Read Chol 1 Samuel 14 Bible Online

1 Samuel 14 - Chol bible

1 Samuel 14

¹Jonatán tsa' caji' suben jini x'e'tel i cha'an mu' bʌ i ch'ʌmben majlel i ye'tijib cha'an guerra: Conla, la' c'axiconla ya' ti wits ba' tempʌbilob jini filisteojob, che'en. Pero ma'anic tsi' sube i tat.

²Ya' tsa' cʌle Saúl ti yebal granado te' am bʌ ti Migrón ti' junwejlel Gabaa, yic'ot lujunc'al i chabajc' (600) winicob.

³Ya'an ja'el Ahías (i yalobil Ahitob, i yʌscun Icabod). (Jini Ahitob i yalobilʌch Finees i yalobil bʌ Elí, jini motomaj i cha'an lac Yum ti Silo.) Ahías lʌpʌl i cha'an jini bujcʌl cha'an i ye'tel Dios. Ma'anic majch tsi' ña'ta mi mach chʌn ya'ix an Jonatán.

⁴Ya' ti' bijlel filisteojob ba' yom ñumel Jonatán cha'an mi' majlel i tajob, an cha'p'ejl colem xajlel, jay ts'ucan bʌ i ni' ti jujunwejl bij. Jump'ejl xajlel i c'aba' Boses, jini yambʌ i c'aba' Sene.

⁵Ya' wa'al jump'ejl xajlel ti norte ti' tojel Micmas. Yambʌ an ti sur ti' tojel Gabaa.

⁶Jonatán tsi' sube jini x'e'tel i cha'an mu' bʌ i ch'ʌmben majlel e'tijibʌl cha'an guerra: Conla ti ñumel ya' ba' añob jini mach bʌ tsepbilobic i pʌchʌlel. Tic'ʌl mux i coltañonla lac Yum, come cabʌl i p'ʌtʌlel jini lac Yum. Mi' c'ʌn winicob ti' ye'tel. Mi cabʌlob o mi ma'anic jaytiquil, junlajal ti' wut, che'en.

⁷Jini i yaj cuch e'tijibʌl tsi' jac'ʌ: Concula. Mele pejtelel chuqui a wom. Jump'ejl jach lac pusic'al. Ya'to mij coltañet ti pejtelel chuqui ma' mel, che'en.

⁸Jonatán tsi' yʌlʌ: Conla ti c'axel ya' ba' mi caj i q'uelonla jini filisteojob.

⁹Mi tsi' subeyonla: “Pijtañon lojon jinto mij c'otel lojon ya' ba' añetla”, mi che'ob, ya' jach mi caj lac wa'tʌl lac pijtañob. Che' jini ma'anic mi caj lac letsel majlel lac tajob.

¹⁰Pero mi tsi' subeyonla: “Letsenla tilel ilayi”, mi che'ob, mux caj lac letsel. Che' jini mux i mʌjlel lac cha'an, come lac Yum tsa'ix i yʌc'ʌyob ti laj c'ʌb cha'an mi lac jisañob. Mi caj lac ña'tan wolix i coltañonla lac Yum, che'en Jonatán.

¹¹Tsa' majliyob ba' tsi' q'ueleyob filisteojob. Jini filisteojob tsi' yʌlʌyob: Awilan wolix i cha' loq'uelob jini hebreojob ya' ba' muculob ti ch'en tac ba' tsa' puts'iyob, che'ob.

¹²Tsi' subeyob Jonatán yic'ot i yaj cuch e'tijibʌl: Yom mi la' letsel tilel ba' añon lojon. An chuqui com c subeñet lojon, che'ob. Che' jini Jonatán tsi' sube i yaj cuch e'tijibʌl: Yom ma' letsel tilel tic pat. Come lac Yum tsa'ix i yʌc'ʌyob ti' c'ʌb Israel, che'en.

¹³Tsa' ts'ujyi letsel Jonatán. Tsa' letsi ja'el jini xcuchijel ti' pat. Jonatán tsi' jats'ʌ majlel jini filisteojob ti jujuntiquil. Jini i yaj cuch e'tijibʌl tsa' bʌ majli ti' pat i yum tsi' tsʌnsayob.

