Read Chol 1 Samuel 1 Bible Online

1 Samuel 1 - Chol bible

1 Samuel 1

¹An juntiquil winic i c'aba' Elcana i yalobil Jeroham. (Jini Jeroham i yalobilʌch Eliú. Eliú i yalobilʌch Tohu. Tohu i yalobilʌch Zuf jini efrateo.) Ya' ch'oyol Elcana ti Ramataim am bʌ ti Zofim ya' ti wits i c'aba' Efraín.

²An cha'tiquil i yijñam. Juntiquil i c'aba' Ana, jini yambʌ i c'aba' Penina. An i yalobilob Penina pero Ana ma'anic i cha'an.

³Ti jujump'ejl jab i tilel mi' letsel majlel ili winic ti tejclum i c'aba' Silo cha'an mi' ch'ujutesan lac Yum, jiñʌch i Yum Panchan yic'ot Pañimil. Tsa' majli i tsʌnsʌben i majtan*. Ya' añob i yalobilob Elí. Jiñobʌch Ofni yic'ot Finees, motomajob* i cha'an lac Yum.

⁴Che' i yorajlelix mi' tsʌnsʌben i majtan lac Yum, Elcana tsi' yʌq'ue we'elʌl Penina, i yijñam, yic'ot pejtelel i yalobilob.

⁵Elcana tsi' wen c'uxbi Ana. Tsi' yʌq'ue we'elʌl i wenta cha'an juntiquil jach, come lac Yum ma'anic tsi' yʌq'ue i yalobil.

⁶Penina tsi' chañ'esa i bʌ ti' tojlel Ana. Tsi' ts'a'le. Tsi' yotsʌbe i ch'ijiyemlel i pusic'al, come lac Yum ma'anic tsi' yʌq'ue i yalobil.

⁷Che'ʌch tsi' mele Penina ti jujump'ejl jab che' bʌ tsa' letsiyob majlel ti' yotot lac Yum. Cabʌl tsi' tic'la. Jini cha'an cabʌl tsi' cha'le uq'uel Ana. Tsi' cʌyʌ waj.

⁸Elcana i ñoxi'al tsi' sube: ¿Chucoch ma' cha'len uq'uel? ¿Chucoch ma'anic ma' c'ux waj? ¿Chucoch ch'ijiyem a pusic'al che' c'ux mi cubiñet? ¿Mach ba ñumen uts'atic ma' q'uelon bajche' lujuntiquil alʌlob? che'en.

⁹Che' bʌ tsa' ujti ti we'el yic'ot ti uch'el ya' ti Silo, tsa' ch'ojyi Ana i pejcan lac Yum ti oración. Buchul jini motomaj Elí lʌc'ʌl ba'an i yoyel i Templo lac Yum.

¹⁰Wen ch'ijiyem i pusic'al Ana. Tsi' pejca lac Yum. Tsi' wen cha'le uq'uel.

¹¹Tsi' wa'choco i t'an ti' tojlel lac Yum. Tsi' yʌlʌ: C Yum, i Yumet Panchan yic'ot Pañimil, q'ueleyon a mozojon. P'untañon cha'an woli cubin wocol. Mach a ñajatesañon, pʌsbeñon i yutslel a pusic'al. A wocolic aq'ueñon juntiquil ch'iton bʌ calobil, come a mozojon. Che' jini mi caj c cha' aq'ueñet cha'an mi' melbeñet a we'tel ti pejtelel ora. A cha'añʌch mi caj i majlel. Ma'anic mi caj i set'bentel i jol. Che'ʌch tsi' pejca lac Yum Ana.

¹²Elí woli jach i q'uelben i yej Ana che' jal woli' pejcan lac Yum.

¹³Elí tsa' caji i lon ña'tan yʌc jini Ana, come ti' pusic'al jach woli ti t'an. Ma'anic c'am i t'an. Jini jach i yej woli' ñijcan i bʌ.

