Read Chol 1 Samuel 10 Bible Online

1 Samuel 10 - Chol bible

1 Samuel 10

¹Samuel tsi' ch'ʌmʌ junwojl aceite. Tsi' mulbe ti' jol Saúl. Tsi' ts'ujts'u. Tsi' sube: Yajcʌbilet ti lac Yum cha'an ma' wochel ti' yum israelob.

²Che' wola' sujtel ti bij che' tsa'ix a cʌyʌyon, mi caj a taj cha'tiquil winicob ya' ba' mucul Raquel, ba' jaxʌl i lumal Benjamín ti jini xchumtʌl i c'aba' Selsa. Jini winicob mi caj i subeñetob: “Tsa'ix tajle jini burro tac tsa' bʌ sajti. Jini a tat tsa'ix i cʌyʌ i pensarin jini burro tac. Woli jax i wen mel i pusic'al cha'añet. Woli' pensarin bajche' mi caj i taj i yalobil”. Che' mi caj i yʌlob.

³Che' woliyet ti xʌmbal majlel che' lʌc'ʌlix jini c'olol ya' ti Tabor mi caj i tajet uxtiquil winicob. Woli' majlelob ti Betel cha'an mi' pejcañob Dios. Juntiquil woli' pʌy majlel uxcojt alʌ chivo. Yambʌ woli' ch'ʌm majlel uxq'uejl waj, yambʌ, junwojl vino.

⁴Mi caj i yʌq'ueñetob cortesía che' bajche' i tilel mi' melob laj cʌñʌyo' bʌ. Mi caj i yʌq'ueñetob cha'q'uejl caxlan waj. Yom ma' ch'ʌm.

⁵Ti wi'il mi caj a majlel ya' ti bujtʌl i cha'an bʌ Dios ya' ba'an i yotot tac jini soldadojob filisteojob. Che' ma' wochel ti tejclum mi caj a taj junmojt x'alt'añob woli bʌ i jubelob ti pulʌntib am bʌ ti bujtʌl. Añob i cha'an salterio yic'ot pandero yic'ot flauta, yic'ot arpa tac. Woli' subob i t'an Dios.

⁶I yEspíritu lac Yum mi caj i tilel ti a tojlel yic'ot i p'ʌtʌlel. Mi caj a cha'len alt'an temel yic'otob. Mach chʌn lajalix mi caj a wajñel che' bajche' ti ñaxan.

⁷Che' wolix ti ujtel ti a tojlel iliyi, mele che' bajche' yom, come Dios woli' pi'leñet majlel.

⁸Yom ma' ñaxan majlel ti Gilgal. Wi'il mic jubel majlel ja'el. Ya' mic tilel c tajet cha'an mic pul majtañʌl*. Mi caj cʌc' majtañʌl cha'an i ñʌch'tʌlel lac pusic'al. Yom ma' pijtañon wucp'ejl q'uin jinto mij c'otel ba' añet cha'an mic pʌsbeñet pejtelel chuqui yom ma' mel. Che' tsi' yʌlʌ Samuel.

⁹Tsa' ujti che' bajche' tsi' yʌlʌ Samuel. Che' bʌ tsi' sutq'ui i bʌ Saúl cha'an mi' sujtel ti' yotot, lac Yum tsi' q'uextʌbe i pusic'al. Pejtelel jini tsa' bʌ pʌsbenti tsi' laj q'uele ti ili q'uin.

¹⁰Che' bʌ wolix i c'otelob ya' ti bujtʌl, awilan tsa' tili i tajob junmojt x'alt'añob. Che' jini i yEspíritu Dios tsa' tili yic'ot i p'ʌtʌlel ti' tojlel. Tsa' caji ti alt'an temel yic'otob.

¹¹Pejtelel i cʌñʌyo' bʌ tsa' bʌ i q'ueleyob Saúl che' woli' tem cha'len alt'an yic'ot x'alt'añob tsi' yʌlʌyob: ¿Chuqui tsa' ujti ti' tojlel i yalobil Cis? ¿Jim ba Saúl yic'ot x'alt'añob? che'ob.

¹²Juntiquil ya' bʌ chumul tsi' yʌlʌ: ¿Majqui i tatob ili winicob? che'en. Cha'an ti' caj iliyi tsa' caji i yʌlob: ¿Jim ba x'alt'an ja'el Saúl? ¿I pi'ʌl ba x'alt'añob? che'ob.