¹⁴Ya' ba' tsa' c'otiyob ti ñaxan ti' tejchibal guerra, Jonatán yic'ot i yaj cuch e'tijibʌl tsi' tsʌnsayob che' bajche' junc'al winicob. Pam pujquem tsi' cʌyʌyob jini ch'ujlelʌlob ya' ti xajlelol.

¹⁵Che' jini tsa' cajiyob ti wen bʌq'uen pejtelel jini filisteojob ya' ba' añob. Tsa' tili i yujquel lum ja'el. Pejtelel winicob tsa' toj sajtiyob i pusic'al.

¹⁶Jini i yaj q'ueloñelob Saúl año' bʌ ti Gabaa ti' lumal Benjamín tsi' q'ueleyob tʌctʌcñayob jini winicob ya' ba' woli yujquel lum.

¹⁷Che' jini Saúl tsi' sube i winicob ya' ti Gabaa: Yom mi la' wen q'uel mi an majch tsa' loq'ui ti lac tojlel, che'en. Che' jini tsa' caji' q'uelob, mach ya'ic an Jonatán yic'ot i winic mu' bʌ i ch'ʌmben majlel i ye'tijib cha'an guerra.

¹⁸Saúl tsi' sube Ahías: Ch'ʌmʌ tilel jini Arca i cha'an bʌ lac Yum, che'en. Come ti jim bʌ ora ya'an jini Arca ti' tojlel jini israelob.

¹⁹Che' bʌ woli to ti t'an Saúl yic'ot jini motomaj, woli' p'ojlel ju'ucña bʌ t'an ba' woliyob ti wocol jini filisteojob. Ju'ucña tsi' yubibeyob i t'an. Jini cha'an Saúl tsi' sube jini motomaj: Tʌts'ʌ a c'ʌb, cʌyʌx, che'en.

²⁰Saúl tsi' tempa pejtelel jini winicob ya' bʌ añob. Tsi' pʌyʌyob ya' baqui woliyob ti guerra. Che' bʌ tsa' caji i q'uelob, awilan woli' jats'ob i bʌ ti espada jini filisteojob. Sojquemob i jol cha'an bʌq'uen.

²¹Jini hebreojob tsa' bʌ cʌjchiyob majlel cha'an jini filisteojob ti yambʌ ora cha'an mi' coltañob ti' ye'tel, tsa' tiliyob i coltan i pi'ʌlob israelob am bʌ ti' wenta Saúl yic'ot Jonatán.

²²Jini israelob tsa' bʌ cʌn puts'iyob ya' ti te'el i c'aba' Efraín tsa' tiliyob ja'el che' bʌ tsi' yubiyob woliyobix ti puts'el jini filisteojob. Tsa' caji' yajñesañob ja'el.

²³Che' jini lac Yum tsi' wen colta jini israelob ti jim bʌ q'uin. Tsa' c'ʌlʌ c'otiyob ti guerra ti Betavén.

²⁴Pero pejtelel jini israelob tsi' yubiyob wocol ti jini q'uin, come Saúl tsi' wʌn subeyob: Majqui jach mi' c'ux i bʌl i ñʌc' che' anto q'uin, che' maxto anic tsa' mʌjli lac cha'an ti guerra, mux i chojquel ti Dios jini winic, che'en. Jini cha'an ma'anic chuqui tsi' wis c'uxuyob ti jini q'uin.

²⁵Tsa' ñumiyob ti jumpejt te'el ba' wen cabʌl chab ti' petol jini lum.

²⁶Pero ma'anic majch tsa' mejli i jap, come añob i bʌq'uen ame chojquicob ti Dios che' bajche' tsi' yʌlʌ Saúl.

²⁷Pero ma'anic ubibil i cha'an Jonatán chuqui tsi' yʌlʌ i tat che' bʌ tsi' tiq'uiyob. Tsi' letsa i te' cha'an mi' yʌch'esan yic'ot i ya'lel chab. Che' jini tsi' yotsa ti' yej. Tsa' caji ti ch'ejl'an. Tijicñayix pañimil tsi' yubi.

