsi' jac'be: Mi caj c mel che' bajche' wola' subeñon, che'en.

⁶Tsa' majli ba' mi' jats'ob cebada. Tsi' cha'le che' bajche' tsi' sube i yʌ'lib.

⁷Tijicña i pusic'al Booz che' bʌ tsa' ujti ti we'el ti uch'el. Tsa' majli ti wʌyel ti junwejl ba' p'uchul i wut jam. Ti wi'il c'unte' tsa' ochi Rut. Tsi' loc'sʌbe i mosil ti' yoc. Tsa' ñole ja'el.

⁸Ti ojlil ac'ʌlel tsa' cajñi i wut Booz. Tsi' yʌxʌ i yo. Tsi' ts'eje i bʌ. Tsi' yubi ya'an x'ixic ñolol ti' t'ejl i yoc.

⁹¿Majquiyet? che'en. Jini x'ixic tsi' sube: Joñon Rut x'e'telon a cha'an. Pʌyʌyon come jatet mero c pi'ʌlet lojon. An ti a wenta cha'an ma' wa'chocoben i q'uexol jini chʌmen bʌ, che'en.

¹⁰Booz tsi' sube: La' i pʌsbeñet i yutslel lac Yum. Wʌle ñumen wola' pʌsben Noemí i yutslel a pusic'al che' bajche' ti ñaxan, come ma'anic tsa' majliyet ba'an ch'iton bʌ winicob mi wen chumulob o mi ma'anic i chubʌ'an.

¹¹Mach a mel a pusic'al. Mi caj c melbeñet pejtel chuqui wola' c'ajtibeñon. Come cʌmbilet i cha'an pejtel c pi'ʌlob. Laj yujilob uts'at bʌ x'ixiquet.

¹²Isujm joñon a pi'ʌlon. Pero an yambʌ ñumen mero a pi'ʌl bajche' joñon.

¹³Cʌlejen wʌ'i c'ʌlʌl mi' ñumel ac'ʌlel. Che' ti sʌc'ajel mux c pejcan yambʌ a pi'ʌl. Mi yom i coltañet la' i mel. Mi mach yomic i coltañet mi caj j coltañet joñon che' bajche' yom, come a pi'ʌlon. Melelʌch chuqui wolic sub come mic bʌc'ñan lac Yum. Ñoli' jinto mi' sʌc'an, che'en.

¹⁴Tsa' ñole Rut ti' t'ejl i yoc c'ʌlʌl che' bʌ tsa' ñumi ac'ʌlel. Tsa' ch'ojyi ti wen ic'to che' maxto anic tsa' mejli i cʌmbeñob i wut, come Booz tsi' yʌlʌ: Mach yomic mi' tsictiyel mi tsa' tili x'ixic wʌ' ba' mi lac jats' cebada, che'en.

¹⁵Tsi' yʌlʌ ja'el: Ch'ʌmʌ tilel a mosil. Tich'i, che'en. Booz tsi' colbe ochel wʌcp'ejl i p'isol cebada. Tsi' yʌq'ue i q'uech majlel. Che' jini tsa' sujti Rut ti tejclum.

¹⁶Tsa' c'oti ba'an i yʌ'lib. Tsi' c'ajtibe: ¿Bajche' tsa' ujti, calobil? che'en. Rut tsi' sube Noemí ti pejtelel chuqui tsa' ujti.

¹⁷Tsi' yʌlʌ Rut: Tsi' yʌq'ueyon ili wʌcp'is cebada. Tsi' subeyon: “Mach ma' to'ol sujtel majlel ba'an a wʌ'lib”. Che' tsi' subeyon Booz, che'en Rut.

¹⁸Tsi' yʌlʌ Noemí: Calobil, pijtan ti' ñʌch'tilel a pusic'al jinto ma' wubin bajche' mi' caj ti ujtel, come ili winic ma'anic mi caj i c'aj i yo jinto mi' yujtel i mel pejtel chuqui yom. Ti jini jach bʌ q'uin mi caj i mel, che'en.