¹³Che' bʌ tsi' cʌyʌ i cha'len alt'an, tsa' letsi majlel Saúl ti bujtʌl ba'an jini pulʌntib.

¹⁴Juntiquil i yumijel Saúl tsi' c'ajtibe jini x'e'tel i cha'an: ¿Baqui tsajniyetla? che'en. Jini x'e'tel tsi' jac'ʌ: Tsajni c sajcan lojon jini burro tac, come ma'anic tsiquil. Tsa' c'ʌlʌ majliyon lojon ba'an Samuel, che'en.

¹⁵I yumijel Saúl tsi' yʌlʌ: Subeñon chuqui tsi' yʌlʌ Samuel, che'en.

¹⁶Che' jini Saúl tsi' sube i yumijel: Ti jamʌl tsi' subeyon lojon tajlemix jini burro, che'en. Pero ma'anic tsi' sube chuqui tsi' yʌlʌ Samuel cha'an i yumʌntel.

¹⁷Samuel tsi' tempa tilel pejtelel israelob ti' tojlel lac Yum ya' ti Mizpa.

¹⁸Tsi' subeyob: Che'ʌch woli' yʌl lac Yum i Dios israelob: “Joñon tsac loc'sa israelob ya' ti Egipto. Joñon tsaj coltayetla loq'uel ti' c'ʌbob egiptojob ti' tojlel jini yumʌlob tsa' bʌ i tic'layetla.

¹⁹Pero jatetla wolix la' cʌyon anquese tsaj coltayetla loq'uel ti pejtelel la' wocol, ti pejtelel la' ch'ijiyemlel. Wolix la' wʌl: Mach chʌn comix c yuman lojon Dios. Wa'chocobeñon lojon c rey wʌle, che'etla. Jini cha'an yom mi la' wa'tʌl tic tojlel ti mojt ti mojt”, che'en lac Yum. Che' tsi' yʌlʌ Samuel.

²⁰Che' jini Samuel tsi' subeyob tilel pejtelel israelob ti mojt ti mojt. Tsa' yajcʌnti junmojt, i c'aba' Benjamín.

²¹Samuel tsi' subeyob tilel pejtelel jini benjamiñob ti mojt ti mojt. Dios tsi' yajca Matri yic'ot i yalobilob. Ti wi'il Dios tsi' yajca Saúl i yalobil Cis. Pero che' bʌ tsa' caji i sajcañob, ma'anic tsi' tajayob.

²²Jini cha'an tsi' c'ajtibeyob lac Yum mi maxto anic tilem jini winic. Lac Yum tsi' jac'ʌ: Ya' woli' mujcun i bʌ ya' ba' mi' lojtel jini chubʌ'añʌl, che'en.

²³Ti ajñel tsa' majliyob i pʌy tilel. Che' ya'ix wa'al ti ojlil, ñumen chan jini Saúl che' bajche' pejtelel i pi'ʌlob. Ya' jach jaxʌl mi' c'otelob i jolob ti' quejlab.

²⁴Samuel tsi' subeyob: Q'uelela ili winic tsa' bʌ i yajca lac Yum. Ma'anic yambʌ lajal bʌ bajche' ili winic, che'en. Ti pejtelelob tsa' cajiyob ti c'am bʌ t'an: La' ñuq'uesʌntic jini rey, che'ob.

²⁵Samuel tsi' tsictesʌbeyob bajche' mi caj i yumañob i rey. Tsi' ts'ijba ti jun ti' tojlel lac Yum.

²⁶Che' jini Samuel tsi' chocoyob sujtel ti' yototob. Saúl ja'el tsa' sujti ti' yotot ya' ti Gabaa. Tsi' pi'leyob majlel jini winicob uts'at bʌ i pusic'al nijcʌbilo' bʌ i cha'an lac Yum.

²⁷Pero an juntiquil cha'tiquil tsʌtso' bʌ i pusic'al. Tsa' caji i yʌlob: ¿Bajche' mi caj i coltañonla ili winic? che'ob. Ma'anic tsa' caji i wen p'isob ti wenta. Ma'anic tsi' yʌq'ueyob i majtan Saúl. Ñʌch'ʌl jach Saúl. Ma'anic chuqui tsi' yʌlʌ.