²⁸Che' jini tsa' tili winic i suben: Tsi' yʌlʌ a tat ti' tojlel pejtelel israelob cha'an muc' abi i chojquel ti Dios majqui jach mi' c'ux i bʌl i ñʌc', che'en. Jini cha'an c'uñobix i pusic'al. Yomobix chʌmel ti wi'ñal.

²⁹Jonatán tsi' jac'ʌ: Jini c tat woli jach i tic'lan winicob. Q'ueleyon wʌle. Cha' tijicñayix pañimil woli cubin cha'an ili ts'ita' chab tsa' bʌ c mʌc'ʌ.

³⁰Uts'at tsa'ic i laj c'uxuyob i bʌl ñʌc'ʌl tsa' bʌ i cʌyʌyob laj contrajob che' bʌ tsa' puts'iyob. Che'iqui ñumen tsa' mejli lac jisan jini filisteojob, che'en.

³¹Anquese anto yom i p'ʌtʌlel jini soldadojob israelo' bʌ ti jim bʌ q'uin, pero wersa tsa' mejli i jisañob filisteojob ti Micmas c'ʌlʌl ti Ajalón.

³²Che' bʌ tsa' bʌjli q'uin jini winicob tsa' caji' ch'ʌmob i chubʌ'anob i contrajob. Tsi' ch'ʌmʌyob tiñʌme' tac, yic'ot wacax, yic'ot alʌ wacax. Tsa' caji' tsʌnsañob cha'an mi' bʌc' c'uxob yic'ot i ch'ich'el.

³³Tsa' tili winic i suben Saúl: Jini winicob woli' cha'leñob mulil ti' contra lac Yum. Woli' c'uxob we'elʌl yic'ot i ch'ich'el, che'en. Saúl tsa' caji i tic' i winicob: Woli la' cha'len mulil. La'la ts'ʌlbeñon letsel ñuc tac bʌ xajlel wʌ'i, che'en.

³⁴Tsi' yʌlʌ ja'el: Yom mi la' puc la' bʌ ti' tojlel soldadojob. Subeñob ti pejtelelob, la' i pʌyob tilel ña' wacax yic'ot tiñʌme'. Wʌ' yom mi la' tsʌnsan ilayi cha'an mi la' c'ux, pero mach yomic mi la' c'ux we'elʌl yic'ot i ch'ich'el. Jiñʌch mulil ti' contra lac Yum, che'en. Che' jini ti jujuntiquilob tsa' caji' pʌyob tilel i wacax ti jini ac'ʌlel. Ya' tsi' tsʌnsayob.

³⁵Saúl tsi' melbe lac Yum jump'ejl pulʌntib. Jiñʌch ñaxan bʌ pulʌntib tsa' bʌ i melbe lac Yum.

³⁶Saúl tsa' caji' yʌl: La' lac chʌn ajñesan majlel jini filisteojob wʌle ti ac'ʌlel c'ʌlʌl mi' sʌc'an cha'an mi lac laj jisañob, che'en. Tsi' jac'ʌyob: La' ujtic che' bajche' ma' wʌl, che'ob. Pero tsi' yʌlʌ jini motomaj: La'ix lac lʌc'tesan lac bʌ ba'an Dios, che'en.

³⁷Jini cha'an Saúl tsi' c'ajtibe Dios: ¿Yom ba mi cajñesan lojon jini filisteojob? ¿Mu' ba caj a wʌc'ob ti' c'ʌb israelob? che'en. Pero Dios ma'anic tsi' jac'be i t'an ti jini q'uin.

³⁸Jini cha'an Saúl tsi' yʌlʌ: La'la pejtelel ñuc tac bʌ la' we'tel ila ti tejclum cha'an mi lac wen q'uel majqui an i mul ti lac tojlel.

³⁹Isujm mic subeñetla come cuxul lac Yum tsa' bʌ i colta israelob: Majqui an i mul, la' chʌmic. Anquese mi jinic calobil Jonatán am bʌ i mul wersa mi' chʌmel, che'en. Pero ma'anic majqui tsi' jac'be.

