Read Chol 1 Samuel 12 Bible Online

1 Samuel 12 - Chol bible

1 Samuel 12

¹Samuel tsi' sube pejtelel israelob: Tsa'ix cubi pejtelel chuqui tsa' la' subeyon. Tsa'ix c wa'chocobeyetla la' rey.

²Jini cha'an q'uelela jini rey woli bʌ i toj'esañetla. Ñoxonix, sʌquix c jol. Wʌ' añob calobilob la' wic'ot. Tsa'ix c mele chuqui toj ti la' wut c'ʌlʌl che' alobon to.

³Wʌ'ix añon wʌle. Yomix mi la' sub ti' tojlel lac Yum, yic'ot ti' tojlel jini yajcʌbil bʌ rey, mi an chuqui leco tsac melbeyetla. Subula mi an juntiquil tsa' bʌ c tic'la, mi tsac ch'ʌmʌ la' wacax, mi la' burro, mi mach tojic tsac meleyetla, mi tsac ch'ʌmʌ c majtan cha'an mij coltan jini am bʌ i mul. Subuxla wʌle. Che' tsi' yʌlʌ Samuel.

⁴Jini israelob tsi' yʌlʌyob: Ma'anic tsa' wis tic'layon lojon. Ma'anic chuqui tsa' chilbeyon lojon. Ma'anic tsa' ch'ʌmʌ a majtan, che'ob.

⁵Samuel tsi' yʌlʌ: Lac Yum jiñʌch testigo c cha'an ti la' tojlel. Jini yajcʌbil bʌ rey i cha'an, jiñʌch testigo ja'el ti ili q'uin, come ma'anic chuqui leco tsa' la' taja tic tojlel, che'en. Tsi' jac'ʌyob: Melel bajche' ma' wʌl. Jiñʌch testigo Dios, che'ob.

⁶Samuel tsi' subeyob: Lac Yum jiñʌch tsa' bʌ i wa'choco Moisés yic'ot Aarón. Tsi' pʌyʌ loq'uel la' ñojte'elob ya' ti' lumal Egipto.

⁷Jini cha'an yom mi la' wa'tʌl ti' tojlel lac Yum cha'an mic subeñetla pejtelel chuqui tac uts'at tsi' melbeyetla yic'ot la' ñojte'elob.

⁸Che' bʌ ya'ix an israelob ti Egipto, tsa' caji i yubiñob wocol i p'olbal. Jini la' ñojte'elob tsi' pejcayob lac Yum ti c'am bʌ t'an. Jini cha'an lac Yum tsi' chocbeyob majlel Moisés yic'ot Aarón tsa' bʌ i loc'sayob ti Egipto. Tsi' pʌyʌyob tilel ilayi.

⁹Pero tsa' ñajʌyi i cha'añob lac Yum Dios. Jini cha'an Dios tsi' yʌc'ʌyob ti' c'ʌb Sísara i yum jini soldadojob loq'uemo' bʌ ti Hazor, yic'ot ti' c'ʌb filisteojob, yic'ot ti' c'ʌb jini moabob tsa' bʌ i contrajiyob ti guerra.

¹⁰Jini cha'an tsi' pejcayob lac Yum ti c'am bʌ t'an. Tsi' yʌlʌyob: “Tsa'ix c cha'le lojon mulil, come tsaj cʌyʌyet lojon. Tsa'ix c lon ch'ujutesa lojon jini Baal yic'ot Astarot. Cha' coltañonix lojon. Che' jini mux c cha' mel lojon chuqui a wom”, che'ob.

¹¹Lac Yum tsi' chocbeyob majlel Jerobaal, Barac, Jefté yic'ot Samuel. Tsi' coltayetla loq'uel ti' p'ʌtʌlel la' contrajob am bʌ ti la' joytʌlel. Che' jini cha' ñʌch'ʌletixla wʌ' ba' chumuletla.

¹²Che' bʌ tsa' la' bʌc'ña Nahas i rey jini amoñob che' woli' contrajiñetla, tsa' la' subeyon: “Wersa comix lojon c rey”, che'etla, anquese añʌch la' rey, jiñʌch lac Yum Dios.

¹³Jini cha'an wʌ'an la' rey tsa' bʌ la' yajca. Jiñʌch tsa' bʌ la' c'ajti. Awilan lac Yum tsa'ix i wa'chocobeyetla la' rey.

¹⁴Mi muq'uix caj la' wen bʌc'ñan lac Yum, mach yomic mi la' ñusʌben i t'an. Che' jini mi caj la' tsajcan lac Yum Dios jatetla yic'ot jini rey mu' bʌ caj i cha'len yumʌl ti la' tojlel.

¹⁵Pero mi ma'anic mi la' wubiben i t'an lac Yum, mi mux la' ñusʌben i t'an, che' jini lac Yum mi caj i yʌq'ueñetla wocol che' bajche' tsi' yʌq'ueyob la' ñojte'el.

¹⁶Pijtanla jini ñuc bʌ i melbal lac Yum. Q'uelela chuqui mi caj i mel ti la' tojlel.

¹⁷¿Mach ba i yorajlelix mi' tujq'uel trigo che' ma'anic mi' cha'len ja'al? Joñon mi caj c pejcan lac Yum. Mux caj i yʌc' ti t'an chajc. Mi caj i choc tilel ja'al cha'an mi la' ña'tan ñucʌch la' mul ti' contra lac Yum cha'an tsa' la' c'ajti la' rey. Che' tsi' yʌlʌ Samuel.

¹⁸Che' jini Samuel tsi' pejca lac Yum ti oración ti jini jach bʌ q'uin. Lac Yum tsi' choco tilel i t'an chajc yic'ot ja'al. Pejtelel jini winicob tsa' caji i bʌc'ñañob lac Yum. Tsi' bʌc'ñayob Samuel ja'el.

¹⁹Ti pejtelelob tsa' caji' subeñob Samuel: A wocolic, pejcan a Yum Dios ti oración. C'ajtiben cha'an mi' coltañon lojon ame chʌmicon lojon cha'an pejtelel c mul lojon. Melel jontolon lojon. Jini cha'an tsaj c'ajti lojon c rey, che'ob.

²⁰Samuel tsi' sube jini winicob: Mach la' cha'len bʌq'uen. Melel tsa' la' cha'le mulil, pero mach yomic mi la' chʌn tʌts' la' bʌ ti' tojlel lac Yum. Ch'ujutesanla ti pejtelel la' pusic'al.

²¹Mach la' lon majlel ba'an dios te' tac, come ma'anic chuqui mi' yʌq'ueñetla, come ma'anic i c'ʌjñibal.

²²Ma'anic mi caj i bajñel cʌy i tejclum lac Yum ame ts'a'lentic jini ñuc bʌ i c'aba', come woli' ña'tan ti' pusic'al bajche' yom i yotsañetla ti' tejclum.

²³Joñon ja'el mi caj c chʌn coltañetla ti oración. Machiqui, mic taj c mul ti' contra lac Yum. Mi caj j cʌntesañetla ti jini wen bʌ bij, jini toj bʌ.

²⁴Chʌcʌ q'uele la' bʌ cha'an mi la' wen bʌc'ñan lac Yum, cha'an mi la' ch'ujutesan ti pejtelel la' pusic'al. P'isila ti wenta jini ñuc tac bʌ i ye'tel tsa' bʌ i melbeyetla.

²⁵Pero mi tsʌts to la' pusic'al mi la' chʌn cha'len jontolil jatetla yic'ot jini la' rey, p'ump'un mi caj la' cʌytʌl. Che' tsi' yʌlʌ Samuel.