¹⁴Jini cha'an Elí tsi' sube: ¿Bajche' to ora mi caj i c'ajtiyel a wo? Cucux jinto mi' c'ajtiyel a cha'an pañimil, che'en.

¹⁵Ana tsi' jac'be: Mach che'ic bajche' wola' wʌl. Ch'ijiyem jax c pusic'al. Ma'anic japbil c cha'an vino, mi lembal. Cojach tsac wen tsictesʌbe lac Yum pejtel c wocol.

¹⁶Mach a lon q'uelon che' bajche' xlemoñel. Ti' ch'ijiyemlel c pusic'al yic'ot cabʌl c wocol tsac pejca lac Yum ti ili ora, che'en Ana.

¹⁷Elí tsi' jac'be: Cucu ti' ñʌch'tʌlel a pusic'al. La' i yʌq'ueñet i Dios Israel pejtelel chuqui tsa' c'ajtibe, che'en.

¹⁸Che' jini Ana tsi' yʌlʌ: La' c taj i yutslel a pusic'al. Che' jini tsa' majli. Tsi' c'uxu waj, lajmenix i ch'ijiyemlel i pusic'al.

¹⁹Che' ti wen sʌc'ajel tsa' ch'ojyi. Tsi' ch'ujutesa lac Yum. Tsa' sujtiyob ti' yotot ya' ti Ramá. Elcana tsi' pi'le Ana i yijñam. Che' jini lac Yum tsa' c'ajtiyi i cha'an i yoración Ana.

²⁰Tsi' yʌq'ue i cʌntan i yalobil. Che' bʌ tsa' ts'ʌctiyi i yorajlel cha'an mi' yʌc' ti pañimil i yalobil, Ana tsi' yotsʌbe i c'aba' Samuel. Tsi' yʌlʌ: Jiñʌch calobil tsa' bʌ j c'ajtibe lac Yum, che'en.

²¹Tsa' letsi majlel jini winic Elcana yic'ot pejtelel año' bʌ ti' yotot cha'an mi' tsʌnsʌben i majtan lac Yum, cha'an mi' ts'ʌctesan i t'an.

²²Pero Ana tsi' sube: Maxto anic mic majlel jinto mi' cʌy i chu' calobil. Che' tsa'ix i cʌyʌ i chu', muq'uix c pʌy majlel quic'ot ya' ti' tojlel lac Yum cha'an ya'ix mi' junyajlel cʌytʌl, che'en.

²³Elcana i ñoxi'al tsi' sube: Mele che' bajche' a wom. Cʌlen jinto che' mi' cʌy i chu'. La' ts'ʌctiyic chuqui yom lac Yum, che'en. Tsa' cʌle jini x'ixic. Tsi' cosa i yalobil jinto che' tsi' cʌyʌ i chu'.

²⁴Che' bʌ tsi' cʌyʌ i chu' jini alʌl, Ana tsi' pʌyʌ majlel ti' yotot lac Yum ya' ti Silo. Tsi' pʌyʌ majlel ja'el juncojt tat wacax am bʌ uxp'ejl i jabilel yic'ot juncujch harina, yic'ot junwojl vino. Alʌl to jini ch'iton che' bʌ tsi' pʌyʌ majlel ti' yotot lac Yum ya' ti Silo.

²⁵Tsi' tsʌnsayob jini wacax. Tsi' pʌyʌyob tilel jini ch'iton ti' tojlel Elí.

²⁶Che' jini Ana tsi' sube Elí: ¿A cʌñʌyon ba? Joñon tsac pejca lac Yum wʌ' ti a t'ejl che' bʌ tsa' q'ueleyon che' woliyon ti oración.

²⁷Tsaj c'ajtibe lac Yum ili ch'iton. Tsi' yʌq'ueyon che' bajche' tsaj c'ajtibe.

²⁸Jini cha'an wolic cha' aq'uen lac Yum. I cha'an mi caj i yajñel che' wʌ'to an ti pañimil, che'en. Tsa' caji i ch'ujutesañob lac Yum.