⁴⁰Saúl tsi' sube pejtelel israelob: Mux lac t'ox lac bʌ. Ya' yom mi la' wa'tʌl jatetla. Joñon yic'ot calobil Jonatán wʌ' ti yambʌ junwejl, che'en. Tsi' jac'ʌyob jini winicob: Che'ʌch yom che' bajche' wola' wʌl, che'ob.

⁴¹Saúl tsi' sube lac Yum: C Yum i Dioset israelob, yom ma' wen tsictesʌbeñon lojon majqui an i mul, che'en. A wilan lac Yum tsi' tsictesa: Jini yaño' bʌ ma'añobic i mul. Jatet Saúl yic'ot a walobil Jonatán an ti la' wenta jini mulil, che'en.

⁴²Saúl tsi' yʌlʌ: Quilala majqui an i mul, mi joñon o mi calobil Jonatán, che'en. Awilan tsa' tsictiyi añʌch i mul Jonatán.

⁴³Saúl tsi' sube i yalobil: Subeñon chuqui tsa' mele, che'en. Jonatán tsi' tsictesa i bʌ: Isujm, tsa'ix c mula ts'ita' jini chab. Tsa cotsa ti quej i ni' te' chucbil bʌ c cha'an. Um ba' añon cha'an mic chʌmel, che'en.

⁴⁴Saúl tsi' jac'ʌ: Wersa mi caj a chʌmel. La' i yʌq'ueñon wocol Dios, mi ma'anic mi cʌq'uet ti chʌmel, Jonatán, che'en.

⁴⁵Pero jini soldadojob tsi' subeyob Saúl: ¿Yom ba mi' chʌmel Jonatán? Jiñʌch tsa' bʌ i colta israelob cha'an mi' mʌjlel lac cha'an. Isujm mic subeñet lojon, come cuxul lac Yum: Ma'anic mi' cajel ti yajlel ti lum mi junt'ujmic i tsutsel i jol, come lac Yum tsi' wen colta. Jini cha'an tsi' mʌlbe laj contrajob, che'ob. Che'ʌch tsi' coltayob Jonatán pejtelel i pi'ʌlob cha'an ma'anic mi' yʌjq'uel ti chʌmel.

⁴⁶Jini cha'an Saúl tsi' cʌyʌ i tsʌclen majlel jini filisteojob. Tsa' laj sujtiyob majlel ti' lumal jini filisteojob.

⁴⁷Che' wolix ti yumʌntel Saúl ti' tojlel israelob, tsi' cha'le guerra yic'ot pejtelel i contrajob año' bʌ ti' joytʌlel, jini moabob, jini amoñob, jini edomob, yic'ot jini yumʌlob ti Soba, yic'ot jini filisteojob. Baqui jach tsa' majli Saúl tsa' mʌjli i cha'an.

⁴⁸Tsi' mele ñuc tac bʌ i ye'tel. Tsi' mʌlbe jini amalecob. Tsi' colta jini israelob. Tsi' jisa i contrajob woli bʌ i tic'lañob.

⁴⁹I yalobilob Saúl jiñobʌch Jonatán, Isúi yic'ot Malquisúa. An cha'tiquil i yixic'al ja'el, Merab jini chichʌl, yic'ot Mical jini ijts'iñʌl bʌ.

⁵⁰I yijñam Saúl jiñʌch Ahinoam (i yixic'al Ahimaas). Jini ñuc bʌ i yaj cʌnta soldado, jiñʌch Abner (i yalobil Ner, jini Ner i yumijel Saúl).

⁵¹Jini Cis, i tat Saúl, yic'ot Ner i tat Abner jiñobʌch i yalobilob Abiel.

⁵²Ti pejtelel i jabilel Saúl, tsi' chʌn cha'le guerra ti' tojlel filisteojob. Baqui jach tsa' tajle p'ʌtʌl bʌ winic ch'ejl bʌ i pusic'al, Saúl tsi' pʌyʌ cha'an mi' yochel ti soldado.